Esyonyimbo 10:1-18
ל [Lamed]
10 Yehova busanaki ukimana hali?
Busanaki ukayibisa omo mughulu w’obulighe kwehi?
2 Omubi omo miyiheko yiwe akakwamirira oyutawite omuwatikya,Nikwa akendisyahambwa omo mbita siwe.
3 Kusangwa omubi akayihalamba busana n’esyongumbu siwe sy’obuhemo,*Kandi akatsumula ow’omururu;*נ [Nun]Syalikenga Yehova.
4 Omw’iyiheka liwe, omubi syalikola obusosotya;Ekine omo bulengekania bwiwe ry’eribugha ati: “Sihali oMungu.”
5 Omughulu wosi akabana endundi omo syonzira siwe,Nikwa syangaminya eritswera lyaghu;Akapokaya* esyonzighu siwe syosi.
6 Akayibwira omo mutima wiwe ati:
“Sinendisyasuka-sukanibwa* n’ahake;Ekizazi* oko kindi sinendisyalola oko buhanya.”
פ [Pe]
7 Obuno bwiwe boswiremo eritakira, amabehi, n’erihaya;Oko lulimi lwiwe kuli ebitsibu n’ebikaghalaya.
8 Akalimbiraya hakuhi n’emiyi;Iniane ahabisamire akita oyuteko olubanza.*
ע [Ayin]
Ameso wiwe akasonda-sonda omuhanya.
9 Akalindirira ahabisamire ng’endale* eyiri aho ikabundama,*Akalindirira erihamba oyutawite obuwatikyaAkahamba oyutawite buwatikya, akakura obutimba bwiwe n’eribohabo.
10 Omundu oyo akabunangawa n’erikindwa,Omuhanya akawa omo byala biwe.*
11 Akayibwira omo mutima ati: “OMungu abiribirirwa.
Abirikebera ahandi.
Syalangire.”
ק [Qoph]
12 Yehova, uhangane, Mungu, usumbe ebyala byaghu.
Sighubirirawe abatawite buwatikya.
13 Busanaki omubi syalikenga oMungu?
Akayibwira omo mutima ati: “Siwendibugha uti niriko olubunza.”
ר [Resh]
14 Aliwe, iwe ukalangira obuhanya n’amaligho.
Ukatungerera, n’erilebya eky’erikola.
Omuhanya akayiketera iwe;Ukawatikaya oyutawite ise.*
ש [Shin]
15 Ubune okuboko k’omubi n’okw’omundu mutya-mutya,Neryo omughulu ukasonda obubi bwiwe,Isiwangatasyasungabo.
16 Yehova ni Mwami kera na kera.
Ebihanda byabirilusibwa omo kihugho.
ת [Taw]
17 Nikwa Yehova ukendisyahulikirira erisaba ry’abandu bolo.
Ukendisyaleka emitima yabo iyasika kandi ukendisyateghabo amatwi.
18 Abatawite abise n’abakanuba, ukandisyakolerabo omo bulingirirania,Neryo omundu buyira* oyukahola isyasyubahisayabo.
Amaelezo awehikwa
^ Kutse “esyongumbu sy’enafsi yiwe.”
^ Kutse alinga, “ow’omururu akayitsumula.”
^ Kutse “akasolaya.”
^ Kutse “Sinendisyaghuna-ghuna ”
^ Kutse “olulengo.”
^ Kutse “omusango.”
^ Kutse “esimba.”
^ Kutse “omo kisaka.”
^ Kutse “omo nyala sy’amaka.”
^ Kutse “engubi.”
^ Kinywa kwa kinywa, “omundu w’ekitaka.”