Esyonyimbo 19:1-14
Oko musondoli. Omuziki wa Daudi.
19 Olubula lukatulaghanaya olukengerwa lw’oMungu;Ekyanya kikatulaghanaya emibiiri y’ebyala biwe.
2 Omusibo oko ghundi musibo, bikabughaya,N’obuli kiro omo kiro, bikabisula amenge.
3 Sibiwite omulenge, kandi sibiribugha ebinywa;Omulenge wabyo syalyowika.
4 Nikwa omulenge* wabyo abiryowika omo kihugho kyosi,N’omulaghe wabyo erihika oko nduli-nduli sy’ekihugho ekikerweko.*
Abirihandira eryuba ly’ehema omo kyanya;
5 Liri ng’iba w’omuheruki oyukahuluka erilua omo kyumba ky’obuheruki;Liri ng’omulume w’amaka oyukatibita omo nzira yiwe.
6 Likahuluka erilua oko nduli nguma y’ekyanya,Iryatimba erihika oko yindi nduli;Kandi sihali ekikabisama ekihuhania kyalyo.
7 Emighambo ya Yehova ihika-hikene, ikasubaya akaghala.
Ekibukyo kya Yehova ni ky’eriyiketerwa, kikaleka oyutasiki inyayira amenge.
8 Erilayira lya Yehova litunganene, likaleka omutima inyatsanga;Ebyalayiro bya Yehova byerire, bikaleka ameso inyakolerya.
9 Eryubaha Yehova lyerire, likabyaho kera na kera.
Eritswera lya Yehova ni ly’ekwenene, eryosi litunganene.
10 Ni by’obughuli kwilaba ehoro,Kwilaba ehoro nyingyi eyuwene,*Kandi bisihire kwilaba obuki, obuki obukatoghonga erilua omo kisese.*
11 Erilabirabyo, omughombe waghu abirikungwa;Erikwamabyo, likaleta endundi nene.
12 Nindi yo wangayiteghererya amakosa?
Unyahule mo oyuteko lubanza oko makosa agho nitasi.
13 Kandi unikakiraye ingye mughombe waghu, sinikole emibiiri y’eriyitswatsika;Isiwaleka ikanitabalako.
Neryo naghe, ingendiluyirirana,Kandi isinendibyako olubanza lw’amalolo awakala-kalire.*
14 Ebinywa by’obuno bwaghe n’amalengekania w’omutima wagheBikutsemesaye Yehova, Olukuka lwaghe, n’Omulamya waghe.
Amaelezo awehikwa
^ Kutse “ekamba y’eripimamo.”
^ Kutse “ekitaka.”
^ Kutse “ehoro ey’erire.”
^ Kutse “ekihembo; ekisisi.”
^ Kutse “amalolo mangyi.”