Esyonyimbo 106:1-48
106 Mupipe Yah!*
Muhe Yehova y’ewasingya kusangwa ni mubuya;Olwanzo lwiwe oluteleghula ni lwa kera na kera!
2 Nindi yo wangatula ndeke emibiiri y’amaka ya YehovaKutse nindi yo wangatulaghania emibiiri yiwe yosi eyitolere eripipwa?
3 Obutseme buli oko bakakola omo bulingirirania,Abakakola ekibuya mughulu wosi.
4 Yehova, unyibuke, omughulu ukakanganaya abandu baghu b’olukogho.*
Unilandeko omo mibiiri yaghu y’erilamya,
5 Nitoke eritsemera obubuya obo ukakanganaya abasombolwa baghu,Nitoke eritsema haghuma n’ekihanda kyaghu,Nitoke eriyihalambira erikupipa haghuma n’omwandu waghu.
6 Twabirihalya ngoko abotata-kulu wetu bahalaya;Twabirikola muhanda; twabiriyighendya muhanda.
7 E Misri, abotata-kulu wetu mubataminya amaana* w’emibiiri yaghu y’eriswekya.
Mubatibuka olwanzo lwaghu lunene oluteleghula,Nikwa mubayisamambula hakuhi n’engetse, Engetse y’Engula.
8 Aliwe mwalamyabo busana n’erina liwe,Amaka wiwe atoke eriminywa.
9 Mwahayira Engetse y’Engula, nayo muyuma;Mwalabyabo omo mitobero yayo ibabya nga bakalaba omo mbwarara;*
10 Mwalamyabo oko byala by’oyuponireboN’erilusyabo omo byala by’enzighu yabo.
11 Amaghetse mwaswika esyonzighu syabo;Muhatabya n’oyukabala.*
12 Neryo mubikirirya endaghane yiwe;Mubatsuka eriimba esyonyimbo sy’erimupipa.
13 Nikwa mubalw’ibibirirwa ekyo akola;Mubatalindirira erihano riwe.
14 Omo mbwarara, mubakwamirira esyongumbu syabo sy’eriyitsomana ibo basa;Mubalenga oko Mungu omo mbwarara.
15 Mwahabo ekyo basaba,Aliwe enyuma sy’aho, mwahunzabo omo bukoni obwaleka iboloba.*
16 Omo kambi, mubatsura MusaMubatsura na Haruni omubuyirire wa Yehova.
17 Neryo ekitaka mukyayitula kyamamera DataniMukyaswika n’ababya bahindene haghuma na Abiramu.
18 Omuliro mwaghulumira omo ndeko yabo;Ekirimi mukyahisya ababi.
19 Mubakokotya ekyana ky’ende e HorebuN’eryunamira esanamu y’ekyuma;*
20 Mubahingania olukengerwa lwagheN’ekisosekanio ky’enume y’ende eyikalya ebiti.
21 Mubibirirwa oMungu, Omulamya wabo,Oyo wakola emibiiri y’amaka e Misri,
22 Emibiiri y’eriswekera omo kihugho kya Hamu,Emibiiri eyikubahisaya oko Ngetse y’Engula.
23 Abya iniakisiya iniabugha ati bahwerekereribawe,Aliwe Musa omusombolwa wiwe mwamulemba-lemba*Atoke erikakirya obuhitane bwiwe bw’eribabughaho.
