Eryibuka Ebihano 4:1-49
4 “Neryo Israeli, muhulikirire ebihano n’ebyalayiro ebyo ngabakangiriraya erikwama, mutoke eribyaho n’eringira omo kihugho ekyo Yehova oMungu w’abotata-kulu wenyu akendibaha mo kyenyu n’erimyakyo.
2 Isimwatomeka oko binywa ebyo ngababwira, kutse erilusya kubyo kw’ekighuma, mutoke erikwama ebyalayiro bya Yehova oMungu wenyu ebyo ngababwira.
3 “Ameso wenyu mwayilangirira ebyo Yehova akola busana n’omwatsi wa Baali we Peori. Yehova oMungu wenyu mwita obuli mundu oyo wabya omo kati-kati kenyu oyo wakwama Baali we Peori.
4 Aliwe inywe mukamakirira Yehova oMungu wenyu mukineho erihika na munabwire.
5 Nabiribakangirirya ebihano n’ebyalayiro, ngoko Yehova oMungu waghe anibwira, mutoke erikwamabyo omo kihugho ekyo mukendimya.
6 Mutolere imwakwamabyo ndeke-ndeke, kundi ekyo kikendisyaleka abandu abakendisyowa engulu y’ebyalayiro byosi ebyo ibalangira ngoko muli n’amenge n’ehakili. Bakendisyabugha bati, ‘Ekihanda kinene eki ni kihanda ky’abandu b’amenge n’ehakili.’
7 Kundi ni kihanda kyahi kinene ekiwite emiungu eyikabya iyine hakuhi nakyo ngoko Yehova oMungu wetu akabya iniane haghuma netu mughulu wosi-wosi ogho tukamubirikira?
8 Kandi ni kihanda kyahi kinene ekiwite ebihano n’ebyalayiro ebitunganene ng’Emighambo yosi eyi eyo namateka embere syenyu munabwire?
9 “Aliwe muyiteghaye n’eriyilandako ndeke,* mukasyibirirwa ebyo ameso wenyu abirilangira kandi bikasyalua omo mitima yenyu omo ngebe yenyu yosi. Kandi litolere imwabwirabyo abana benyu n’abitsikulu benyu.
10 Ekiro ekyo mwabya mwimene embere sya Yehova oMungu wenyu e Horebu, Yehova mwanibwira ati, ‘Unikuma-kumire abandu nitoke eribabwira ebinywa byaghe, kusudi bighe erinisagha omo biro byosi ebyo bakendisyabyaho oko kihugho, kandi batoke erikangirirya abana babo.’
11 “Neryo mumwaseghera hakuhi, mwamimana oko mwanzo-mwanzo w’ekitwa; ekitwa kyabya ikinemwakako omuliro erihika elubula;* muhabya n’omwirimya, ekitu, n’omwirimya munene.
12 Na Yehova mwatsuka erikania nenyu omulenge wiwe akaluira omo muliro. Mumwowa omulenge, aliwe mumutamulangira, omulenge musa wo mwanowa.
13 Kandi mwababwira endaghane yiwe, eyo ababwira ati musikaye, ni bugha ambu Emighambo Ikumi.* N’enyuma sy’aho, mwahandikayo oko bibambali bibiri by’amabwe.
14 Oko mughulu oyo, Yehova mwanibwira ati nibakangiriraye ebihano n’ebyalayiro ebyo litolere imwakwama omo kihugho ekyo mukendingiramo n’erimyakyo.
15 “Neryo kundi mumwatalangira omundu omughulu Yehova akanaya nenyu omulenge wiwe akaluira omo muliro e Horebu, muyilandeko kutsibu,*
16 mukasyakola muhanda omw’iyikokoterya esanamu yosi-yosi eyibatsire eyisosire kindu kyosi-kyosi, eyisosire omulume kutse omukali,
17 eyisosire enyama yosi-yosi y’oko kihugho kutse eyisosire enyunyu yosi-yosi eyikaghuluka omo kyanya,
18 eyisosire enyama yosi-yosi eyikayikura oko kitaka kutse eyisosire esamaki yosi-yosi eyiri omo maghetse eyikwa w’ekihugho.
