Esyonyimbo 30:1-12
-
Ekiriro kyamabinduka mo butseme
-
Olukogho lw’oMungu ni lw’omo ngebe yosi (5)
-
Olwimbo lw’erikingula enyumba. Omuziki wa Daudi.
30 Yehova ngendikuhalamba, kusangwa wabirinihamya;*Mughutaleka esyonzighu syaghe sikatsema busana naghe.
2 Yehova Mungu waghe, munakulakira ngakusaba obuwatikya, naghu muwanilamya.
3 Yehova, wabirinisumba* erilua omo Yisinda.*
Wabirileka inabya inineho, wabirileka initatoghera omo kyuna.*
4 Mwimbire* Yehova y’esyonyimbo sy’eripipa, inywe bataleghula biwe,Muhe erina* liwe eribuyirire ly’ewasingya;
5 Kusangwa erihitana liwe oko mundu rikabya ly’akatambi kake buyira,Aliwe eribya omo lukogho* lwiwe, ni ly’omo ngebe yosi.
Omw’igholo hanganabya ekiriro, nikwa engyakya, hakabya obwogho bw’obutseme.
6 Omughulu nabya nitekene, munabugha niti:
“Sinendisyasuka-sukanibwa.”*
7 Yehova, omughulu wabya ukanikangya olukogho* lwaghu, muwaleka inasika ng’ekitwa.
Nikwa muwabya wabisa obusu bwaghu, munubaha.
8 Yehova, n’iwe nabya ngalakira butsira eriluha;Kandi Yehova, iwe nabya ngalirira niti unikanganaye olukogho.
9 Hali endundi yahi namabihola,* namabindaghalira omo kyuna?*
Olututu ilunemwendikupipa? Ilunemwendisyakania oko butaleghula bwaghu?
10 Yehova, unyowe, kandi unikanganaye olukogho.
Yehova ubye muwatikya waghe.
11 Wabiribindula ekiriro kyaghe mo masata w’obutseme;Wabirinilusya olukimba lw’esaki,* neryo wabirinyambalya obutseme,
12 Neryo inatoka* erikupipa omo lwimbo n’eritendibya bukutu.
Yehova Mungu waghe, ngendisyakupipa erihika kera na kera.
Amaelezo awehikwa
^ Kutse “wabirinikura.”
^ Kutse “wabirisumba enafsi yaghe.”
^ Kutse “Esheoli,” ni bugha ambu, eyisinda y’abandu bosi. Ulebaye Amaana w’ebinywa.
^ Kutse “eyisinda.”
^ Kutse “mutunge akasimo.”
^ Kinywa kwa kinywa, “eryibuka.”
^ Kutse “akabembere kabuya.”
^ Kutse “sinendisyaghuna-ghuna (sinendisyaghololoka).”
^ Kuttse “akabembere kabuya.”
^ Kinywa kwa kinywa, “omusasi.”
^ Kutse “eyisinda.”
^ Kutse “epiri; olukimba lw’ekiriro.”
^ Kutse “olukengerwa lwaghe ilwatoka.”