Eryibuka Ebihano 29:1-29
29 Bino by’ebinywa by’endaghane eyo Yehova abwira Musa ati akole n’abandu be Israeli omo kihugho kye Moabu. Ni yindi ndaghane, si y’endaghane eyo akola haghuma nabo e Horebu.
2 Neryo Musa mwahindania Abaisraeli bosi, amababwira ati: “Mumwayilangirira ebyosi ebyo Yehova akolera Farao omo kihugho kye Misri, abaghombe biwe bosi, n’ekihugho kiwe kyosi,
3 amalipizi awakalire agho mwayilangirira, emyatsi eyo y’obutoki, n’ebitiko-tiko.
4 Aliwe erihika na munabwire, Yehova syalyabaha omutima w’eriminya, ameso w’erilangira, n’amatwi w’eryowa.
5 ‘Omo myaka 40 eyo nabya ngabasondola omo mbwarara, esyongyimba syenyu musyatakula, ebiryato byenyu mubitatsanda.
6 Mumutalya omukati kutse erinywa edivai kutse obundi bwabu bwosi-bwosi obukatamiraya, kusudi muminye ngoko niri Yehova oMungu wenyu.’
7 N’oko mwiso, mumwahika omo mwanya ono, neryo Sihoni, omwami we Heshboni, na Ogu, omwami we Bashani, mubasyalwa netu, aliwe mutwasingabo.
8 Twabere twabisingabo, mutwimya ekihugho kyabo, twamahakyo Abarubeni, Abagadi, n’enusu y’ekihanda ky’Abamanase mo mwandu.
9 Neryo musikaye ebinywa by’endaghane eno n’erikwamabyo, emyatsi yosi eyo mukendisyakola itoke eribaghendera ndeke.
10 “Munabwire, inywe bosi mwimene embere sya Yehova oMungu wenyu, abakulu b’ebihanda byenyu, abasyakulu benyu, abimaniri benyu, obuli mulume we Israeli,
11 abana benyu, abakali benyu, n’abandu abate Baisraeli abali omo kambi yenyu, eritsuka oko abakabasenyera esyongwe erihika oko abakabatehera amaghetse.
12 Muli hano busana n’erilapa ngoko mwamingira omo ndaghane ya Yehova oMungu wenyu, endaghane eyo Yehova oMungu wenyu akakola nenyu munabwire
13 atoke eribayira mo bandu biwe munabwire, n’eribya Mungu wenyu, ngoko abalagha, kandi ngoko alapira abotata-kulu wenyu, Abrahamu, Isaka na Yakobo.
14 “Si bugha ambu ngalapa erikola endaghane eyi nenyu inywe basa,
15 aliwe ngakolayo n’abandu abimene netu hano munabwire, embere sya Yehova oMungu wetu, kandi haghuma n’abate netu hano munabwire.
16 (Kundi munasi ndeke-ndeke ngoko twikala e Misri, kandi ngoko mutwalaba omo bihanda mbiriri-mbiriri tukaluayo.
17 Kandi mwabya mukalangira ebindu byabo ebikita esyonye n’esyosanamu syabo esikita esyonye* esy’emiti n’esy’amabwe, esy’efeza* n’ehoro, esyabya omo kati-kati kabo.)
18 Muyiteghaye omo kati-kati kenyu mukasyasungika munabwire omulume kutse omukali, ekihanda kutse ekitunga, ekyo omutima wakyo akalua oko Yehova oMungu wetu busana n’erikolera emiungu y’ebihanda ebyo, kandi muyiteghaye omo kati-kati kenyu mukasyabya omulihi owakasako amatunda awali mw’esumu n’engalihira.
19 “Aliwe omundu amabyowa ebinywa bino by’erilapa, neryo iniabya n’emiyiheko omo mutima wiwe n’eriyibwira ati, ‘Sinendikwa kindu, nomo nangakola ekyo nanzire,’ n’ekyo ikikendileta obuhanya oko buli mundu.*
20 Yehova isyendighanyira omundu oyo. Aliwe Yehova iniakendimuhitanako kutsibu, neryo eritakirwa ryosi erihandikire omo kitabu eki irikendimuhikira, kandi Yehova iniakendibulirania erina riwe eyikwa w’elubula.
21 Yehova iniakendilusya omundu oyo y’omo bihanda byosi bye Israeli, neryo iniamuletera obuhanya erikwamana n’ebinywa byosi by’eritakirwa by’endaghane ebihandikire omo kitabu eki ky’Emighambo.
22 “Omughulu ekizazi* ky’abana baghu n’abate Baisraeli abakalua omo kihugho ky’ehali bakendisyalangira ebihunzo ebikendisyahika omo kihugho kyaghu, amakoni agho Yehova akendisyakuletera,
23 bakendisyabya babilangira esufre,* omunyu, n’omuliro byabiritsandya ekihugho kyaghu kyosi, ngoko sikyangaherwamo kindu kutse erilasamo kindu, ngoko sihali n’ebiti ebyangalasamo, ngoko emyatsi yabiribya ng’omughulu Yehova atsandaya e Sodomo ne Gomora, e Adma ne Zeboimu, busana n’ekinigha n’erihitana riwe,
24 ibo n’ebihanda byosi bakendisyabugha bati, ‘Busanaki Yehova mwakakolera ekihugho kino ky’atya? Busanaki mwakahitana kukyo ko kutsibu atya?’
25 Neryo bakendisyabugha bati, ‘Ni kundi mubatasikya endaghane ya Yehova, oMungu w’abotata-kulu wabo, eyo akola nabo omughulu abalusaya e Misri.
26 Aliwe mubayakolera eyindi miungu n’erikukamirayo, emiungu eyo batabya basi n’eyo oMungu wabo atabalighira eriramya.*
27 Neryo Yehova abirihitana kutsibu oko kihugho ekyo n’erileta kukyo kw’eritakirwa ryosi erihandikire omo kitabu eki.
28 Neryo Yehova mwakwa ekinigha, amahitana kutsibu, n’eripona kutsibu, amakulangabo oko kitaka kyabo, n’eribatwala omo kindi kihugho, eyo bali munabwire.’
29 “Emyatsi eyibiseme ni ya Yehova oMungu wetu, aliwe emyatsi eyabiribisulwa ni yetu n’abana betu kera na kera, tutoke erikwama ebinywa byosi by’Emighambo eyi.
Amaelezo awehikwa
^ Ekinywa ky’Ekiebrania ekikakolesibawa hano, alinga ni ky’omo kihanda kighuma n’ekinywa ekikamaanisaya “amabi.” Ekinywa ekyo kikakanganaya ngoko ekindu kilebe sikiri loko.
^ Ni kindu ky’obughuli ekikalua omo kitaka.
^ Kinywa kwa kinywa, “oko mumea owali ahali amaghetse n’oko mumea owumire.”
^ Kutse “olulengo.”
^ Ni hibunga ehikaka luba kandi ehikakumba muhanda omughulu hikaka, ng’ehikabya oko musiku w’elimete.
^ Kinywa kwa kinywa, “atabaghabira.”