Eryibuka Ebihano 5:1-33
5 Musa mwahindania Abaisraeli bosi, amababwira ati: “Inywe Baisraeli, muhulikirire ebihano n’ebyalayiro ebyo ngababwira munabwire. Mutolere imwighabyo n’erikwamabyo ndeke-ndeke.
2 Yehova oMungu wetu mwakola endaghane haghuma netu e Horebu.
3 Yehova mwatakola endaghane eyo n’abotata-kulu wetu, aliwe mwakolayo netu itwe bosi, itwe tukiriho munabwire.
4 Yehova mwakania nenyu busu kwa busu oko kitwa, omulenge wiwe abya akasira omo muliro.
5 Oko mughulu oyo, nabya ininimene omo kati-kati ka Yehova nenyu nitoke eribabwira ebinywa bya Yehova, kundi mwabya imwabirisagha busana n’omuliro, mwabya isimwangatoka erihetukira oko kitwa. Mwabugha ati:
6 “‘Ingye Yehova oMungu wenyu, oyo wabalusaya e Misri, omo nyumba y’obukobe.
7 Siritolere iwabya n’eyindi miungu ate in’ingye.
8 “‘Isiwayikokoteraya esanamu eyibatsire kutse erikokotya ekindu kyosi-kyosi ekisosire ekindu ekiri endata omo lubula, kutse ekiri eyikwa oko kihugho, kutse ekiri omo maghetse eyikwa oko kihugho.
9 Isighunamirabyo kutse eritsotsibwa erikolerabyo, kusangwa ingye Yehova oMungu waghu, niri Mungu oyukanza iniaramibwa iye musa, oyukaha abana b’amalipizi busana n’ekosa y’abobaba wabo, erihika oko kizazi* ky’akasatu n’eky’akani ky’abaniponire,
10 aliwe oyukakanganaya olwanzo oluteleghula oko kizazi* kye elfu moya ky’abanianzire n’abakakwama emighambo yaghe.
11 “‘Isiwakolesaya erina rya Yehova oMungu waghu omo nzira eyitatolere, kusangwa Yehova syangabula eriha amalipizi oyukakolesaya erina riwe omo nzira eyitatolere.
12 “‘Usikaye ekiro ky’Esabato kusudi kibye ikine kibuyirire, ngoko Yehova oMungu waghu akubwira.
13 Ukendisyabya ukakola emibiiri yaghu yosi omo biro 6,
14 aliwe ekiro kye 7 ni sabato ya Yehova oMungu waghu. Isiwakola omubiiri wosi-wosi, iwe kutse mughala waghu kutse mwali waghu, kutse omukobe waghu w’obulume kutse omukobe waghu w’obukali kutse enume yaghu y’ende, kutse epunda yaghu, kutse esyonyama syaghu sy’eritunga, kutse oyute Mwisraeli oyo wikere omo miyi* yenyu, kusudi omukobe waghu w’obulume n’omukobe waghu w’obukali aluhuke nga we.
15 Wibuke ngoko wabya mukobe omo kihugho kye Misri, kandi ngoko Yehova oMungu waghu mwakulusyayo omo byala biwe by’amaka n’omo kuboko kwiwe kw’amaka. Kyo kyaleka Yehova oMungu waghu iniakubwira ati usikaye ekiro kye Sabato.
16 “‘Ukenge baba waghu na mama waghu, ngoko Yehova oMungu waghu abirikubwira, utoke eribugha mughulu muli n’emyatsi yitoke erikughendera ndeke omo kihugho ekyo Yehova oMungu waghu akendikuha.
17 “‘Isiwita.
18 “‘Isiwasingira.
19 “‘Isiwiba.
20 “‘Isiwabugha amabehi omughulu ukimira mulikyenyu.
21 “‘Isiwayitsutsa omukali w’omulikyenyu. Kandi isiwayitsutsa enyumba y’omulikyenyu, kutse eririma riwe, kutse omukobe wiwe w’obulume, kutse omukobe wiwe w’obukali, kutse enume yiwe y’ende, kutse epunda yiwe, kutse ekindu kiwe kyosi-kyosi.’
22 “Emighambo* eyo, Yehova mwabwirayo endeko yenyu yosi oko kitwa. Omulenge wiwe abya akasira omo muliro, omo kitu, n’omo mwirimya munene; mwabughayo omo mulenge muli, kandi mwatatomeka ekindi kinywa oko binywa ebyo. Enyuma sy’aho, mwahandikabyo oko bibambali bibiri by’amabwe, neryo amambabyo.
23 “Aliwe mumwabya mwabinowa omulenge owabya akasira omo mwirimya omughulu ekitwa kyabya kikakako omuliro, abakulu bosi b’ebihanda byenyu n’abasyakulu mubasyakania naghe.
24 Neryo mumwabugha muti, ‘Yehova oMungu wetu abiritukangania olukengerwa lwiwe n’obukulu bwiwe. Kandi mutukowa omulenge wiwe akasira omo muliro. Munabwire, mutukalangira ngoko kwesi oMungu anganakania n’omundu, n’omundu oyo iniatahola.
25 Sitwanzire erihola, kundi omuliro munene oyu anganatubughaho. Twamabiendelea erihulikirira omulenge wa Yehova oMungu wetu, itukahola.
26 Hane hatabya omundu oyo wabiryowa omulenge w’oMungu oyuliho akabughira omo muliro nga twe, aliwe iniatahola?
27 Iwe useghere hakuhi utoke eryowa ebyosi ebyo Yehova oMungu wetu akendibugha, neryo n’iwe ukenditubwira ebyosi ebyo Yehova oMungu wetu akendikubwira, netu tukendihulikirira n’erikwamabyo.’
28 “Neryo Yehova mwowa ebinywa byosi ebyo mwanibwira, kandi Yehova mwanibwira ati, ‘Nabiryowa ebinywa ebyo abandu aba balyakubwira, ebyosi ebyo balyabugha byuwene.
29 Ngabalue n’omutima w’erinisagha biro byosi n’erikwama emighambo yaghe yosi, emyatsi yosi ilwendibaghendera ndeke, ibo n’abana babo kera na kera!
30 Uyababwire uti: “Musube omo mahema wenyu.”
31 Aliwe iwe ukendisighala hano haghuma naghe, neryo ngendikubwira emighambo yosi, ebihano byosi, n’ebyalayiro byosi ebyo ukendikangiriryabo, ebyo batolere ibakwama omo kihugho ekyo ngabaha mo kyabo.’
32 Neryo muyikase erikola ebyosi ebyo Yehova oMungu wenyu alyababwira. Isimwakitira oko luhande lw’amali kutse lw’amalembe.
33 Isimwalua omo nzira eyo Yehova oMungu wenyu abiribabwira ati mukwame, mutoke eribyaho, kandi emyatsi itoke eribaghendera ndeke, kandi mutoke eribugha biro binene omo kihugho ekyo mukendimya.
Amaelezo awehikwa
^ Kutse “lulengo.”
^ Kutse “lulengo.”
^ Kinywa kwa kinywa, “milango y’emiyi.”
^ Kinywa kwa kinywa, “Ebinywa.”
