Esyonyimbo 139:1-24
Oko musondoli. Olwa Daudi. Omuziki.
139 Yehova, wabirinitsopolya ndeke, kandi unyasi.
2 Unasi omughulu ng’ikala n’omughulu ngahangana.
Ukaminya amalengekania waghe erilua hali.
3 Ukanitungerera* omughulu ngaghenda n’omughulu ngaghotsera;Wasi esyonzira syaghe syosi.
4 Yehova, embere oko lulimi lwaghe kubye ekinywa,Ukabya iwabiriminyakyo ndeke-ndeke.
5 Ukanitimbako, embere n’enyuma;Kandi ukanihirako ebyala byaghu.
6 Amenge ng’ayo ali endata oko buyiteghererya* bwaghe.
Ali endata kutsibu okw’ingye,* sinangatoka erihika kugho.
7 Nangayibisa hayi oko kirimu kyaghu,Kandi nangatibita hayi ngasagha obusu bwaghu?
8 Namabibugha niti ngahetukira elubula, ingendikweyayo,Kandi namasesa engyingo yaghe omw’Isinda,* lebaya! n’eyo uneyo.
9 Namaghuluka omo bipupa by’emitsangeEriyikala oko ngetse eyiri hali,
10 Nibya n’eyo ebyala byaghu ibikendinisondolaN’ebyala byaghu by’amali ibikendiniwatirira.
11 Namabibugha niti: “Oko kwenene omwirimya akendinibisa!”
Neryo omwirimya w’ekiro owanitimbireko iniakendibya kyakakala.
12 Okw’iwe n’omwirimya syangabya mwirimya,Nikwa ekiro ikikendibya ng’eritungyi;Okw’iwe omwirimya n’ekyakakala ni bighuma.
13 Kusangwa muwakokotya esyombiko syaghe;Muwanibisa* omo nda ya mama waghe.
14 Erilangira ngoko nibumbirwe omo nzira eyikubahisaya n’eyikaswekaya kikaleka inakupipa.
Emibiiri yaghu ni y’eriswekya,Ekyo nasikyo* ndeke.
15 Amakuha waghe mwatabiswa okw’iweOmughulu nabumbawa omo bubiso-biso,Ininemukula* omo nda ya mama waghe.
16 Ameso waghu nibya mwanilangira inine omo nda ya mama waghe;Ebitsuko byaghe byosi byabya bihandikire omo kitabu kyaghuErikwamana n’ebiro byabumbawa,Nibya isihali habya n’ekitsuko n’ekighuma.
17 Neryo okw’ingye, amalengekania waghu ni w’obughuli bunene!
Mungu, syangaghanzika, ni mangyi kutsibu!
18 Namalenga erighanzagho, ni mangyi kwilaba omuseghe.
Ngabuka, inikine naghu.*
19 Mungu, nga unalyatita ababi!
Neryo abawite omutima w’obwiti* ibakendiniheghukalako.
20 Abakakubughako muhanda erikwamana n’amalengekania wabo mabi,*Ibo ni nzighu syaghu abakatsanga omo rina lyaghu.
21 Yehova, siniponire abakuponire,N’erikwa nye abakayisamambula okw’iwe kwehi?
22 Niponirebo kutsibu;Ngalangirabo mo nzighu syaghe.
23 Mungu, unitsopolaye, uminye omutima waghe.
Unikoleraye, uminye amalengekania waghe awakanihanga-hangaya.*
24 Ulebaye nga sinirimo enzira yosi-yosi nyibi,Kandi unisondole omo nzira eyitawite nduli.*
Amaelezo awehikwa
^ Kinywa kwa kinywa, “ukanilenga.”
^ Kutse “okw’ingye ni w’eriswekera kutsibu.”
^ Kutse “ni manene okw’ingye, sinangatoka erilengagho.”
^ Kutse “Esheoli,” ni bugha ambu, eyisinda y’abandu bosi.” Ulebaye Amaana w’ebinywa.
^ Kutse alinga, “muwaniluka haghuma; muwanitsutsikania.”
^ Kutse “enafsi yaghe yasikyo.”
^ Kinywa kwa kinywa, “ininemutsutsikanibwa omo kitaka mo hali.”
^ Kutse alinga, “ngendibya inikinaghanzagho.”
^ Kutse “abaliko olubanza lw’omusasi.”
^ Kutse “ibanawite emyatsi mibi eyo bakalandamirira.”
^ Kutse “awakaleka initatulera.”
^ Kutse “kera na kera.”
