Esteri 9:1-32

CHINGULA

Erikinda ly’Abayahudi (1-19)
Ekiro kikulu ky’Epurimu kyamahirwaho (20-32)

9 Oko kiro kye 13 ky’omwisi we 12, ni bugha ambu, omwisi we Adari* omughulu ekinywa ky’omwami n’omughambo wiwe byabya bitolere eriberereribwa, ekiro esyonzighu sy’Abayahudi syabya n’amaha siti sikendikindabo, omwatsi mwabinduka. Abayahudi mubakinda ababya babaponire. ² Abayahudi mubayikuma-kumira haghuma omo miyi yabo, omo syongabiro* syosi sy’Omwami Ahasuero erihira ebyala oko bandu ababya bakasonda eribakola nabi. Kandi sihabya omundu oyo wangatoka erihangana n’erilwa nabo, kusangwa abandu b’ebihanda byosi babya ibabirikwa obuba busana n’Abayahudi. ³ N’abanyamwami bosi b’esyongabiro,* esyoseghu-seghu, abaguvernere, n’ababya bimaniri b’emibiiri y’omwami, mubawatikya Abayahudi, kusangwa babya bubahire Mordekayi. ⁴ Mordekayi abya iniabiribya n’amaka omo nyumba y’omwami* n’engulu y’erikumayira liwe muyatswangana omo syongabiro* syosi, kusangwa amaka wa Mordekayi abya inianemulola embere eryongera. ⁵ Abayahudi mubita esyonzighu syabo syosi omo muyali. Mubitabo n’erihwerekereryabo. Mubakolera ababya baponirebo ngoko banzire. ⁶ E Shushani* eyiri enyumba y’obwami,* Abayahudi mubita n’eriherya abalume 500. ⁷ Kandi mubita Parasanadata, Dalfoni, Aspata, ⁸ Porata, Adalia, Aridata, ⁹ Paramasta, Arisai, Aridai, na Vaizata, ¹⁰ abaghala 10 ba Hamani mughala wa Hamedata enzighu y’Abayahudi. Nikwa mubabya babitabo, mubataheka ekindu kyabo kyosi-kyosi. ¹¹ Ekiro ekyo mubabwira omwami emighanzo y’abitawa omo Shushani,* omuyi w’obutabali.* ¹² Omwami mwabwira Omughole Esteri ati: “E Shushani* omuyi w’obutabali* Abayahudi babiriita n’eribughaho abalume 500, n’abaghala 10 ba Hamani. Ukalengekanaya uti babiriita abandi bandu bangahi omo sindi ngabiro* sy’omwami? Neryo lino ukasabaki? Ukendihabwakyo. Kandi wanzire iwatasyakolerwa ekindi kyahi? Kikendikolwa.” ¹³ Esteri mwasubirya ati: “Kyamatsemesya omwami, Abayahudi abali e Shushani* balighirawe n’omungya kutya, erikola erikwamana n’ekyalayiro kya munabwire; n’abaghala 10 ba Hamani bahanikawe oko muti.” ¹⁴ Neryo omwami mwahamula ati ekyo kikolawe. Ekyalayiro mukyatulaghanibwa omo Shushani,* n’abaghala 10 ba Hamani mubahanikwa. ¹⁵ Kandi Abayahudi ababya e Shushani* mubayihindania haghuma oko kiro kye 14 ky’omwisi we Adari n’eriita abalume 300 omo Shushani;* aliwe mubataheka ekindu kyabo kyosi-kyosi. ¹⁶ Abandi Bayahudi ababya omo syongabiro* sy’omwami, mubayihindania haghuma erilwira oko buyingo* bwabo. Mubayilusyako esyonzighu syabo. Mubita abandu 75 000 ab’oko bandu ababya baponirebo. Nikwa mubataheka ekindu kyabo kyosi-kyosi. ¹⁷ Ekyo kyabya oko kiro kye 13 ky’omwisi we Adari; n’oko kiro kye 14 mubaluhuka. Kandi mubayirakyo mo kiro ky’erirya n’eky’eriyitsemesya. ¹⁸ Abayahudi ababya e Shushani* mubayihindania haghuma oko kiro kye 13 n’oko kiro kye 