Esyonyimbo 105:1-45
-
Emikolere y’obutaleghula eyo Yehova akakolera abandu biwe
105 Muhe Yehova y’ewasingya, mulakire erina liwe,Muminyikalaye emibiiri yiwe omo kati-kati k’ebitunga by’abandu!
2 Mumwimbire,* mumwimbire esyonyimbo sy’eripipa,Mughaniraye* oko mibiiri yiwe yosi y’eriswekya.
3 Muyihalambire erina riwe eribuyirire.
Emitima y’abakasonda-sonda Yehova itseme.
4 Musonda-sondaye Yehova n’amaka wiwe.
Musonda-sondaye obusu bwiwe* butsira eryumbya.
5 Mwibuke emibiiri yiwe y’eriswekera eyo abirikola,Ebitiko-tiko biwe n’eritswera liwe,
6 Inywe lubuto* lw’omughombe wiwe ye Abrahamu,Inywe baghala ba Yakobo, abasombolwa biwe.
7 Iye ni Yehova Mungu wetu.
Eritswera liwe ritswangene omo kihugho.
8 Akibuka endaghane yiwe kera na kera,Akibuka endaghane eyo akola,* oko bizazi* 1 000,
9 Akibuka endaghane eyo akola na Abrahamu,Erilapa* eryo alapira Isaka,
10 Eyo ahamula busana na YakoboN’eya kera na kera busana na Israeli,
11 Ati, “Ngendisyakuha ekihugho kye KananaEribya righabo ly’omwandu waghu.”
12 Eki mukyabya omughulu babya ibakine bake,Inga, ibakine bake kutsibu, kandi ibakine babunga omo kihugho.
13 Mubatimba-timba omo bihanda, ekindi oko kindi,Ibakalua omo bwami obu, ibaya omo bundi bwami.*
14 Mwatalighira omundu wosi-wosi akaghalyabo,Nikwa mwahayira abami busana nabo,
15 Ati, “Isimwatula oko bandu baghe abahirirweko amaghuta,N’abaminyereri baghe isimwabakolera omwatsi wosi-wosi mubi.”
16 Mwabirikira enzala yamabya omo kihugho;Mwakinga aho babya bakalusya omukati.*
17 Mwatuma omundu embere syaboYe Yozefu, oyo waghulibawa eribya mukobe.
18 Mubaboha* ebisando biwe omo minyororo;*Ebikya biwe mubyahirwa omo byuma*
19 Erihika omughulu ekinywa kiwe kyabererera,Ekinywa kya Yehova kyo kyamweraya.
20 Omwami mwalayira ati aboholawe,Omutabali w’ebitunga by’abandu mwamuha obwiranda.
21 Mwamuyira mo mukulu oko nyumba yiwe,Omutabali oko bindu biwe byosi,
22 Eribya n’ehamuli oko* banyamwami biwe ngoko anzireN’erikangirirya amenge abasyakulu biwe.
23 Neryo Israeli mwasa e Misri,Na Yakobo mwabya mubunga omo kihugho kya Hamu.
24 OMungu mwakanyirirya abandu biwe;Mwayirabo mo b’amaka kwilaba esyonzighu syabo,
25 Abo aleka emitima yabo ibinduke eripona abandu biwe,Eriya embita y’erilwa n’abaghombe biwe.
26 Mwatuma omughombe wiwe ye Musa,Na Haruni, oyo asombola.
27 Mubakola ebiminyikalo biwe omo kati-kati kabo,Ebitiko-tiko biwe omo kihugho kya Hamu.
28 Mwatuma omwirimya n’ekihugho mukyabya mwirimya;Mubatayisamambula oko binywa biwe.
29 Mwahindula amaghetse wabo mo musasiN’eriita esyosamaki syabo.
30 Ekihugho kyabo mukyusulamo ebikere,Nibya n’omo byumba by’obwami.
31 Mwahamula ebisuki* ati bibambire ekihugho kyaboN’ehihuka ehiri ng’emistike* omo biharo byabo byosi.
32 Mwabindula embula yabo mo matsuku*N’erituma ehirabyo* omo kihugho kyabo.
33 Mwahunza emiriki yabo y’emizabibu n’emiti yabo y’emitiniN’eribunzungula emiti y’omo kiharo kyabo.
34 Mwabugha ati esyongyike sibambire ekihugho,Esyongyike silere-silere esitawite mighanzo.
35 Musyapepya emyaka yosi omo kihugho,Musyapepya ebikalasa oko kitaka.
36 Neryo mwahunza obuli kambere omo kihugho kyabo,Enzuko y’amaka wabo w’eributa.
37 Mwahulukya abandu biwe ibane n’efeza* n’ehoro;Muhatabya n’ekighuma ky’oko bihanda biwe ekyatwikala.
38 E Misri muyatsema omughulu abandu baghenda,Kusangwa obuba bwa Israeli* mubwahika kubo.
39 Mwasanza ekitu ky’eribisa abandu biweN’omuliro w’erikoleryabo omo kiro.
40 Mubasaba, neryo mwaleta esyongwali;Mwabya akughutyabo omukati owakalua elubula.
41 Mwakingula olukuka, amaghetse amaluamo;Amaghetse mwasenda omo mbwarara ng’olusi.
42 Kusangwa mwibuka erilagha riwe eribuyirire eryo alagha omughombe wiwe ye Abrahamu
43 Neryo mwalusyayo abandu biwe ibanemutsema,Abasombolwa biwe ibanemusumba emilenge y’obutseme.
44 Mwahabo ebihugho by’ebihanda;Mubasighalya ebyo ebindi bitunga by’abandu byanubira,
45 Batoke erisikya erihamula liweN’erikwama emighambo yiwe.
Mupipe Yah!*
Amaelezo awehikwa
^ Kutse “mutunge akasimo.”
^ Kutse alinga, “mukanaye oko.”
^ Kutse “aho ali.”
^ Kinywa kwa kinywa, “mbuto.”
^ Kutse “omo syondengo.”
^ Kinywa kwa kinywa, “ekinywa ekyo alayira.”
^ Kutse “erilahirya.”
^ Kutse “omo kindi kitunga ky’abandu.”
^ Kinywa kwa kinywa, “Mwabuna obuli muti w’omukati.” Alinga eryahula emiti eyabya ikakolesibwa eribika omukati.
^ Kinywa kwa kinywa, “mubamwaghalya.”
^ Kutse “enafsi yiwe muyaya omo kyuma.”
^ Kutse “amahulula.”
^ Kinywa kwa kinywa, “eriboha.”
^ Alinga ni bisuki ebikaluma ng’ebighuba.
^ Kutse “ehikundo.” Ehikundo ehi ni hihuka hye Misri ehikaluma ng’emistike.
^ Kutse “amatwa.”
^ Kutse “ebirimi by’omuliro.”
^ Ni kindu ky’obughuli ekikalua omo kitaka.
^ Kinywa kwa kinywa, “bwabo.”
^ Kutse “Aleluyah.” Yah ni kikuhi ky’erina Yehova.
