Eryibuka Ebihano 3:1-29
3 “Neryo mutwatimba, twamahetuka omo nzira ye Bashani. Neryo Ogu, omwami we Bashani, mwasa n’abandu biwe bosi erisyalwa netu e Edrei.
2 Neryo Yehova mwanibwira ati, ‘Isiwamusagha, kundi ngendikuwatikya erimusinga, iye n’abandu biwe bosi, kandi ngendikuha n’ekihugho kiwe. Naye ukendimuyira ngoko wanayira Sihoni, omwami w’Abaamori, oyo wabya ikere e Heshboni.’
3 Neryo Yehova oMungu wetu mwatuwatikya erisinga na Ogu, omwami we Bashani, n’abandu biwe bosi. Mutwitabo, muhatabya omundu n’omughuma oyo wasaka.
4 Mutwahamba emiyi yiwe yosi. Muhatabya n’omuyi n’omughuma ogho twatahamba. Mutwahamba emiyi yabo 60, ekiharo kyosi kye Argobu, ekiharo kyosi kye Bashani, ekyo Ogu abya akatabala.
5 Emiyi yosi eyo yabya miyi eyo mundu ateangingiramo bweghu-bweghu. Yabyako esyombimbo nyiri-nyiri, emilango eyiriko ebikale binene-binene. Mutwimya n’emiyi minene eyiteko esyombimbo.
6 Mutwitabo ngoko twanakolera Sihoni, omwami we Heshboni. Mutwatsandya obuli muyi n’eriita abalume, abakali, n’abana.
7 Mutwimya esyonyama syosi n’ebindu byosi ebyabya omo miyi eyo.
8 “Oko mughulu oyo, mutwimya ekihugho ky’abami babiri Baamori ekyabya omo kiharo kye Yordani, eritsuka omo Musya* we Arnoni eriyahika oko Kitwa kye Hermoni.
9 (Ekitwa ekyo, Abasidoni ibakahulakyo mo Sirioni, n’Abaamoni ibakahulakyo mo Seniri.)
10 Mutwahamba n’emiyi yosi y’omo ribanda, e Gileadi yosi, ne Bashani yosi eriyahika e Saleka ne Edrei, emiyi eyabya omo bwami bwa Ogu e Bashani.
11 Ogu, omwami we Bashani, yo Murefaimu oyo wabya iniakineho. Esanduku* yiwe yabya y’ekyuma.* Oko buli, yabya y’amaboko* 9, n’oko bughali, yabya y’amaboko ani, erikwamana ngoko abandu babya babeghere eripima okuboko. Esanduku eyo yikine e Raba ew’Abaamoni.
12 Oko mughulu oyo, mutwimya ekihugho kino: Ekitsukire e Aroeri eyiri hakuhi n’Omusya* we Arnoni, n’enusu y’ekiharo ky’ebitwa kye Gileadi ekiri omo kihugho ekyo. Abarubeni n’Abagadi bo naha emiyi y’omo kihugho ekyo.
13 N’ekiharo ekyasaka ekye Gileadi ne Bashani yosi, eyabya omo bwami bwa Ogu, munahakyo enusu y’ekihanda kya Manase. Ekiharo kyosi kye Argobu, ekiri omo kihugho kye Bashani, kyabya ikyasibwemo ekihugho ky’Abarefaimu.
14 “Yairi, mughala wa Manase, mwimya ekiharo kyosi kye Argobu ekyabya omo Bashani eriyahika oko mupaka w’Abageshuri n’Abamaakati. N’emilongo ye Bashani, mwahulayo mo Havote-yairi* erikwamana n’erina riwe. Ko yikinahulawa yitya erihika na munabwire.
