Esyonyimbo 18:1-50
Oko musondoli. Olwimbo lwa Daudi omughombe wa Yehova oyo wimbira Yehova olwimbo olu ekiro Yehova amusabula omo byala by’esyonzighu siwe syosi, n’omo byala bya Sauli. Mwabugha ati:
18 Yehova, nikwanzire iwe maka waghe.
2 Yehova ni ribwe ryaghe n’ahakongotere haghe n’Oyukanilamaya.
OMungu waghe ni lukuka lwaghe olo ngasaghirako,Engabo yaghe n’erihembe* ryaghe ry’omulamo,*Obusayiro* bwaghe obusikire.
3 Ngalakira Yehova, oyutolere eripipwa,Neryo ngendilamibwa oko syonzighu syaghe.
4 Ebikoba by’oluholo mubyanitimbako;Abandu batya-batya abali ng’eribwagha ry’amaghetse mubanyubahisya.
5 Ebikoba by’Eyisinda* mubyanitimbako;Ebitegho by’oluholo mubyanibambira.
6 Omo malighe waghe munalakira Yehova,Munabera erilakira oMungu waghe ngamusaba obuwatikya.
Mwowa omulenge waghe iniane omo hekalu yiwe,N’erilaka ryaghe ry’erisaba obuwatikya muryahika omo matwi wiwe.
7 Neryo ekihugho mukyatsuka erisuka-sukana n’erititimana;Esyofondasyo sy’ebitwa musyatitimanaKandi mubyatenga-tengana kundi abya iniabirihitanibwa.
8 Omuki mweruka akalua omo mihuli yiwe,N’omo buno bwiwe mumwalua omuliro owakahisaya;Amakala awakaka mwaka erilua okw’iye.
9 Akandaghala, mwaleka ekyanya ikyayilinga,N’omwirimya w’enyahinda abya eyikwa w’ebisando biwe.
10 Mwasa akaghuluka inyane oko mukerubi.
Mwakimira ahisi ho luba-luba oko bipupa by’ekirimu.*
11 Neryo mwayiswika omwirimya,Amaghetse awalimo omwirimya,N’ebitu binene kutsibu mubyamutimbako ng’ehema.
12 Amatsuku* n’amakala awakaka mwalaba omo bituErilua oko kyakakala ekyabya embere siwe.
13 Neryo Yehova mwatsuka eribugha ng’obutuku omo kyanya,Ow’endata kutsibu mw’owisya omulenge wiweHaghuma n’amatsuku* n’amakala awakaka.
14 Mwalasa emisoha* yiwe amapanza-panza esyonzighu syaghe;Mwaghusa ehirabyo hiwe amahirabo omw’ibulungana.
15 Ekitaka ekikalabako esyonyusi* mukyalangirika;Yehova, busana n’erihaya lyaghu,Busana n’omuka owakalua omo mihuli yaghu,Esyofondasyo sy’ekitaka musyalangirika.
16 Iniane endata mwakakya ebyala;Mwanihamba n’erinilusya omo mutobero w’amaghetse.
17 Mwanilamya oko nzighu yaghe y’amaka,Mwanilamya oko baniponire, abawite akaghala kanene kunilenga.
18 Mubalwa naghe omughulu nabya omo bulighe,Aliwe Yehova mwaniwatikya.
19 Mwanihulukya amanitwala omo mwanya owali buholo;*Mwanilamya kundi mwanitsemera.
20 Yehova akanihemba erikwamana n’eritunganene ryaghe;Akaniliha kundi ebyala byaghe sibiriko olubanza.*
21 Kusangwa nabirikwama esyonzira sya Yehova,Kandi sinitakola erilolo, ry’erileka erikwama oMungu waghe.
22 Eritswera riwe ryosi riri embere syaghe;Sinendisyapokya ebihano biwe.
23 Ngendiyighendya butsira lubanza embere siwe,Kandi ngendisyayiteya oko bibi.
24 Yehova anihembe erikwamana n’eritunganene ryaghe;Kusangwa ebyala byaghe sibiriko olubanza embere siwe.
25 Oko mutaleghula ukakola omo butaleghula,N’oko mundu oyuteko lubanza ukakanganaya ngoko sighuliko lubanza;
26 Oko b’erire ukayikanganaya ko w’erire,Nikwa oko bahengemire ukakola omo mayele.
27 Kusangwa ukalamaya abandu ab’ahisi*Nikwa abakayihaghata* ukakimayabo.
28 Kusangwa Yehova n’iwe ukakaya etala yaghe,OMungu waghe akanikoleraya omo mwirimya.
29 Omo buwatikya bwaghu nanganalwa n’omulondo w’abanyeyi;Omo buwatikya bw’oMungu nanganahetuka oko luhimbo.
30 Enzira y’oMungu w’ekwenene ihika-hikene;Ekinywa kya Yehova ky’erire.
Iye ni ngabo oko bosi abakamusaghirako.
