Eryibuka Ebihano 24:1-22
24 “Omulume amabitahya omukali, aliwe iniatamutsemera kundi mwakamusungako omwatsi owatuwene, litolere iniamuhandikira ekiratasi ky’eritwa endwa, iniamuhakyo, neryo iniamusubya ewabo.
2 Akendibya abisuba ewabo, anganayabya mukali w’oghundi mulume.
3 Omulume w’akabiri amabimupona, naye iniamuhandikira ekiratasi ky’eritwa endwa, iniamuhakyo, n’erimutibitako. Kutse omulume w’akabiri oyo amabihola,
4 omulume wiwe w’erimbere oyo wamutibitako syahamulirwe eritasyamwenda kundi abiritsandibwa, kusangwa Yehova aponire omwatsi oyo. Isiwaleta erilolo omo kihugho ekyo Yehova Mungu waghu akakuha mo mwandu.
5 “Siritolere omulunga muhya-muhya akaya oko malwa, kutse akahabwa eyindi mibiiri. Litolere iniasighala ewiwe omo mwaka mughuma n’eritsemesya omukali wiwe.
6 “Omundu isyapura oko ghundi k’oluso kutse engasirya* n’eribikabyo erihika omughulu omwinyebyo akendimuliha ebyo amubweka, kundi aho iniamamupurako ekikaleka iniabyaho.
7 “Wamabifumbula ngoko omundu abiriheka Omwisraeli mulikyabo, kandi ngoko abirimutesa n’erimughulya, litolere omukidnapere oyo inyitibwa. Litolere iwalusya omwatsi mubi omo kati-kati kenyu.
8 “Ebihagha* byamabihuluka omo kati-kati kenyu, uyikase erikwama ebyosi ebyo abahereri Balawi bakendikubwira. Ukole ngoko banalyakubwira.
9 Wibuke ekyo Yehova oMungu waghu akolera Miriamu omo nzira omughulu mwabya mukalua e Misri.
10 “Wamabibweka omulikyenyu y’ekindu kilebe, isiwingira omo nyumba yiwe erimya ekindu ekyo alyabugha ati akendikubikisya.
11 Litolere iwimana ehihya, neryo omundu oyo ulyabweka iniakuletera ekindu ekyo alyabugha ati akendikubikisya ky’ehihya.
12 Omundu amabilagha oko kindu kilebe, isiwaghotsera isiwewamuha ekindu ekyo alyakubikisaya.
13 Litolere iwamusubulirya ekyo alyakubikisaya eryuba ryanabilenga, neryo akendiyayato iniabiribana olukimba lwiwe. Neryo iniakendikutsumula, na Yehova oMungu waghu iniakendikulangira mo mutunganene.
14 “Isiwalimaya omundu oyukakukolera omubiiri oyulaghire oko kindu kandi omwera, angabya Mwisraeli mulikyenyu kutse oyute Mwisraeli oyo wikere omo kihugho kyenyu, omo miyi* yenyu.
15 Litolere iwamuha omusahara wiwe ekiro ekyo kisa-kisa, embere eryuba rilenge, kundi alaghire oko kindu kilebe n’omusahara wiwe w’akaleka iniabyaho. Wamatendikola utya, iniakendilakira Yehova busana n’ekyo ulyamukolera, neryo ighukendibya iwamabikola erilolo.
16 “Abobaba sibangitibwa busana n’ebyo abana babo balyakola, n’abana sibangitibwa busana n’ebyo abobaba wabo balyakola. Omundu akendisyabya akakwa busana n’erilolo riwe-riwe.
17 “Isiwatswera oyute Mwisraeli kutse engubi yo muhanda. Kandi isiwayimiraya olukimba olo mukwa-kali alyabugha ati akendikubikisya busana n’edeni.
18 Wibuke ngoko muwabya mukobe e Misri, kandi ngoko Yehova oMungu waghu mwakulusya omo bukobe obo. Ekyo kyo kyamaleka inakubwira niti ukole utya.
19 “Omughulu ukendisyabya ukasoloma ebyo ulyeraya omo ririma ryaghu, neryo iwibirirwa omughanda omo ririma ryaghu, isiwasyabya ukasubiragho. Ukendisyabya ukalekeragho oyute Mwisraeli, engubi, n’omukwa-kali. Wamabikola utya, Yehova oMungu waghu iniakenditsumula ebyosi ebyo ukakola.
20 “Omughulu ukendisyalaghalya amatunda w’omuzeituni waghu, isiwasuba enyuma eriyalaghalya amatunda awalyasighala oko mitahi. Amatunda awakendisyasighala oko muti akendisyabya w’oyute Mwisraeli, engubi, n’omukwa-kali.
21 “Omughulu ukendisyoha emizabibu yaghu, isiwasuba enyuma eriyoha emizabibu eyiryasighala. Ukendisyabya ukasighirayo oyute Mwisraeli, engubi, n’omukwa-kali.
22 Wibuke ngoko muwabya mukobe e Misri. Ekyo kyo kikaleka inakubwira niti ukole utya.
Amaelezo awehikwa
^ Ni ribwe erikabya oko luso kw’endata, eryo bakaswamo.
^ Ekinywa ky’Ekiebrania ekikabindulawa mo “bihagha” kiwite amaana mangyi, kandi kyanganahiramo n’awandi makoni w’engobi awakasighalira. Kyanganabyamo n’amakoni awakasungika omo syongyimba n’oko manyumba.
^ Kinywa kwa kinywa, “milango.”
