Eryibuka Ebihano 7:1-26
7 “Yehova oMungu waghu akendisyabya abikwikingirya omo kihugho ekyo ukasonda eringiramo n’erimyakyo, akendisyalusya embere syaghu ebihanda ebiswiremo abandu, ni bugha ambu Abahiti, Abagirgashi, Abaamori, Abakanana, Abaperizi, Abahivi, n’Abayebusi, ebihanda 7 ebiswiremo abandu kandi ebiri n’akaghala kubalenga.
2 Yehova oMungu waghu akendisyakuwatikya eribasinga, na kwenene ukendisyabasinga. Litolere iwitabo n’eribabughaho. Isiwakola endaghane nabo, kandi isiwakwirabo bulighe.
3 Isiwatahaya kubo kutse eritahibwa nabo. Isiwalighira abali baghu eritahibwa n’abana babo, kutse isiwatahiraya abaghala baghu b’abali babo.
4 Kundi bakendisyaleka abaghala baghu ibaleka erinikwama, neryo ibayakolera eyindi miungu; byamabibya bitya, Yehova iniakendikuhitanako n’erilw’iniakubughaho.
5 “Aliwe kino kyo litolere iwabakolera: Ukendisyahimbula ebiherero byabo, ukendisyatsutsanga esyonduyi syabo sibuyirire,* ukendisyaterya emiti yabo mibuyirire, n’eritimya esyosanamu syabo esibatsire.
6 Kundi uli kihanda kibuyirire kya Yehova Mungu waghu, kandi Yehova Mungu waghu abirikusombola omo kati-kati k’ebihanda byosi ebiri oko kihugho utoke eribya kihanda kiwe, ekindu kiwe-kiwe.*
7 “Si bugha ambu kundi wabya kihanda kinene kyo kyaleka Yehova iniakwanza n’erikusombola. Eribugha ekwenene, wabya kihanda kike kutsibu oko byosi.
8 Yehova mwakulusya e Misri omo byala biwe by’amaka kundi Yehova abya akwanzire, kandi busana n’erisikya ebyo alapira abotata-kulu waghu. Mwakola atya atoke erikulusya omo nyumba y’obukobe, atoke erikulusya omo byala bya Farao, omwami we Misri.
9 Unasi ndeke-ndeke ngoko Yehova oMungu waghu ni Mungu w’ekwenene, mutaleghula, oyukasikaya endaghane eyo akakola n’abandu abamwanzire n’abakasikaya emighambo yiwe, kandi oyukabakanganaya olwanzo oluteleghula erihika oko kizazi* kye 1 000.
10 Abamuponire akendisyalw’inialihabo omw’ibatoghotya. Akendisyalw’iniaha amalipizi abamuponire, akendisyalw’inialihabo.
11 Neryo uyikase erisikya emighambo, ebihano, n’ebyalayiro ebyo ngakuha munabwire, omw’ikwamabyo.
12 “Wamatendileka erihulikirira ebyalayiro ebyo, erikwamabyo, n’erisikyabyo, Yehova oMungu waghu iniakendisyasikya endaghane eyo akola naghu n’erikukangania olwanzo oluteleghula, ngoko alapira abotata-kulu waghu.
13 Akendisyakwanza, erikutsumula, n’erikuyira mo banene. Oko kwenene, akendisyakutsumula omw’ikuha abana banene,* omw’itsumula ebyalya ebyo ukeraya, omw’ikuha engano, edivai nyihya-nyihya, ebyana by’esyonde, n’ebyana by’esyombuli. Akendisyakutsumula omo kihugho ekyo alapira abotata-kulu waghu ati akendikuhakyo.
14 Ukendisyabya kihanda ekyabiritsumulwa kulenga ebihanda byosi. Omw’iwe simwendisyabya omulume kutse omukali oyutawite oko bana, n’esyonyama syaghu sisyendisyabya butsira byana.
15 Yehova akendisyakulusyako amakoni wosi, kandi syendisyakuletera amakoni wosi-wosi awakalire agho walolako e Misri. Aliwe akendisyaletaragho abosi abakuponire.
16 Ukendisyita* abandu bosi abo Yehova oMungu waghu akendisyahira omo byala byaghu. Isiwasyabakwira obulighe,* kandi isiwasyakolera emiungu yabo, kundi ekyo ikikendisyabya kitegho okw’iwe.
17 “Wamabisyayibwira omo mutima uti, ‘Ebihanda ebi ni binene kutulenga. Tunemwenditoka eritibita kubyo?’
18 Isiwasaghabyo. Utolere iwibuka ebyo Yehova oMungu waghu akolera Farao n’ekihugho kyosi kye Misri,
19 amalipizi awakalire agho wayilangirira omo meso waghu, emyatsi y’obutoki, ebitiko-tiko, ebyala by’amaka, n’okuboko kw’amaka, ebyo Yehova Mungu waghu akolesaya erikulusya e Misri. Ebyo byo Yehova oMungu waghu akendisyakolera abandu bosi abo ukasagha.
20 Yehova oMungu waghu akendisyaleka ibabunika mutima erihika omughulu abakendisyasighalira n’abakendisyakubisama bakendisyahwaho.
21 Isibakutitimanaya, kundi Yehova oMungu waghu, oMungu mukulu kandi oyukasaghisaya, ane haghuma naghu.
22 “Oko kwenene, Yehova oMungu waghu akendisyalusya ebihanda ebyo embere syaghu lyolo-lyolo. Syendisyakulighira eribugha by’oho luba-luba, esyonyama sy’omoli sikasyakanyirira n’erihira engebe yaghu y’omo hatari.
23 Yehova oMungu waghu akendisyahira ebihanda ebyo omo byala byaghu, neryo ukendisyasingabyo ndeke-ndeke, erihika omughulu ebyosi bikendisyahwaho.
24 Akendisyahira abami babo omo byala byaghu. Ukendisyabulirania amena wabo eyikwa w’olubula. Sihendisyabya oyukayihanda okw’iwe, erihika omughulu ukendisyababughaho.
25 Ukendisyatimya esyosanamu esibatsire sy’emiungu yabo. Isiwayitsutsa kutse erimya efeza* n’ehoro eyiri oko syosanamu esyo, kundi ebindu ebyo ibikendibya kitegho okw’iwe, kusangwa esyosanamu esyo ni kindu ekyo Yehova oMungu waghu aponire kutsibu.
26 Isiwingiraya ekindu ekikita esyonye omo nyumba yaghu, kundi naghu ighukendibya kindu ekitolere eritsandibwa ng’ekindu ekyo. Litolere iwapona kutsibu ekindu ekyo n’erikwakyo esyonye, kundi ni kindu ekitolere eritsandibwa.
Amaelezo awehikwa
^ Ulebaye Amaana w’ebinywa.
^ Kutse “ky’obughuli.”
^ Kutse “lulengo.”
^ Kinywa kwa kinywa, “akendisyatsumula amatunda w’enda yaghu.”
^ Kinywa kwa kiywa, “Ukendisyamera.”
^ Kinywa kwa kinywa, “ameso waghu isyasyakwirabo obulighe.”
^ Ni kindu ky’obughuli ekikalua omo kitaka.