31 Kusangwa oMungu nindi ate Yehova?
N’olukuka lwetu nindi ate oMungu wetu?
32 OMungu w’ekwenene yukanyambalaya akaghala,Kandi akenditunganania enzira yaghe.
33 Akanguhaya ebisando byaghe ng’eby’engabi;Akaleka inimana omo myanya eyiyisumbire.
34 Akabegheraya ebyala byaghe bitoke erilwa;Ebyala byaghe byanganalinga obuta bw’ekwivre.*
35 Ukamba engabo yaghu y’omulamo,Ebyala byaghu by’amali bikaniwatikaya,N’eriyikehya lyaghu rikanihamaya.*
36 Ukanenehaya aho ngalaba;Ebisando* byaghe sibyenditendera.
37 Ngendisyakwamirira esyonzighu syaghe n’erihambasyo;Sinendisyasubula sitesyahwerekereribwa.
38 Ngendisyahinoleryasyo erihika oko kika sisyendisyasyahangana;Sikendisyawa omo bisando byaghe.
39 Ukendisyamba akaghala k’erilwa;Esyonzighu syaghe ukendisyaleka isyawa embere syaghe.
40 Ukendisyaleka esyonzighu syaghe isyatibita sikanisaghaKandi ngendisyabughaho* abaniponire.
41 Bakalaka bakasaba obuwatikya aliwe sihali oyowangabawatikya;Nibya bakalakira Yehova aliwe syangasubiryabo.
42 Ngendisyaswabo ibabya ng’olututu olo erihunga rikaghulukaya;Ngendisyaghusabo ng’ebyondo omo syonzira.
43 Ukendisyanilwirako oko bandu abakasonda-sondaya amakosa w’abandu.
Ukendisyaniyira mo mukulu w’ebihanda.
Ekihanda ekyo nitabya nyasi kikendisyanikolera.
44 Engulu nyisa ikendisyaleka ibanyowa;Ab’ehandi bakendisyunama embere syaghe busana n’obuba.
45 Ab’ehandi bakendisyayibula mo mutima;*Bakendisyasa ibanemutitimana erilua omo myanya yabo eyikongotere.
46 Yehova aliho! Olukuka lwaghe lupipawe!
OMungu oyukanilamaya ahalambawe.
47 OMungu w’ekwenene yukanikisiraya,Akaleka ebihanda ibyayolobeka embere syaghe.*
48 Akanilamaya oko syonzighu syaghe esitsurumire;Ukanisumba, inabya endata oko bakalwa naghe,Ukanilamaya oko byala by’omutsururu.
49 Yehova, busana n’ekyo ngendikupipa omo kati-kati k’ebihanda,Ngendimbira erina ryaghu esyonyimbo sy’eripipa.*
50 Akakola emibiiri minene-minene y’erilamya* busana n’omwami wiweAkakanganaya omundu wiwe oyuhirirweko amaghuta olwanzo oluteleghulaAkakanganayalo Daudi n’olubuto* lwiwe kera na kera.
Amaelezo awehikwa
^ Ulebaye Amaana w’ebinywa.
^ Kutse “Omusabuli waghe w’amaka.”
^ Kutse “ah’endata; ahasikire.”
^ Kutse “Esheoli,” ni bugha ambu, eyisinda y’abandu bosi. Ulebaye Amaana w’ebinywa.
^ Kutse “erihunga.”
^ Kutse “amatwa.”
^ Kutse “amatwa.”
^ Kutse “emishale.”
^ Kutse “emighende y’amaghetse.”
^ Kutse “owalimo ebyumba.”
^ Kinywa kwa kinywa, “byerire.”
^ Kutse “abahanya.”
^ Kinywa kwa kinywa, “ab’ameso awakayihaghata.”
^ Kutse “mulinga.”
^ Kutse “rikaleka inabya w’olukengerwa.”
^ Kutse “ehikongulo.”
^ Kutse “ukendisyamba omughongo w’esyonzighu syaghe.”
^ Kutse “bakendisyasendekerera.”
^ Kutse “akanighonderaya ebihanda.”
^ Kutse “ngendisyatunga akasimo.”
^ Kutse “erikinda rinene.”
^ Kinywa kwa kinywa, “embuto.”