24 Neryo mubapona ekihugho ekyo, ekikayitsutsawa;Mubatikirirya endaghane yiwe.
25 Mubataleka eriyilungumula omo mahema wabo;Mubatahulikirira omulenge wa Yehova.
26 Neryo mwasumba ebyala biwe amalapa busana naboNgoko akendisyitirabo* omo mbwarara;
27 Ngoko akendisyaleka abana babo ibawa omo kati-kati k’ebihanda,Kandi ngoko akendisyapanza-panzirabo omo bihugho.
28 Neryo mubatsuka eriramya* Baali we Peori,N’erirya oko bikahererawa abaholi.*
29 Mubamwendako omwagha* omo mikolere yabo,Neryo ekihunzo mukyahuluka omo kati-kati kabo.
30 Nikwa omughulu Finehasi ahangana n’erikola omwatsi mulebe,Ekihunzo mukyumbya.
31 Neryo mwaghanzirwa ekyo mo kitunganeneOmo bizazi* byosi kera na kera.
32 Mubamwendako omwagha* oko maghetse we Meriba,*Neryo emyatsi muyaghendera Musa yo muhanda busana nabo.
33 Mubaleka ekirimu kiwe ikyaghalirwa,Neryo mwabugha kitya-kitya omo minywa yiwe.
34 Mubatahwerekererya ebihandaNgoko Yehova alayirabo.
35 Nikwa mubayitulungania n’ebihandaN’eritsuka erikwama* esyonzira syabo.
36 Mubataleka erikolera esyosanamu syabo,N’ekyo mukyabya kitegho okw’ibo.
37 Ibakaherera abana babo b’obulumeN’abana babo b’obukali oko syombinga.
38 Mubataleka eryuta omusasi owateko lubanza,Omusasi w’abana babo b’obulume n’ab’obukaliAbo babya bakaherera oko syosanamu sye Kanana,Neryo ekihugho mukyatsanda busana n’eryuta omusasi.
39 Mubabya abat’erire busana n’emibiiri yabo.
Mubakola obumbalaka bw’obunya-kirimu omo mikolere yabo.
40 Neryo erihitana lya Yehova mulyaghulumira oko bandu biwe,Neryo mwahika oko kika ky’eripona omwandu wiwe.
41 Mwahirabo omo byala by’ebihanda ngendo-ngendoAbabaponire batabale kubo.
42 Esyonzighu syabo musyanubyabo,Musyatabala kubo omo butoki* bwabo.
43 Iniakabasabula ngendo nyingyi,Aliwe ibakayisamambula n’eribya batowa,Neryo ibakayirawa mo bahisi busana n’ekibi kyabo.
44 Aliwe iniakalangira obuligho bwaboN’eryowa emilake yabo y’erisaba obuwatikya.
45 Iniakibuka endaghane yiwe busana nabo,Neryo iniakakwa obulighe* akakunwa n’olwanzo lwiwe lunene* oluteleghula.
46 Inyakaleka ababiribayira mo banyewaIbabakwira obulighe.
47 Yehova Mungu wetu, utulamaye,Utukume-kume erilua omo bihandaTutoke eriha erina lyaghu eribuyirire ry’ewasingyaN’eribana obutseme omw’ikupipa.*
48 Yehova, oMungu wa Israeli, apipaweErihika kera na kera.
Abandu bosi babughe bati, “Amina!”
Mupipe Yah!*
Amaelezo awehikwa
^ Kutse “Aleluyah.” Yah ni kikuhi ky’erina Yehova.
^ Kutse “obubuya.”
^ Kutse “mubatalangira obughuli bwe.”
^ Kutse “erirungu.”
^ Kutse “oyo wasaka.”
^ Kutse “esyonafsi syabo isyoloba.”
^ Kutse “esanamu y’erinunia; eyisumba.”
^ Kinywa kwa kinywa, “mwimana ahatulawa embere siwe.”
^ Kutse “akendisyaleka ibawa.”
^ Ni bugha ambu, amahere awakahererawa abandu abaholire kutse emiungu eyitawite engebe.
^ Kutse “mubamakirira.”
^ Kutse “mubamupuma; mubamukara.”
^ Kutse “esyondengo.”
^ Kutse “mubamupuma; mubamukara.”
^ Kikamaanisaya “Erilwa omo binywa; Erineghena.
^ Kutse “n’eritsuka erigha.”
^ Kinywa kwa kinywa, “ebyala.”
^ Kutse “iniakayikubaya b’omo.”
^ Kutse “olutswaghire.”
^ Kutse “eriyisyandira omw’ipipa lyaghu.”
^ Kutse “Aleluyah.” Yah ni kikuhi ky’erina Yehova.