14. N’oko kiro kye 15 mubaluhuka n’eriyirakyo mo kiro ky’erirya n’eky’eriyitsemesya. ¹⁹ Ekyo kyo kyaleka Abayahudi ababya bikere omo miyi y’omo biharo by’endambi-ndambi, ibayira ekiro kye 14 eky’omwisi we Adari mo kiro ky’eriyitsemesya n’erirya, ekiro ky’efete, n’omughulu w’eritumiranamo omaghabo w’akalyo. ²⁰ Mordekayi mwahandika emyatsi yosi eyi, kandi mwatumira Abayahudi bosi ababya omo syongabiro* syosi sy’Omwami Ahasuero b’esyobaruha; esyongabiro sya hali n’esya hakuhi. ²¹ Mwahanabo ati babye bakibuka ekiro kye 14 n’ekye 15 ky’omwisi we Adari obuli mwaka. ²² Kusangwa oko biro ebyo Abayahudi mubaluhuka oko syonzighu syabo; n’oko mwisi oyo obulighe bwabo mubwabinduka butseme, n’ekiriro kyabo mukyabya kiro ky’eritsanga. Babya batolere eryibukabyo mo biro by’efete n’eby’eriyitsemesya n’omughulu w’eritumiranamo amaghabo w’akalyo, n’eriha abera b’ebihembo. ²³ N’Abayahudi mubaligha erilolya embere ekiro kikulu ekyo bamatsukisya eki, n’erikola ebyo Mordekayi ahandikirabo. ²⁴ Kusangwa Hamani mughala wa Hamedata Omuagagi, enzighu y’Abayahudi bosi abya iniabiriya embita busana n’Abayahudi eribughabo. Kandi abya iniabirighusa Epuri, ni bugha ambu obukanga, busana n’erihandabukya emitima y’Abayahudi n’eribughaboho. ²⁵ Nikwa omughulu Esteri asa embere sy’omwami, omwami mwahandikisya erihamula erikabugha riti: “Embita nyibi yiwe busana n’Abayuhudi, isube oko mutwe wiwe.” Neryo mubamuhanika oko muti, iye haghuma n’abaghala biwe. ²⁶ Kyo kyaleka ibahula ebiro ebyo mo Purimu erikwamana n’erina rye Puri.* Neryo busana n’ebyosi ebi ebihandikire omo baruha eyi, n’ebyo bayilangirira ebilebirye omwatsi oyu, n’ebyahikirabo, n’ebyabya ibyabirihikirabo, ²⁷ Abayahudi mubalahirya ngoko ibo n’abana babo n’abosi abayighunga okw’ibo, bakendibya bakibuka ebiro bibiri ebi butsira buhaka, n’erikola ebyosi ebihandikire ebilebirye ebiro ebi, oko ndambi yabyo eyabirihirwaho obuli mwaka. ²⁸ Omo bizazi* byosi, lyabya litolere ebiro ebi ibyibukwa n’erisikibwa omo buli kihanda, omo buli ngabiro, n’omo buli muyi. N’abayahudi sibabya batolere erileka eryibuka ebiro by’Epurimu ebi, n’abitsikulu babo sibabya batolere erileka eryibuka ebiro bikulu ebi. ²⁹ Neryo Omughole Esteri mwali wa Abihaili na Mordekayi Omuyahudi, mubahandika n’ehamuli yosi erihira ekikumo oko baruha y’akabiri eyilebirye Epurimu. ³⁰ Mwatuma esyobaruha oko Bayahudi bosi ababya omo syongabiro* 127 esy’omo butabali bwa Ahasuero omo binywa by’obuholo n’eby’ekwenene, ³¹ erihira ekikumo oko mwatsi w’eryibuka ebiro by’Epurimu oko mughulu owabirihirwaho, ngoko Mordekayi Omuyahudi n’Omughole Esteri babalayira bati babye bakakola, kandi ngoko banalahiraya ibibene-bene n’olubuto lwabo bati bakendibya bakakola; erihirako n’erikola amafungo n’erisaba kutsibu. ³² N’ekihano kya Esteri mukyahamya emyatsi eyi eyilebirye Epurimu; kandi mukyahandikwa omo kitabu.