Esyonyimbo 102:1-28
Omusabe w’oyukanubibawa omughulu abirihandabuka* neryo iniabwira Yehova ebyosi ebikamuhanga-hangaya.
102 Yehova wowe omusabe waghe;Erilaka ryaghe ry’erisaba obuwatikya rikuhikeko.
2 Omughulu niri omo bulighe isiwanibisa obusu bwaghu.
Uniteghe* okutu;Unisubiraye luba omughulu ngakulakira.
3 Kusangwa ebiro byaghe bikabulirana ng’omuki,Amakuha waghe abirihya n’erikina ng’eriko.
4 Omutima waghe abirihumbwa ng’ebiti, n’eryuma,Kusangwa ngibirirawa erirya akalyo kaghe
5 Busana n’erisimba ryaghe rinene,Amakuha waghe akamakirira oko mubiri waghe.
6 Nisosire emwari y’omo mbwarara;Niri ng’akabukulu kake omo bisambukalirya.
7 Ngabula otughotseri;*Niri ng’akanyunyu akali ikikene oko lutwe lw’enyumba.
8 Omo musibo wosi esyonzighu syaghe sikanitsuma.
Abakanisekereraya* bakakolesaya erina lyaghe mo kitsumi.
9 Ngalya eribu mo kalyo,*Ebyo nganywa bitulungenemo emisonia,
10 Busana n’erihitana lyaghu n’erikapikira lyaghu,Kusangwa muwanisumbira endata busana n’erinighusa.
11 Ebiro byaghe biri ng’ekitsutsu ekikabulirana,*Ngahongerana ng’ebiti.
12 Aliwe Yehova, uliho kera na kera,N’erikumayira* lyaghu rikendisyabyaho omo bizazi* byosi.
13 Oko kwenene ukendisyahangana n’erikwira e Sioni y’obulighe,Kusangwa ye ndambi y’erimukangania olukogho lwaghu;Endambi eyitolere yabirihika.
14 Kusangwa abaghombe baghu bakatsemera amabwe wayoNibya banzire n’olututu lwayo.
15 Ebihanda bikendisyubaha erina lya Yehova,N’abami bosi b’ekihugho bakendisyubaha olukengerwa lwaghu.
16 Kusangwa Yehova akendisyasyahimba e Sioni;Akendisyahuluka omo lukengerwa lwiwe.
17 Akendisyategha okutu oko musabe w’abali omo bwagha;Syendisyapokya omusabe wabo.
18 Ebi bihandikire busana n’ekizazi* ekikasa,Ekihanda ky’abandu ekite kyabyaho* kitoke eripipa Yah.
19 Kusangwa akalebaya erilua ah’endata hiwe ahabuyirire,Yehova akasamalira ekihugho iniane elubula,
20 Atoke eryowa erisimba ly’oyuli omo muliki,N’eribohola ababiritswerwa oluholo,
21 Erina lya Yehova litoke eritulaghanibwa e SioniN’olukengerwa lwiwe e Yerusalema,
22 Omughulu ebitunga by’abandu n’amamiBakendisyahindana haghuma erikolera Yehova.
23 Akanisaghula amaka waghe ebiro isibiri byaghonera;Akayira ebiro byaghe mo bikuhi.
24 Munabugha niti: “Mungu waghe,Isiwatwira engebe yaghe omo kati-kati,*Iwe oyo emyaka yaghu ikabyaho omo bizazi* byosi.
25 Muwahiraho esyofondasyo sy’ekihugho kera-kera,N’ekyanya ni mubiiri w’ebyala byaghu.
26 Bikendisyahwaho, aliwe iwe ukendisyabya ighuneho;Ebyosi bikendisyakula ng’olukimba.
Ukendisyabindulabyo ng’olukimba, nabyo bikendisyalaba.
27 Aliwe iwe uli ngoko ukanabya, n’emyaka yaghu siyendisyahwa n’ahake.
28 Abana b’abaghombe baghu bakendisyikala mbolere,N’olubuto lwabo lukendisyabyaho mughulu wosi embere syaghu.”
Amaelezo awehikwa
^ Kutse “omughulu abirihwamo akaghala; omughulu abirilembera.”
^ Kutse “uname, neryo uhulikirire.”
^ Kutse alinga, “niri mubondu kandi nileghetsene.”
^ Kutse “abakanihemulikanaya.”
^ Kutse “mo mukati.”
^ Kutse “ekitsutsu ekikayikakaya.”
^ Kutse “erina.” Kinywa kwa kinywa, “eryibukwa.”
^ Kutse “esyondengo.”
^ Kutse “busana n’olulengo.”
^ Kinywa kwa kinywa, “ekite kyahangyikwa.”
^ Kutse “isiwanibughaho isindinabya musyakulu.”
^ Kutse “esyondengo.”
