Eryibuka Ebihano 23:1-25
23 “Omulume oyo wabiribarurwa omw’itundula ebiheghe biwe kutse oyo wabiritwibwako ekitsuko kiwe ky’obulume isyingira omo ndeko ya Yehova.
2 “Omwana w’obumbalaka isyingira omo ndeko ya Yehova. Nibya n’abana biwe erihika oko kizazi* kye 10 isibasyingira omo ndeko ya Yehova.
3 “Omuamori n’Omumoabu isibasyingira omo ndeko ya Yehova. Nibya n’abana babo erihika oko kizazi* kye 10 isibasyingira omo ndeko ya Yehova,
4 kundi omughulu wabya ukalua e Misri, mubatakuwatikya n’akalyo n’amaghetse, kandi kundi mubaliha Balamu, mughala wa Beori, owe Peori, e Mezopotamia, atoke erikutakira.
5 Aliwe Yehova oMungu waghu mwatahulikirira Balamu. Omo mwanya w’ekyo, Yehova oMungu waghu mwabindula eritakirwa eryo mo miyisa, kundi Yehova oMungu waghu mwakwanza.
6 Omo ngebe yaghu yosi, isiwasyasyabawatikaya eriikala omo buholo kutse eribya ndeke
7 “Isiwapona Omuedomu, kundi ni mughala wenyu.
“Isiwapona Omumisri, kundi muwabya mugheni omo kihugho kiwe.
8 Abana babo b’ekizazi* ky’akasatu banganingira omo ndeko ya Yehova.
9 “Omughulu ukendisyabya ukalwa n’esyonzighu syaghu, isiwakola omwatsi mubi wosi-wosi.
10 Omulume amabya isyerire kundi mwakaluamo obuhalya* omo kiro, litolere iniaya ehihya w’ekambi, isyasubamo.
11 Erigholo ryabihika, litolere inianaba amaghetse. Neryo aho inianganasuba omo kambi eryuba ryabilenga.
12 Ukendisyabya ukahira ehihya w’ekambi omwanya ogho ukendisyabya ukayayihengekamo.* Eyo yo ukendisyabya ukayania.
13 Ekindu ky’eritakulamo isikyasyabya kikabula omo bindu byaghu. Ukendisyabya ukatakula mukyo mw’ekyuna embere sy’erinia, neryo wabibugha, iwaswika amabi waghu.
14 Kundi Yehova oMungu waghu akabya inianemutimba-timba omo kambi yenyu atoke erikusabula, kandi atoke erikuwatikya erisinga esyonzighu syaghu. Neryo litolere ekambi yaghu iyabya nyibuyirire, akasyalangira ekindu ekituwene ewaghu, neryo inialeka erighenda haghuma naghu.
15 “Omukobe amabitswa oko mukama wiwe neryo iniasa eyo uli, siritolere ukamusubya eyiri mukama wiwe.
16 Anganikala haghuma naghu omo mwanya ogho akendisyasombola, omo mughuma w’oko miyi yenyu, ahosi aho amanza. Isiwamutesa.
17 “Isihabya omumbesa Mwisraeli n’omughuma oyukabya mumbalaka w’ehekalu, kandi isihabya omulwana Mwisraeli n’omughuma oyukabya mumbalaka w’ehekalu.
18 Omughulu ukaberereraya ekyo wabiriyilagha, isiwaleta omo nyumba ya Yehova oMungu waghu ekindu ekiryalihawa omumbalaka mukali kutse omumbalaka mulume,* kundi Yehova oMungu waghu aponire ababiri bosi.
19 “Omughulu ukabweka omughala wenyu, isiwabugha uti akendisyahiramo efaida,* wangabya ighukamubweka esyofranga, akalyo, kutse ekindi kindu kyosi-kyosi ekyo mundu angasabako efaida.
20 Wanganasaba oyute Mwisraeli y’efaida,* aliwe Omwisraeli nga we isiwamusabayo, kusudi Yehova oMungu waghu akutsumule omo byosi ebyo ukakola omo kihugho ekyo ukayimaya mo kyaghu.
21 “Wamabiyilagha erikolera Yehova oMungu waghu y’omwatsi mulebe, iwalw’iwakolagho luba. Kundi Yehova oMungu waghu akendisyakusaba ati ukole ekyo ulyayilagha. Utitakola utya, ighukendibya iwamakola erilolo.
22 Aliwe utitayilagha erikola omwatsi mulebe, isiwendibyako olubanza.
23 Litolere iwaberererya ekyo ulyabugha. Ekyo ukayilagha kiri ng’ekihembo ekyo ukateka omw’anza. Litolere iwaberererya ekyo wabiriyilagha erikolera Yehova oMungu waghu.
24 “Wamahika omo ririma ry’emizabibu ry’omulikyenyu, wanganalya oko mizabibu ngoko wanzire, aliwe isiwahira kuyo omo kitiri kyaghu.
25 “Wamabihika omo ririma ry’engano ry’omulikyenyu, wanganatwa omo byala m’oko ngano eyabiryera, aliwe isiwatwa kuyo k’omo mughusu.
Amaelezo awehikwa
^ Kutse “lulengo.”
^ Kutse “lulengo.”
^ Kutse “b’olulengo.”
^ Kutse “esperme.”
^ Ni bugha ambu, “akabine, ewese.”
^ Kinywa kwa kinywa, “embwa.”
^ Kutse “e entere.”
^ Kutse “ye entere.”
