Eryibuka Ebihano 9:1-29
9 “Hulikirira, iwe Israeli, munabwire ukendisoka e Yordani n’eringira utoke erimya ekihugho ky’ebihanda binene-binene kandi ebiri n’amaka kukulenga, emiyi minene-minene kandi eyitimbireko esyombimbo nyiri-nyiri esihikire elubula,
2 ekihanda ekirimo abandu b’amaka kandi bali-bali, abaghala b’Abaanakimu obo wasi kandi abo wowa abandu bakabugha kubo bati, ‘Nindi yo wangayihanda oko baghala ba Anaki?’
3 Aliwe, litolere iwaminya munabwire ngoko Yehova oMungu waghu akendikubera embere ukasoka e Yordani. Iye ni muliro owakahisaya, akendibughaho abandu abo. Akendibayiramo abandu bule embere syenyu utoke eribatibitako luba n’eribita, ngoko Yehova abirikulagha.
4 “Yehova oMungu waghu akendisyabya abitibita oko bihanda ebyo bilue embere syaghu, isiwayibwira uti, ‘Yehova mwakaningiraya omo kihugho kino nitoke erimyakyo kundi niri mutunganene.’ Ko bite bitya. Yehova akatibita oko bihanda ebyo bilue embere syaghu busana n’obubi bwabyo.
5 Si bugha ambu ukingira omo kihugho kyabyo utoke erimyakyo kundi uli mutunganene kutse kundi uli n’omutima owuwene, aliwe Yehova oMungu waghu akalusaya ebihanda ebi embere syaghu kundi bikakola ebibi, kandi busana n’eriberererya ebinywa ebyo Yehova alapira abotata-kulu wenyu, Abrahamu, Isaka, na Yakobo.
6 Neryo uminye ngoko si bugha ambu Yehova akakuha ekihugho ekyo ekyuwene utoke erimyakyo kundi utunganene, kusangwa ulimo erighundu.
7 “Mwibuke ngoko mumwahitania Yehova oMungu wenyu omo mbwarara, isimwibirirawa ekyo n’ahake. Erilua ekiro mwalua omo kihugho kye Misri erihika omughulu mwahika hano, mukabya imunemughana obusondoli bwa Yehova.
8 Nibya n’esaa twabya e Horebu, mumwahitania Yehova. Yehova mwabahitanako kutsibu, amahika n’oko kika ky’eribugha ati akalw’iniababughaho.
9 Omughulu nahetukira oko kitwa eriyahabwa ebibambali by’amabwe, ebibambali by’amabwe by’endaghane eyo Yehova akola nenyu, munabugha oko kitwa kw’ebiro 40 omw’itungyi n’omo kiro. Omo biro byosi ebyo, nabya isinirirya akalyo kutse erinywa amaghetse.
10 Neryo Yehova mwaniha ebibambali bibiri by’amabwe, ebyo ahandikako omo munwe wiwe. Oko bibambali bibiri by’amabwe ebyo kwabya ebinywa byosi ebyo Yehova ababwira omughulu mulenge wiwe abya akasira omo muliro, ekiro ekyo mwabya muhindene oko kitwa.
11 Oko mwiso w’ebiro 40 ebyo, Yehova mwamba ebibambali bibiri by’amabwe, ebibambali by’amabwe by’endaghane.
12 Yehova mwanibwira ati, ‘Hangana, undaghale luba-luba, kundi abandu baghu abo ulyalusaya e Misri babiriyiwata kitya-kitya. Babirilw’ibaleka enzira eyo nababwira niti bakwame, babiriyikokoterya esanamu y’emetale eyo balyayeyukaya.’
13 Kandi Yehova mwanibwira ati, ‘Ngoko namalangira abandu aba, ni bandu b’erighundu.
14 Leka ngakole ekyo nanzire, ngendibabughaho n’eribulirania erina ryabo eyikwa w’olubula, kandi ngendikuyiramo ekihanda ky’amaka n’eky’abandu banene kubalenga.’
15 “Neryo munalua oko kitwa, namandaghala, ekitwa ekyo kyabya ikinemwakako omuliro, nabya ininahekire omo byala byaghe mo bibambali bibiri by’amabwe by’endaghane.
16 Neryo munalangira ngoko mwabirikolera Yehova oMungu wenyu y’erilolo. Mwabya imwabirikokotya ekyana ky’ende eky’emetale eyo balyayeyukaya, mwabya imwabirilw’imwaleka erikwama enzira eyo Yehova abugha ati mukwame.
17 Neryo munahamba kutsibu ebibambali bibiri by’amabwe ebyo, namaghusabyo ahisi omo byala byaghe bibiri, namatsutsangabyo imunalangire.
18 Neryo munahira obusu bwaghe oko kitaka embere sya Yehova omo biro 40 omw’itungyi n’omo kiro, ngoko nakola oho mbere. Mundalya akalyo kutse erinywa n’otughetse busana n’amalolo wosi ogho mwakola omw’ikola ebibi embere sya Yehova n’erimuhitania.
19 Munasagha kutsibu kundi Yehova abya iniabiribahitanako kutsibu n’erihika oko kika ky’eribugha ati akababughaho inywe bosi. Aliwe kandi oko mughulu oyo Yehova mwanihulikirira.
20 “Yehova mwahitana n’oko Haruni ko kutsibu, abya akasonda erimwita. Aliwe kandi oko mughulu oyo, munamulemba-lemba busana na Haruni.
21 Neryo munimya ekyana ky’ende ekyo, ekyaleka imwakola erilolo, namatimyakyo. Munaponda-pondakyo erihika oko kika kyamabya ng’olututu, neryo namaghusa olututu olo omo lusi olukalua oko kitwa.
22 “Kandi mumwahitania Yehova, e Tabera, e Masa, ne Kibrote-hataava.
23 Omughulu Yehova abatuma itune e Kadeshi-barnea, ati, ‘Muhetuke, mwimaye ekihugho ekyo ngendibaha, kandi mumutakwama ebyo Yehova oMungu wenyu ababwira. Mumutamwikirirya kandi mumutamusikya.
24 Eritsuka omughulu nabaminya, mukabya imunemughana erikwama obusondoli bwa Yehova.
25 “Neryo munabya ininahirire obusu bwaghe oko kitaka embere sya Yehova omo biro 40 omw’itungyi n’omo kiro. Munakola nitya kundi Yehova mwabugha ati akendibabughaho inywe bosi.
26 Munalemba-lemba Yehova niti, ‘Yehova, Omukama Mukulu oko Bosi, isiwita abandu baghu aba, ekindu kyaghu-kyaghu ekyo wakombola omo kaghala kaghu n’erikilusya e Misri omo byala byaghu by’amaka.
27 Wibuke abaghombe baghu Abrahamu, Isaka, na Yakobo. Isiwahira amalengekania waghu oko righundu, obubi, n’erilolo ry’abandu aba.
28 Wamitabo, abandu ab’omo kihugho ekyo wabalusayamo, ibanganabugha bati: “Yehova mwatatoka eribingirya omo kihugho ekyo abalagha. Kandi kundi abya iniabaponire, mwabalusyayo kundi abya anzire eribitira omo mbwarara.”
29 Kundi ni bandu baghu, ekindu kyaghu-kyaghu,* ekyo walusaya e Misri omo kaghala kaghu kanene n’omo kuboko kwaghu kw’amaka.’
Amaelezo awehikwa
^ Kutse “omwandu.”