15 Na Makiri yo naha ekiharo kye Gileadi.
16 N’Abarubeni n’Abagadi bo naha ekiharo ekitsukire e Gileadi eriyahika omo Musya* we Arnoni, n’ekiharo ekiri omo kati-kati k’omusya m’omupaka w’ekiharo kyabo, n’eriyahika e Yaboki, ni bugha ambu omusya owali oko mupaka w’Abaamoni,
17 ne Araba, e Yordani, n’omusike we Yordani, eritsuka e Kinereti eriyahika oko Ngetse ye Araba, ni bugha ambu Engetse y’Omunyu,* oko mwanzo w’amandaghala we Pisga ebwanga bw’eyo ryuba rikasira.
18 “Neryo munabaha ekyalayiro kino: ‘Yehova oMungu wenyu abiribaha ekihugho kino mo kyenyu. Abalume benyu bosi b’amaka bakendisyimya ebindu by’amalwa n’eribera abaghala benyu b’embere, ni bugha ambu Abaisraeli, mukasoka e Yordani.
19 Abakali n’abana benyu basa, n’esyonyama syenyu sisa (ninasi ndeke-ndeke ngoko muwite oko syonyama sinene) bo bakendisyasighala omo miyi eyo nabiribaha,
20 erihika omughulu Yehova akendisyaluhukya abaghala benyu, ngoko nenyu abiribaluhukya, n’erihika omughulu ibo nabo bakendisyimya ekihugho ekyo Yehova oMungu wenyu akendibaha ok’oghundi musirya we Yordani. Enyuma sy’aho, obuli mundu inianganasuba omo kiharo kiwe ekyo nabiribaha.’
21 “Oko mughulu oyo, munaha Yosua y’ekyalayiro kino: ‘Muwayilangirira omo meso waghu ekyo Yehova oMungu wenyu akolera abami babiri abo. Yehova kw’anemwendisyakolera atya amami wosi awali eyo mukasokera.
22 Isimwasaghabo, kundi Yehova oMungu wenyu yukendibalwira.’
23 “Oko mughulu oyo, munalemba-lemba Yehova niti:
24 ‘Yehova, iwe Mukama Mukulu oko Bosi, wabiritsuka erikangania omughombe waghu ngoko uli mukulu, n’erimukangania ebyala byaghu by’amaka, kundi omungu wahi omo lubula kutse oko kihugho yo wangatoka erikola emyatsi y’amaka eyiri ng’eyo ukakola?
25 Kisi, leka nisoke e Yordani, niyalebaye ekihugho ekyuwene, ekiri oko ghundi musirya, ekiharo ky’ebitwa kino ekyuwene, ne Lebanoni.’
26 Aliwe Yehova abya iniakinanihiteneko busana nenyu, mwatanza nibya n’erinihulikirira. Omo mwanya w’ekyo, Yehova mwanibwira ati, ‘Bihwere aho! Isiwasyasyambwira oko mwatsi oyo.
27 Hetukira oko singyi y’Ekitwa kye Pisga. Ulebaye eyo ryuba rikalengera, oko luhande lw’endata, oluhande lw’eyikwa, n’olweyo ryuba rikasira, usamalire ekihugho kundi siwendisoka e Yordani.
28 Uyire Yosua mo mukulu, umusikaye mutima, n’erimuhiramo akaghala, kundi n’iye yukendisondola abandu aba bakasoka, kandi n’iye y’ukendingiryabo omo kihugho ekyo ukendilangira.’
29 Ebyosi ebyo byalaba itune omo musya owahererenie ne Bete-peori.
Amaelezo awehikwa
^ Kutse “musya owakumamo amaghetse.”
^ Kutse “Eserekeya.”
^ Kutse alinga, “y’eribwe erikinire erikalua omo volka.”
^ Okuboko kughuma ini syosantimetre 44,5. Ulebaye Endomeko B14.
^ Kutse “n’omusya owakumamo amaghetse.”
^ Ni bugha ambu “emilongo y’amahema ya Yairi.”
^ Kutse “musya owakumamo amaghetse.”
^ Kutse “Engetse Eyiholire.”