Eryibuka Ebihano 27:1-26
27 Enyuma sy’aho, Musa n’abasyakulu be Israeli mubabwira abandu bati: “Usikaye emighambo yosi eyo ngakuha munabwire.
2 Ekiro ekyo ukendisyasoka e Yordani n’eringira omo kihugho ekyo Yehova oMungu waghu akakuha, ukendisyimania amabwe manene-manene n’erihaka kugho kw’embemba.*
3 Ukendisyahandika ebinywa byosi by’Emighambo eyi wabisoka, utoke eringira omo kihugho ekyo Yehova oMungu waghu akakuha, ekihugho ekikasendamo amasabu n’obuki, ngoko Yehova oMungu w’abotata-kulu waghu abirikulagha.
4 Ukendisyabya wabisoka e Yordani, ukendisyimania amabwe ayo oko Kitwa kye Ebali n’erihaka kugho kw’embemba,* ngoko ngakubwira munabwire.
5 Kandi ukendisyahimbira Yehova oMungu waghu y’ekiherero oko kitwa ekyo, ekiherero ky’amabwe. Siritolere ukatwa amabwe ayo omo bindu by’ekyuma.
6 Isiwatulanga amabwe ogho ukendisyahimbiramo Yehova oMungu waghu y’ekiherero, kandi ukendisyaherera Yehova oMungu waghu amahere w’eryokererya oko kiherero ekyo.
7 Ukendisyahererako amahere w’obuholo n’eriliragho aho, kandi ukendisyayisyandira embere sya Yehova oMungu waghu.
8 Kandi litolere iwahandika ndeke oko mabwe ayo kw’ebinywa byosi by’Emighambo eyi.”
9 Enyuma sy’aho, Musa n’abahereri Balawi mubabwira Abaisraeli bosi bati: “Iwe Israeli, uhune, n’erihulikirira. Munabwire, wamabibya kihanda kya Yehova oMungu waghu.
10 Litolere iwahulikirira omulenge wa Yehova oMungu waghu n’erisikya emighambo n’ebihano biwe, ebyo ngakubwira munabwire.”
11 Ekiro ekyo, Musa mwabwira abandu ati:
12 “Mukendisyabya mwabisoka e Yordani, bino by’ebihanda ebikendisyimana oko Kitwa kye Gerizimu busana n’eritsumula abandu: Simeoni, Lawi, Yuda, Isakari, Yozefu, na Benyamini.
13 N’ebi by’ebihanda ebikendisyimana oko Kitwa kye Ebali busana n’eritakira abandu: Rubeni, Gadi, Asheri, Zabuloni, Dani, na Naftali.
14 Neryo Abalawi bakendisyabwira abandu bosi be Israeli omo mulenge muli bati:
15 “‘Atakirawe omundu oyukakokotaya esanamu eyibatsire kutse ey’emetale eyo balyayeyukaya, ekindu ekyo Yehova aponire, ekindu ekikakokotibawa n’omufundi,* neryo iniabisakyo.’ (Neryo abandu bosi bakendisyabugha bati, ‘Amina!’*)
16 “‘Atakirawe oyukapokaya baba wiwe kutse mama wiwe.’ (Neryo abandu bosi bakendisyabugha bati, ‘Amina!’)
17 “‘Atakirawe oyukahumisaya omupaka w’eririma ry’omulikyabo.’ (Neryo abandu bosi bakendisyabugha bati, ‘Amina!’)
18 “‘Atakirawe oyukaleka endime-time iyahera oko nzira.’ (Neryo abandu bosi bakendisyabugha bati, ‘Amina!’)
19 “‘Atakirawe oyukatswera muhanda emyatsi y’oyute Mwisraeli, y’engubi, kutse y’omukwa-kali.’ (Neryo abandu bosi bakendisyabugha bati, ‘Amina!’)
20 “‘Atakirawe oyukaghotsera n’omukali wa baba wiwe, kundi akahemula* baba wiwe.’ (Neryo abandu bosi bakendisyabugha bati, ‘Amina!’)
21 “‘Atakirawe oyukaghotsera n’enyama yosi-yosi.’ (Neryo abandu bosi bakendisyabugha bati, ‘Amina!’)
22 “‘Atakirawe oyukaghotsera na mwali wabo, ni bugha ambu, mwali wa baba wiwe, kutse mwali wa mama wiwe.’ (Neryo abandu bosi bakendisyabugha bati, ‘Amina!’)
23 “‘Atakirawe oyukaghotsera na mabyala wiwe.’ (Neryo abandu bosi bakendisyabugha bati, ‘Amina!’)
24 “‘Atakirawe oyukalimbaya omulikyabo n’erimwita.’ (Neryo abandu bosi bakendisyabugha bati, ‘Amina!’)
25 “‘Atakirawe omundu oyukaligha ekyutuliro busana n’eriita omundu oyute n’ekosa.’* (Neryo abandu bosi bakendisyabugha bati, ‘Amina!’)
26 “‘Atakirawe oyutendisikya ebinywa by’Emighambo eyi n’eritendikwamabyo.’ (Neryo abandu bosi bakendisyabugha bati, ‘Amina!’)
Amaelezo awehikwa
^ Kutse “kw’eswakala.”
^ Kutse “kw’eswakala.”
^ Kutse “omufundi oyukakokotaya ebindu by’emiti n’eby’emetale eyo balyayeyukaya.”
^ Kutse “Bibye bitya!”
^ Kinywa kwa kinywa, “akasukula olukimba lwa baba wiwe.”
^ Kutse “enafsi y’omusasi owate n’ekosa.”