Eryibuka Ebihano 31:1-30
31 Neryo Musa mwayabwira Abaisraeli bosi ebinywa ebi.
2 Mwababwira ati: “Lino niwite emyaka 120. Sinangasyabasondola,* kundi Yehova mwanibwira ati, ‘Siwendisoka e Yordani eno.’
3 Yehova oMungu wenyu yukendisoka embere syenyu, kandi iye yukendibughaho ebihanda ebi ebiri embere syenyu, mukenditibita oko bihanda ebyo. Yosua yukendibasondola mukasoka, ngoko Yehova abiribugha.
4 Yehova akendikolera ebihanda ebyo ngoko akolera Sihoni na Ogu, abami b’Abaamori, kandi ngoko akolera ekihugho kyabo omughulu abita.
5 Yehova akendisyasingabo omo mwanya wenyu, nenyu mukendisyabakolera erikwamana n’emighambo yosi eyo nabiribaha.
6 Isimubaha kandi mubye n’akaghala. Isimwasagha kandi isimwatitimana embere syabo, kundi Yehova oMungu wenyu anemughenda nenyu. Syendisyabalekerania kutse eribasighania.”
7 Neryo Musa mwabirikira Yosua, amamubwirira embere sy’Abaisraeli bosi ati: “Isiwubaha kandi ubye n’akaghala, kundi n’iwe ukendingirya abandu aba omo kihugho ekyo Yehova alapa eriha abotata-kulu wabo, kandi n’iwe ukendisyabahakyo mo mwandu.
8 Yehova ane naghu, kandi akendisyabya iniane naghu. Syendisyakulekerania kutse erikusighania. Isiwasagha kutse erititimana.”
9 Neryo Musa mwahandika Emighambo eyi, amahayo abahereri Balawi ababya bakaheka erisanduku ry’endaghane ya Yehova, mwahayo n’abasyakulu bosi be Israeli.
10 Musa mwababwira ati: “Oko mwiso w’obuli myaka 7, oko mughulu owabirihirwaho, omo mwaka w’erilekerania amadeni, omughulu w’Ekiro Kikulu ky’Ebibanda,*
11 omughulu Abaisraeli bosi bakendisyahika embere sya Yehova oMungu waghu omo mwanya ogho akendisyasombola, mukendisyabya mukasomera Abaisraeli bosi b’Emighambo eyi batoke eryowayo.
12 Muhindanaye abandu, abalume, abakali, abana, abate Baisraeli abikere omo miyi* yenyu, batoke erihulikirira, erigha emyatsi eyilebirye Yehova oMungu wenyu, erigha ngoko bangamusagha, kandi batoke erisikya ebinywa byosi by’Emighambo eyi.
13 Neryo abana babo abataminya Emighambo eyi bakendisyowa n’erigha ngoko bangasagha Yehova oMungu wenyu omo biro byosi ebyo mukendisyabugha omo kihugho ekyo mukasonda erimya mwabisoka e Yordani.”
14 Neryo Yehova mwabwira Musa ati: “Ukisiya iwahola. Birikira Yosua, neryo muhike oko hema y’erihindanamo, nitoke erimuyiramo mukulu.” Neryo Musa na Yoshua mubaghenda eyiri ehema y’erihindanamo.
15 Neryo Yehova mwabahulukira ahali ehema, omo nduyi y’ekitu, n’enduyi y’ekitu eyo muyimana oko mulango w’ehema.
16 Neryo Yehova mwabwira Musa ati: “Ukisiya iwahola,* n’abandu aba bakenditsuka erikola obumbalaka bw’obunya-kirimu n’emiungu y’amabehi eyibatimbireko omo kihugho ekyo bakayamo. Bakendisyanileka, n’eritendisikya endaghane eyo nabirikola nabo.
17 Neryo ngendisyabahitanako kutsibu, ngendisyabalekerania, n’eritendibatsomana* erihika omughulu bakendisyatoghotibwa. Bakendisyabya babyaghalwa kutsibu n’erihikirwa n’obuhanya, bakendisyabugha bati, ‘Syalinga obuhanya bosi obu bukatuhikako kundi oMungu wetu syali omo kati-kati ketu!’
