Esyonyimbo 104:1-35
104 Muleke nipipe* Yehova.
Yehova Mungu waghe, uli mukulu kutsibu.
Wambite olukengerwa* n’erighamba.
2 Uyiswikire ekyakakala ng’olukimba;Ukasesa ekyanya ng’olukimba lw’ehema.
3 Ahimbire ebisingiti by’ebyumba biwe by’endata omo maghetse mw’endata,*Akayira ebitu mo ngurubani* yiwe y’amalwa,Inianemughenda oko bipupa by’erihunga.
4 Akayira abamalaika biwe mo birimu,Akayira abaghombe biwe mo muliro owakatimaya.
5 Abirisingyika ekihugho oko syofondasyo syakyo;Sikyendisyasegheribwa* n’ahake oko mwanya wakyo kera na kera.
6 Muwaswikakyo omo mitobero y’amaghetse ng’olukimba.
Amaghetse abya oko bitwa.
7 Omw’ihaya lyaghu mwatibita,Omo mulenge w’omulumo waghu mwatibita akahandabuka omo buba.
8 —Ebitwa mubyiruka n’emisya muyandaghala—
Omo mwanya ogho wahiriraby’oho.
9 Muwahirira w’oho omupaka ogho ate angalabako,Neryo isyasyasyaswika ekihugho.
10 Akatuma esyonyusi omo misya;*Sikasenda omo kati-kati k’ebitwa.
11 Sikaha amaghetse esyonyama syosi sy’omoli esiri omo kisuki;Esyopunda sy’omoli sikabughira enyota yasyo y’aho.
12 Esyonyunyu sy’omo kyanya sikere endata oko syonyusi;Sikimbira omo biti bingyi.
13 Ukaha ebitwa by’amaghetse erilua omo byumba byaghu by’endata.
Ekihugho kikughuta amatunda w’emibiiri yaghu.
14 Akalasaya ebiti busana n’ebihangulo.
N’esyonyinyi busana n’abandu,Akalyo katoke eryera oko kihugho.
15 N’edivai eyikaleka omutima w’omundu iniatsema,Amaghuta awakaleka obusu ibwakoma,N’akalyo* akakawatikaya omutima w’omundu oyukahola.
16 Emiti ya Yehova yikughuta,Emierezi ye Lebanoni eyo ahera,
17 Eyo esyonyunyu sikahimba esyonyutu.
Obwikalo bw’ekirobi buli omo miti y’ekilaghu.
18 Ebitwa biri-biri ni by’esyombene sy’omoli;Ewibari* ikasaghira omo bibwe.*
19 Mwahiraho omughenda busana n’erikangania esyondambi esyabirihirwaho;Eryuba ryasi ndeke-ndeke endambi y’erilengerako.
20 Ukaleta omwirimya ibwira,Omughulu esyonyama syosi sy’omoli esy’omo musitu sikatimba-timba.
21 Emyusuko y’esyondale* ikaruruma itoke eribana ekyo yangahambaKandi ikasondaya akalyo kayo erilua oko Mungu.
22 Eryuba rikabya ryahuluka yikayighendera,N’eriyaghotsera omo byuna byayo.
23 Omundu akaya oko mubiiri wiwe,N’erikola omubiiri w’olunza erihika omw’igholo.
24 Yehova, emibiiri yaghu ka ni mingyi!
Muwahangyika ebyosi omo menge.
Ekihugho kyoswiremo ebyo wahangyika.
25 Hali engetse, ni nene kandi ni nyiri,Yoswiremo obutaghanzika bw’ebihangyikwa ebiriho, ebike-bike n’ebinene-binene.
26 Amato akalaba kuyo,Kandi muli n’Eleviatani,* eyo wahangyika ibye itsangiramo.
27 Ebihangyikwa byosi bikakulindiriraErihabyo akalyo kabyo oko ndambi eyitolere.
28 Bikakuma-kuma ekyo ukahabyo,Omughulu ukasanzula ebyala byaghu, bikughuta ebindu bibuya.
29 Wamabibisa obusu bwaghu, bikahandabuka.
Wamabilusyaho ekirimu* kyabyo, bikahola n’erisuba oko lututu.
30 Wamabituma ekirimu* kyaghu bikahangyikawa,Neryo ukayira ekihugho* mo kihya-kihya.
31 Olukengerwa lwa Yehova lukendisyabyaho kera na kera.
Yehova akendisyatsemera emibiiri yiwe.
32 Akatungerera ekihugho, nakyo ikyatitimana;Akatula oko bitwa, nabyo ibyatumbamo omuki.
33 Ngendisyimbira Yehova omo engebe yaghe yosi;Ngendisyimbira* oMungu waghe y’esyonyimbo sy’eripipa omughulu wosi niriho.
34 Amalengekania waghe amutsemesaye.*
Ngendisyayisyandira omo Yehova.
35 Abakoli b’amalolo bakendisyabulirana oko kihugho,N’ababi sibendisyasyabyaho.
Muleke nipipe* Yehova. Mupipe Yah!*
Amaelezo awehikwa
^ Kutse “enafsi yaghe ipipe.”
^ Kutse “obusike.”
^ Kinywa kwa kinywa, “omo maghetse.”
^ Kutse “omutoka w’amalwa owakakurawa; eshario.”
^ Kutse “sikyendisyaghuna-ghuna (sikyendisyaghololoka.)”
^ Kutse “emisya eyikumamo amaghetse.”
^ Kutse “omukati.”
^ Kutse “ebihalange.”
^ Kutse “ekiyama.”
^ Kutse “esimba; emisuko y’esyondale eyiriko ebyeya oko bikya.”
^ Ulebaye Amaana w’ebinywa.
^ Kutse “omuka; akaghala k’engebe.”
^ Kutse “omuka; akaghala k’engebe.”
^ Kutse “obusu bw’ekihugho; obughali bw’ekihugho.”
^ Kutse “ngendisyatunga akasimo.”
^ Kutse alinga, “erimulengekaniako ryaghe libye erikatsemesaya.”
^ Kutse “enafsi yaghe ipipe.”
^ Kutse “Aleluyah.” Yah ni kikuhi ky’erina Yehova.