19 N’omughulu mukasamalira elubula, neryo imwalangira eryuba, omughenda, n’esyongununu, ni bugha ambu ebindu byosi ebiri omo lubula, isimwatebibawa erikukamirabyo n’erikolerabyo. Yehova oMungu wenyu abirihabyo abandu bosi abali eyikwa w’olubula.
20 Aliwe inywe, muli bandu abo Yehova imaya n’erilusya omo riko ry’eriyeyukiryamo ekyuma, e Misri, mutoke eribya abandu biwe-biwe,* ngoko muli munabwire.
21 “Mumwaleka Yehova inianihitanako, neryo mwalapa ati siniendisoka olusi lwe Yordani kutse eringira omo kihugho ekyuwene, ekyo Yehova oMungu wenyu akabaha mo mwandu.
22 Kundi ngendiholera omo kihugho kino, sinendisoka e Yordani, aliwe inywe mukendisoka n’erimya ekihugho kino ekyuwene mo kyenyu.
23 Muyiteghaye, isimwibirirawa endaghane eyo Yehova oMungu wenyu akola haghuma nenyu. Kandi isimwayikolera esanamu eyibatsire, ekindu ekisosire ekindu kyosi-kyosi ekyo Yehova oMungu wenyu abiribaghania.
24 Kundi Yehova oMungu wenyu ni muliro owakatimaya, ni Mungu oyukanza iniaramibwa iye musa.
25 “Mukendisyabya mwabibuta abana n’abitsikulu, n’eribugha biro binene omo kihugho ekyo, neryo imwayighendya muhanda n’erikokotya esanamu eyibatsire y’ekindu kyosi-kyosi, mwamabisyakola ebituwene embere sya Yehova oMungu wenyu, neryo imwamuhitania,
26 namimya olubula n’ekihugho mo bimiri* embere syenyu munabwire ngoko mukendisyalw’imwahola n’erihwaho omo kihugho ekyo mukayimaya mwabisoka e Yordani. Simwendisyabugha biro binene omo kihugho ekyo. Mukendisyahwaho olosi.
27 Yehova akendisyabapanza-panzira omo bindi bihanda, abandu bake basa b’omw’inywe bo bakendisyasaka omo bihanda ebyo Yehova akendisyabatwalamo.
28 Eyo, mukendisyakolera emiungu y’emiti n’amabwe, eyo mundu akakokotaya, emiungu eyite yangalangira, eryowa, erirya, kutse eryowa ekikumbo.
29 “Mwamabisondya-sondya Yehova oMungu wenyu imune eyo, mwamabimusondya n’omutima wenyu wosi n’enafsi* yenyu yosi, oko kwenene imukendimubana.
30 Oko mwiso w’omughulu oyo, omughulu mukendisyabya mwabibana amaligho awakalire n’emyatsi yosi eyo yabibahikira, mukendisyasubira Yehova oMungu wenyu, n’erihulikirira omulenge wiwe.
31 Kundi Yehova oMungu wenyu ni Mungu oyukaghanyira kutsibu. Syendisyabalekerania, kandi syendisyababughaho, kandi syendisyibirirwa endaghane eyo alapira abotata-kulu wenyu ati akendisikyayo.
32 “Neryo lino mubulaye emyatsi nga yabya yiti kera, emyatsi eyalaba embere sy’omughulu wenyu eritsuka omughulu oMungu abumba omundu oko kihugho; musonda-sondaye emyatsi eritsuka oko mupaka ono w’olubula erihika oko ghundi mupaka w’olubula. Ekingaha n’eki kinekyatakoleka kutse tunetwatowa oko mwatsi mungaha n’oyu?
33 Hanehatabya abandu ababiryowa omulenge w’oMungu akasira omo muliro, neryo ibatahola ngoko mutalyahola?
34 Kutse oMungu ane atasonda eriyimirya abandu omo bandi bandu, omw’ibalengako omo myatsi y’obutoki, omo bitiko-tiko, omo malwa, omo byala by’amaka, omo kuboko kw’amaka,* n’omo myatsi eyikasaghisaya, ngoko Yehova oMungu wenyu abakolera e Misri imunalangire?