18 Aliwe oko mughulu oyo, ngendisyababisa obusu bwaghe busana n’obubi bosi obo bakendisyakola omw’iramya eyindi miungu.
19 “Neryo muhandike olwimbo olu n’erikangiriryalo Abaisraeli. Mubakangirirayelo* lutoke eribya lukabibukya amahano waghe.*
20 Ngendisyabya nabibingirya omo kihugho ekyo nalapa eriha abotata-kulu wabo, ekihugho ekikasendamo amasabu n’obuki, kandi bakendisyabya babirya n’eryughuta n’eribya ndeke,* bakendisyaramya eyindi miungu n’erikolerayo, kandi bakendisyanipokya n’eritendisikya endaghane yaghe.
21 Bakendisyabya babibana amaligho manene n’erihikirwa n’obuhanya bunene, olwimbo olu lukendisyabibukya amahano waghe,* kundi siritolere abana babo bakibirirwagho, kusangwa ninasi ebyo banzire erikola nibya n’embere nibingiraye omo kihugho ekyo nabirilapa eribaha.”
22 Neryo ekiro ekyo, Musa mwahandika olwimbo olo n’erikangiriryalo Abaisraeli.
23 Enyuma sy’aho, mwayira* Yosua, mughala wa Nuni, mo mukulu n’erimubwira ati: “Isiwubaha kandi ubye n’akaghala, kundi n’iwe ukendingirya Abaisraeli omo kihugho ekyo nalapa eribaha, kandi sinendisyakulekerania.”
24 Musa mwabya abibugha erihandika ebinywa byosi by’Emighambo eyo omo kitabu,
25 mwabwira Abalawi abakaheka erisanduku ry’endaghane ya Yehova ati:
26 “Mwimaye ekitabu kino ky’Emighambo, muhirekyo hakuhi n’erisanduku ry’endaghane ya Yehova oMungu wenyu. Mukendisyabya mukatswerwa erikwamana n’ebiri mukyo.*
27 Kundi ninasi ndeke-ndeke ngoko simulyowa kandi mulimo erighundu. Mwamabya imumwaghana eryowa Yehova inikine haghuma nenyu, bikendisyabya biti nabihola?
28 Munikuma-kumire abasyakulu bosi b’omo bihanda byenyu, n’abakomanda benyu, nitoke eribabwira ebinywa ebi. Kandi ngimaya olubula n’ekihugho mo bimiri* kubo.
29 Kundi ninasi ndeke-ndeke ngoko ngendisyabya nabihola, mukendisyakola ebitsibu, kandi mukendisyaleka erikwama enzira eyo nababwira niti mukwame. N’obuhanya bukendisyabahikira oko biro by’enduli, kundi mukendisyakola ebibi embere sya Yehova n’erimuhitania busana n’ebyo mukendisyakola.”
30 Neryo Musa mwasubirira omo binywa by’olwimbo olo embere sy’endeko yosi ye Israeli. Mwabya akasubirira mubyo eritsuka oko mwanzo erihika oko mwiso.
Amaelezo awehikwa
^ Kinywa kwa kinywa, “Sinangasyahuluka kutse eringira.”
^ kutse “ky’Ehibalalayi.”
^ Kinywa kwa kinywa, “milango y’emiyi.”
^ Kinywa kwa kinywa, “iwaghotsera n’abotata-kulu waghu.”
^ Kinywa kwa kinywa, “n’eribisabo obusu bwaghe.”
^ Kinywa kwa kinywa, “Muhirelo omo buno bwabo.”
^ Kutse “lutoke eribya mwimiri oko bandu be Israeli; lutoke eribya mutemwe oko bandu be Israeli.”
^ Kinywa kwa kinywa, “n’erineneha.”
^ Kutse “Lubye mwimiri okw’ibo; Lubye mutemwe okw’ibo.”
^ Kitokekene ni Mungu.
^ Kutse “Kikendibya mwimiri; Kikendibya mutemwe.”
^ Kutse “batemwe.”
