Eryibuka Ebihano 26:1-19
26 “Ukendesyabya wabisala wingira omo kihugho ekyo Yehova oMungu waghu akakuha mo mwandu, neryo wabihambakyo n’eriikala mukyo,
2 ukendisyimya oko byalya* byosi by’erimbere-mbere ebyo ukendisyerya omo kihugho ekyo Yehova oMungu waghu akakuha, ukendisyahirabyo omo kitiri, n’eriya omo mwanya ogho Yehova oMungu waghu akendisyasombola erihiraho erina riwe.
3 Ukendisyayasungana n’omuhereri oyukendisyabya akakola omubiiri w’oMungu oko mughulu oyo. Ukendisyamubwira uti, ‘Munabwire, nanzire eribwira Yehova oMungu waghu ngoko nabiringira omo kihugho ekyo Yehova alapira abotata-kulu wetu ati akendituhakyo.’
4 “Neryo omuhereri akendisyimya ekitiri ekyo ulyamuletera, n’erihirakyo embere sy’ekiherero kya Yehova oMungu waghu.
5 Enyuma sy’aho, ukendisyabugha embere sya Yehova oMungu waghu uti, ‘Baba waghe abya Muaramu kandi abya akahuma-huma.* Mwandaghalira e Misri n’abandu bake b’omo nyumba yiwe, amikalayo ng’omugheni. Iniane eyo, mwabya kihanda kinene, eky’amaka, n’ekirimo abandu banene.
6 Neryo Abamisri mubatwaghalya, mubatutesa, n’erituhira omo bukobe obukalire.
7 Neryo mutwalakira Yehova oMungu w’abotata-kulu wetu, na Yehova mwowa omulenge wetu, mwalangira ngoko tukaghalawa, mwalangira amaligho agho twabyamo, n’amateso wetu.
8 Oko mwiso, Yehova mwatulusya e Misri omo byala biwe by’amaka n’okuboko kwiwe kw’amaka. Mwatulusyayo omw’ikola emyatsi eyikasaghisaya, emyatsi y’obutoki, n’ebitiko-tiko.
9 Neryo mwatuleta omo mwanya ono n’erituha ekihugho kino ekikasendamo amasabu n’obuki.
10 Ekyo kyo kyamaleka inaleta ebyalya by’erimbere-mbere ebyo nilyeraya oko kitaka ekyo Yehova abirimba.’
“Neryo ukendisyahira ekitiri ekyo embere sya Yehova oMungu waghu n’erikukama embere sya Yehova oMungu waghu.
11 Enyuma sy’aho, iwe, Omulawi, n’omundu oyute Mwisraeli oyo wikere omo kati-kati kenyu, mukendisyatsema busana n’ebibuya byosi ebyo Yehova oMungu waghu alyakuha, iwe n’abosi b’omo nyumba yaghu.
12 “Ukendisyabya wabibugha erilusya ekighuma kyosi ky’omw’ikumi oko byalya ebyo ulyeraya omo mwaka w’akasatu, ni bugha ambu, omwaka w’ekighuma ky’omw’ikumi, ukendisyahakyo Omulawi, omundu oyute Mwisraeli, engubi, n’omukwa-kali, neryo bakendisyalya n’eryughuta omo miyi* yenyu yosi.
13 Enyuma sy’aho, ukendisyabugha embere sya Yehova oMungu waghu uti, ‘Nabirilusya ewaghe esehemu nyibuyirire n’erihayo Omulawi, omundu oyute Mwisraeli, engubi, n’omukwa-kali, ngoko ulyanibwira. Munitetabuna emighambo yaghu kutse eritendisikyayo.
14 Munitetalya oko sehemu eyo nyibuyirire omughulu nabya omo kiriro, munitetalusyako ekindu omughulu nabya isinierire, munitetahitya kuyo busana n’abaholi. Mungakwama omulenge wa Yehova oMungu waghe, kandi mungakola ebyosi ebyo ulyambwira.
15 Neryo sasa, ighune omo bwikalo bwaghu bubuyirire elubula, usamalire eno n’eritsumula abandu baghu Israeli, n’ekihugho ekyo wabirituha, ngoko walapira abotata-kulu wetu, ekihugho ekikasendamo amasabu n’obuki.’
16 “Munabwire, Yehova oMungu waghu akakusaba erikwama emighambo n’ebyalayiro ebi. Litolere iwakwamabyo n’erisikyabyo n’omutima waghu wosi n’enafsi* yaghu yosi.
17 Munabwire, Yehova amakubwira ati akendibya Mungu waghu wamabikwama esyonzira siwe, wamabisikya ebihano biwe, emighambo yiwe, n’ebyalayiro biwe, n’erihulikirira omulenge wiwe.
18 Kandi munabwire, naghu wamabwira Yehova uti ukendibya kihanda kiwe, ekindu kiwe-kiwe,* ngoko abirikulagha, kandi uti ukendikwama emighambo yiwe yosi.
19 Neryo ngoko abirikulagha, akendikuhira endata oko bindi bihanda byosi ebyo ahangyika. Ekyo kikendileka iwapipwa, iwaminywa, n’erihabwa olukengerwa omughulu ukendibya ukakola emyatsi eyikakanganaya ngoko uli kihanda kibuyirire kya Yehova oMungu waghu.”
Amaelezo awehikwa
^ Kinywa kwa kinywa, “matunda.”
^ Kutse alinga, “abya akahola.”
^ Kinywa kwa kinywa, “milango y’emiyi.”
^ Ulebaye Amaana w’ebinywa.
^ Kutse “kiwe ky’obughuli.”