35 Mumwakanganibwa emyatsi eyo kusudi muminye ngoko Yehova y’oMungu w’ekwenene, sihali oghundi oyuli nga ye.
36 Mwabowisya omulenge wiwe erilua elubula busana n’eribakunga. Mwabakangania omuliro wiwe munene oko kihugho, kandi mumowa ebinywa biwe bikasira omo kati-kati k’omuliro.
37 “Kundi mwanza abotata-kulu wenyu n’erisombola abana babo, neryo mwabalusya e Misri omo kaghala kiwe kanene kandi iniane haghuma nenyu.
38 Mwalusya embere syenyu ebihanda binene-binene, kandi ebiwite akaghala kanene kubalenga, atoke eribingirya omo kihugho kyabo n’eribahakyo mo mwandu, ngoko biri munabwire.
39 Neryo muminye munabwire, kandi mubye imunasi ngoko Yehova y’oMungu w’ekwenene endata omo lubula n’eyikwa oko kihugho. Sihali oghundi oyuli nga ye.
40 Mutolere imwasikya ebihano n’emighambo yiwe eyo ninemubabwira munabwire, emyatsi itoke eribaghendera ndeke n’erighendera ndeke abana benyu, kusudi mubughe biro binene omo kihugho ekyo Yehova oMungu wenyu akabaha.”
41 Oko mughulu oyo, Musa mwasombola emiyi isatu oko luhande lw’eyo ryuba rikasira lwe Yordani,
42 kusudi omundu amita mulikyabo omw’itendiyiririra kandi isi bugha ambu alue iniamuponire, atoke eritibitira omo muyi mughuma y’emiyi eyo akasyahola.
43 Emiyi eyo y’eno: Bezeri, omuyi owali omo mbwarara eyiri omo ribanda, omuyi oyo abya w’Abarubeni; Ramoti, omuyi owali e Gileadi, omuyi oyo abya w’Abagadi; ne Golani, omuyi owali e Bashani, omuyi oyo abya w’Abamanase.
44 Eno y’Emighambo eyo Musa aha Abaisraeli.
45 Bino ni bibukyo, emighambo, n’ebyalayiro ebyo Musa aha Abaisraeli babilua e Misri,
46 omo kiharo kye Yordani, omo musya owali oko lundi luhande lwe Bete-peori, omo kihugho kya Sihoni, omwami w’Abaamori, oyo wabya ikere e Heshboni, oyo Musa n’Abaisraeli basinga babilua e Misri.
47 Mubimya ekihugho kiwe n’ekihugho kya Ogu, omwami we Bashani, abami babiri b’Abaamori ababya omo kiharo ky’oko luhande lw’eyo ryuba rikasira lwe Yordani,
48 eritsuka e Aroeri, eyiri oko musike w’Omusya* we Arnoni, eriyahika oko Kitwa kye Sioni, ni bugha ambu e Hermoni,
49 ne Araba yosi, eyiri omo kiharo ekiri oko luhande lw’eyo ryuba rikasira lwe Yordani, eriyahika oko Ngetse ye Araba,* oko mwanzo-mwanzo w’obwandaghala bwe Pisga.
Amaelezo awehikwa
^ Kutse “n’erilanda oko nafsi yenyu.”
^ Kinywa kwa kinywa, “erihika oko mutima w’olubula.”
^ Kinywa kwa kinywa, “Ebinywa Ikumi.”
^ Kutse “mulande oko nafsi yenyu ko kutsibu.”
^ Kutse “mwandu wiwe-wiwe.”
^ Kutse “batemwe.”
^ Ulebaye Amaana w’ebinywa.
^ Kinywa kwa kinywa, “okuboko okukakirye.”
^ Kutse “w’omusya owakumamo amaghetse.”
^ Ni bugha ambu, Engetse y’Omunyu, kutse Engetse Eyiholire.