Eryibuka Ebihano 30:1-20
30 “Ebinywa byosi ebi bikendisyabya byabikuhikako, ni bugha ambu, emiyisa n’eritakirwa ebyo nabirihira embere syaghu, omughulu ukendisyibukabyo* ighune omo bihanda byosi eyo Yehova oMungu waghu akendisyakupanza-panzira,
2 omughulu ukendisyasubira Yehova oMungu waghu, iwe n’abana baghu n’erihulikirira omulenge wiwe omw’ikwama n’omutima waghu wosi n’enafsi* yaghu yosi ebyosi ebyo ngakubwira munabwire,
3 Neryo Yehova oMungu waghu akendisyasubulya abandu baghu abalyanyeghawa, akendisyakughanyira, kandi akendisyakukuma-kumira haghuma abikulusya omo bihanda byosi eyo Yehova oMungu waghu abya iniabirikupanza-panzira.
4 Nomo abandu baghu bangabya ibabiripanzwa-panzwa erihika oko mupaka w’elubula, Yehova oMungu waghu akendisyakukuma-kumira haghuma n’erikulusyayo.
5 Yehova oMungu waghu akendisyakusubya omo kihugho ekyo abotata-kulu waghu bimaya, kandi ukendisyimyakyo, kandi akendisyaleka emyatsi yosi iyakughendera ndeke, n’erikuyira mo banene kulenga abobaba waghu.
6 Yehova oMungu waghu akendisyerya* omutima waghu n’omutima w’abana baghu utoke eryanza Yehova oMungu waghu n’omutima waghu wosi n’enafsi* yaghu yosi kandi utoke eribyaho.
7 Neryo Yehova oMungu waghu akendisyaleta eritakirwa ryosi eri oko syonzighu syaghu, esyakupona n’erikwaghalya.
8 “Ukendisyasubira Yehova n’erihulikirira omulenge wiwe, n’erisikya emighambo yosi eyo ngakubwira munabwire.
9 Yehova oMungu waghu akendisyatsumula kutsibu ebyosi ebyo ukendisyakola, akendisyakuha abana banene, esyonyama nene, kandi ukendisyabya ukerya ebyalya binene, kundi kandi Yehova akendisyatsemera erikutsumula ngoko atsemera eritsumula abotata-kulu waghu.
10 Kundi oko mughulu oyo ukendisyahulikirira omulenge wa Yehova oMungu waghu, ukendisyakwama emighambo n’ebyalayiro biwe ebihandikire omo kitabu kino ky’Emighambo, kandi ukendisyasubira Yehova oMungu waghu n’omutima waghu wosi n’enafsi* yaghu yosi.
11 “Aliwe omughambo ogho ngakuha munabwire syakalire kutsibu okw’iwe, kandi syali eyo utewangahika.
12 Syali elubula, neryo siwangabugha uti, ‘Nindi y’ukendyerukira elubula akayatwenderagho, tutoke eryowagho n’erikwamagho?
13 Kandi syali oko lundi luhande lw’engetse, neryo siwangabugha uti, ‘Nindi yukendisokera oko lundi luhande lw’engetse akayatwenderagho, tutoke eryowagho n’erikwamagho?’
14 Kundi ekinywa ekyo kiri hakuhi-kuhi naghu, omo buno bwaghu n’omo mutima waghu, utoke erikwamakyo.
15 “Ngahira embere syaghu engebe n’obutseme, oluholo n’obuhanya.
16 Wamabikwama emighambo eyo Yehova oMungu waghu akakuha munabwire, omw’anza Yehova oMungu waghu, omw’ikwama esyonzira siwe, n’omw’ikwama emighambo yiwe, ebyalayiro biwe, n’ebihano biwe, ighukendibyaho n’eriyira abana bangyi, kandi Yehova oMungu waghu iniakendisyakutsumula omo kihugho ekyo ukayimaya.
17 “Aliwe omutima waghu amabiyilusya oko Mungu, neryo iwaghana erihulikirira, kandi iwaligha eritebwa n’erikukamira eyindi miungu n’erikolerayo,
18 ngakubwira munabwire ngoko ighukendisyahola, isiwendisyabugha biro binene omo kihugho ekyo ukendimya wabisoka e Yordani.
19 Munabwire, ngimaya olubula n’ekihugho mo bimiri* ngoko nabirihira embere syaghu engebe n’oluholo, emiyisa n’eritakirwa, neryo litolere iwasombola engebe, utoke eribyaho, iwe n’abana baghu,
20 omw’anza Yehova oMungu waghu, omw’ihulikirira omulenge wiwe, n’omw’imumakirira, kundi iye yo ngebe yaghu, kandi Yehova yukendisyaleka iwabugha ebiro binene omo kihugho ekyo abirilapa eriha abotata-kulu waghu, Abrahamu, Isaka na Yakobo.”
Amaelezo awehikwa
^ Kinywa kwa kinywa, “ukendisyasubyabyo omo mutima waghu.”
^ Ulebaye Amaana w’ebinywa.
^ Kinywa kwa kinywa, “akendisyabania.”
^ Ulebaye Amaana w’ebinywa.
^ Ulebaye Amaana w’ebinywa.
^ Kutse “batemwe.”