Eryibuka Ebihano 6:1-25
6 “Eno y’emighambo, ebihano, n’ebyalayiro ebyo Yehova oMungu wenyu ahiraho busana n’eribakangirirya, mutoke erikwamabyo omughulu mukendisokera omo kihugho ekyo mukayimaya,
2 mutoke erisagha Yehova oMungu wenyu, n’erisikya ebyalayiro n’emighambo yiwe yosi eyo ngabaha, inywe, abana benyu n’abitsikulu benyu omo ngebe yenyu yosi, mutoke erisyabugha biro binene.
3 Inywe Baisraeli, mutolere imwahulikirirabyo n’erikwamabyo ndeke-ndeke, emyatsi yitoke eribaghendera ndeke kandi mutoke eribya banene omo kihugho ekikasendamo amasabu n’obuki, ngoko Yehova oMungu w’abotata-kulu wenyu abiribalagha.
4 “Hulikirira, Israeli, Yehova oMungu wetu ni Yehova mughuma.
5 Litolere iwanza Yehova oMungu waghu n’omutima waghu wosi, enafsi* yaghu yosi, n’akaghala* kaghu kosi.
6 Ebinywa ebyo ngakubwira munabwire, litolere ibyabya oko mutima waghu.
7 Litolere iwabya ukabwirabyo abana baghu kangyi-kangyi* n’eribakanirya kubyo omughulu wikere omo nyumba yaghu, omughulu ukalaba omo nzira, omughulu ukaghotsera, n’omughulu ukabuka.
8 Bibye ng’ekibukyo ekibohere oko byala byaghu, kandi ng’akakimba ako ukaboha oko mbumo* yaghu.
9 Uhandikebyo oko hidrema hy’emilango y’enyumba yaghu n’oko milango y’omuyi wenyu.
10 “Yehova oMungu wenyu akendibya abibingirya omo kihugho ekyo alapira abotata-kulu wenyu, Abrahamu, Isaka, na Yakobo ati akendibaha inywe, ekirimo emiyi minene-minene kandi eyuwene eyo mwatahimba,
11 amanyumba awaswiremo emihanda yosi y’ebindu ebyuwene ebyo mwatatunda, ebyuna by’amaghetse ebyo mwatatakula, amalima w’emizabibu agho mwatahera, n’emiti y’emizeituni eyo mwatahera, mukendisyabya mwabirya n’eryughuta,
12 muyiteghaye, mukasyibirirwa Yehova, oyo wabalusaya omo kihugho kye Misri, omo nyumba y’obukobe.
13 Yehova oMungu wenyu yo litolere imubaha, kandi iye yo ritolere imwakolera, n’omo rina riwe mo ritolere imwabya mukalapa.
14 Isimwakwama eyindi miungu, emiungu yosi-yosi y’abandu ababatimbireko,
15 Yehova oMungu wenyu oyuli omo kati-kati kenyu akasyabahitanako n’eribabughaho oko kihugho, kundi Yehova ni Mungu oyukanza ati iniaramibwa iye musa.
16 “Isimwalenga oko Yehova oMungu wenyu ngoko mwamulengako e Masa.
17 Mutolere imwakwama ndeke-ndeke emighambo ya Yehova oMungu wenyu, ebibukyo n’ebyalayiro biwe ebyo akababwira ati mukwame.
18 Litolere imwakola ebyuwene n’ebitunganene embere sya Yehova, emyatsi yitoke eribaghendera ndeke, kandi mutoke eringira n’erimya ekihugho ekyuwene, ekyo Yehova alapa eriha abotata-kulu wenyu,
19 omw’itibita oko syonzighu syenyu syosi silue embere syenyu, ngoko Yehova abalagha.
20 “Omo biro ebikasa, omughulu abana benyu bakendisyababulya bati, ‘Busanaki Yehova oMungu wetu mwabaha ebibukyo, ebyalayiro, n’emighambo?’
21 Mukendisyabasubirya muti, ‘Mutwabya bakobe ba Farao e Misri, aliwe Yehova mwatulusya e Misri omo byala biwe by’amaka.
22 Yehova mwabya akakola emyatsi minene y’obutoki n’ebitiko-tiko binene ebyaghalaya Abamisri, Farao, n’abosi b’omo nyumba yiwe. Mwakola ebyo itunalangire.
23 Kandi mwatulusyayo n’erituleta hano atoke erituha ekihugho ekyo, ngoko abya iniabirilapira abotata-kulu wetu.
24 Kandi Yehova mwatubwira ati tukwame ebyalayiro byosi ebyo n’erisagha Yehova oMungu wetu, emyatsi itoke eritughendera ndeke kandi tutoke eribyaho biro binene, ngoko tuli munabwire.
25 Kandi tukendighanzwa mo batunganene twamabiyikasa erikwama emighambo yosi eyo busana n’erikenga* Yehova oMungu wetu, ngoko atubwira.’
Amaelezo awehikwa
^ Ulebaye Amaana w’ebinywa.
^ Kutse “n’obutoki.”
^ Kutse “ukahirabyo omo mutima w’abana baghu.”
^ Kinywa kwa kinywa, “omo kati-kati k’ameso.”
^ Kinywa kwa kinywa, “embere sya.”