Eryibuka Ebihano 34:1-12
34 Neryo Musa mwalua omo ribanda eriri ng’embwarara erye Moabu, amerukira oko Kitwa kye Nebo, oko singyi ye Pisga, eyo omundu akalangirira e Yeriko. Neryo Yehova mwamukangania ekihugho kyosi, erilua e Gileadi erihika e Dani,
2 ekiharo kyosi kya Naftali, kya Efraimu, n’ekya Manase, ekihugho kyosi kya Yuda erihika oko ngetse* y’oko luhande lw’eyo ryuba rikalengera,
3 e Negebu, eribanda rye Yordani, eribanda rye Yeriko, omuyi owalimo emiti y’etende, erihika e Zoari,
4 Enyuma sy’aho, Yehova mwamubwira ati: “Ekyo kyo kihugho ekyo nalapa eriha Abrahamu, Isaka, na Yakobo, omughulu nabugha niti, ‘Ngendisyahakyo abana baghu.’ Namabikukanganiakyo, aliwe siwendingira mukyo.”
5 Enyuma sy’aho, Musa omughombe wa Yehova, mwaholera eyo omo kihugho kye Moabu, ngoko Yehova anabugha.
6 Mwamuta omo musya, omo kihugho kye Moabu, omusya owahererenie ne Bete-peori. Sihali omundu oyo wasi ahali eyisinda yiwe erihika na munabwire.
7 Musa mwahola iniawite emyaka 120. Ameso wiwe abya iniakinalangira ndeke, kandi Musa abya iniakine n’akaghala.
8 Abandu be Israeli mubalira Musa omo biro 30 omo ribanda eriri ng’embwarara rye Moabu. Enyuma sy’aho, ebiro by’erilira Musa n’ekiriro kiwe mubyahwa.
9 Yosua mughala wa Nuni abya aswiremo ekirimu ky’amenge, kundi Musa mwamuhirako ebyala biwe, neryo Abaisraeli mubatsuka erimuhulikirira n’erikola ngoko Yehova anabwira Musa.
10 Aliwe omo Israeli simwemwatabya omuminyereri oyuli nga Musa, oyo Yehova aminya busu kwa busu.
11 Mwakola emyatsi yosi y’obutoki n’ebitiko-tiko byosi ebyo Yehova amutuma ati ayakole e Misri, embere sya Farao n’abaghombe biwe bosi, n’ekihugho kiwe kyosi.
12 Musa mwakola ebyo omo byala by’amaka n’omo kaghala akakaswekaya embere sy’Abaisraeli bosi.
Amaelezo awehikwa
^ Ni bugha ambu, Engetse Nene, Engetse ye Mediterania.
