Esyonyimbo 25:1-22
Olwa Daudi.
ʹא [Aleph]
25 Yehova, n’iwe niyiketere.*
ב [Beth]
2 Mungu waghe, n’iwe ngayiketera;Isiwaleka ngahemulwa.
Isiwaleka esyonzighu syaghe sikayisyandira busana n’amaligho waghe.
ג [Gimel]
3 Oko kwenene, sihali oyukakuhirako amaha oyukendisyahemulwa,Aliwe abakaghoberaya abandi isihali ekikaleka bo bakendisyahemuka.
ד [Daleth]
4 Yehova, uniminyisaye esyonzira syaghu;Unikangiriraye esyonzira syaghu.
ה [He]
5 Unitokesaye nilendere omo kwenene kandi unikangiriraye,Kusangwa uli Mungu w’omulamo waghe.
ו [Waw]
N’iwe ngahirako amaha omo musibo wosi.
ז [Zayin]
6 Yehova wibuke obughanyiri bwaghu n’olwanzo lwaghu oluteleghula,Ebyo wabirikangania ebiro byosi.*
ח [Heth]
7 Yehova, isiwibuka ebibi by’obulwana bwaghe, n’amalolo waghe.
Unyibuke erikwamana n’olwanzo lwaghu oluteleghula,Busana n’obubuya bwaghu.
ט [Teth]
8 Yehova atunganene kandi ni mubuya.
Kikaleka inyakangirirya abakola-nabi enzira eyitolere.
י [Yod]
9 Akendisyasondola abolo erikola ekitunganene,*Kandi akendisyakangirirya abolo enzira yiwe.
כ [Kaph]
10 Oko bosi abakasikaya endaghane ya Yehova n’ebibukyo biwe,Esyonzira siwe syosi sisirileghula kandi ni lwanzo oluteleghula.
ל [Lamed]
11 Yehova, busana n’erina lyaghu,Ughanyire erilolo lyaghe, nomo line rinene.
מ [Mem]
12 Omundu oyukubaha Yehova nindi?
Akendisyamukangirirya ebilebirye enzira eyo atolere eriyisogha.
נ [Nun]
13 Akendisyayilangirira ebibuya,N’abana* biwe bakendisyasighalya ekihugho.
ס [Samekh]
14 Yehova ni mwira kundu w’abakamubaha,Kandi akaminyisayabo endaghane yiwe.
ע [Ayin]
15 Mughulu wosi ngahira ameso waghe oko Yehova,Kusangwa akendisyabohola ebisando byaghe ebyabirihambwa omo butimba.
פ [Pe]
16 Nisamalire n’erinikangania olukogho,Kusangwa indi ingyuwene kandi siniwite akaghala.
צ [Tsade]
17 Amaghaniryo w’omutima waghe abirikanyirira;Unilusaye omo buhanya bwaghe.
ר [Resh]
18 Ulangire amaghali waghe n’obuhanya bwaghe,Kandi ughanyire ebibi byaghe byosi.
19 Ulangire ngoko esyonzighu syaghe ni nyingyiKandi ngoko baniponire luhanya-hanya.
ש [Shin]
20 Uteghaye engebe* yaghe kandi unisabule.
Uniteghaye oko sisoni kusangwa iwe busayiro bwaghe.
ת [Taw]
21 Obutaleghula n’erihika-hikana biniteghaye,Kusangwa n’iwe ngahirako amaha.
22 Mungu ulamaye* e Israeli oko malighe wayo wosi.
Amaelezo awehikwa
^ Kinywa kwa kinywa, “niwe ngabindukira.”
^ Kutse “ebyo utula ukakangania eritsuka kera.”
^ Kinywa kwa kinywa “omw’itswera.”
^ Kinywa kwa kinywa, “olubuto.”
^ Kutse “enafsi yaghe.”
^ Kinywa kwa kinywa, “utongolaye.”
