Esyonyimbo 31:1-24
Oko musondoli. Omuziki wa Daudi.
31 Yehova, n’iwe nabiriyira mo busayiro bwaghe.
Isinasyahemulawa n’ahake.
Unilamaye busana n’eritunganene lyaghu.
2 Uniteghe okutu.*
Wase luba unilamaye.
Ubye okw’ingye, ahakongotere h’ekitwa,Omwanya owasikire busana n’erinilamya.
3 Kusangwa uli lukuka* lwaghe n’ahakongotere haghe;Busana n’erina lyaghu, ukendisyanisondola n’erinikangya enzira.
4 Ukendisyanyilusya omo butimba obo babirinitegha bubiso-biso,Kusangwa uli ahakongotere haghe.
5 Ngahira ekirimu kyaghe omo byala byaghu.
Yehova Mungu w’ekwenene,* wabirinikombola.
6 Ngayiponera abakakolera esyosanamu buyira, esitawite mughaso,Nikwa ingye ngayiketera Yehova.
7 Ngendisyayisyandira kutsibu omo lwanzo lwaghu oluteleghula,Kusangwa wabirilangira amaghali waghe;Unasi ndeke erinuba ly’omutima waghe.*
8 Isiwanihira omo byala by’enzighu,Nikwa wabirileka inahangana omo mwanya owalimo embolere.*
9 Yehova unikanganaye olukogho, kusangwa niri omo malighe.
Obulighe bwabirileka ameso waghe inyalembera, n’omubiri* waghe wosi kutya.
10 Engebe yaghe ikahwerekerera omo buligheN’emyaka yaghe ikahwerekerera omw’isimba.
Akaghala kaghe kakakeha busana n’erilolo lyaghe;Amakuha waghe akoloberera.
11 Esyonzighu syaghe syosi sikanipokaya,Kutsibu-tsibu abahimbani baghe.
N’abanyasi bakanisagha;Bakabya banilangira ahali abandu bangyi, bakatibita bakanisagha.
12 Babirinilusya omo bulengekania* bwabo n’erinibirirwa, inabya nga nabirihola;Niri ng’ekindu ky’omutaka ekitulangikire.
13 Nabiryowa emyatsi mingyi mibi eyo abandu bakanibughako;Eryubahya linitimbireko.
Omughulu bakahindana haghuma busana naghe,Bakaya embita y’eribughaho obuyingo* bwaghe.
14 Nikwa Yehova, ngayiketera we.
Ngabugha niti: “Uli Mungu waghe.”
15 Ebiro byaghe* biri omo byala byaghu.
Unilusaye omo byala by’esyonzighu syaghe n’oko bakanyendereraya.
16 Ukanganaye omughombe waghu y’obusu obukere.
Unilamaye omo lwanzo lwaghu oluteleghula.
17 Yehova, isinahemuka ngakulakira.
Ababi bahemuke;Baye omw’Isinda,* babye bukutu.
18 Eminywa eyikabugha amabehi, ibye mumu,Eminywa eyikabugha omw’iyiheka, omw’iyihamya n’omo pono.
19 Obubuya bwaghu ni bunene kutsibu!
Wabiribikirabo abakakubaha,Kandi wabirikangyabo embere sy’abandu bosi, busana n’abosi abakakusaghirako.
20 Ukendisyabisabo embere syaghu omo mwanya owabisemeHali oko syombita nyibi sy’abandu;Ukendisyabisabo omo buwamo bwaghuOko bakabwirabo kitya-kitya.*
21 Yehova apipawe,Kusangwa abirinikangania olwanzo lwiwe oluteleghula omo nzira y’eriswekera omo muyi owabiribambirwa.
22 Nikwa ingye, munahandabuka n’eribugha niti:
“Ngendiheribwa erilua embere syaghu.”
Nikwa nabere nakulakira ngasaba obuwatikya, muwowa ekiriro kyaghe.
23 Inywe bosi abataleghula oko Yehova, mumwanze!
Yehova akateghaya omutaleghula,Aliwe akasuyira kutsibu owosi-wosi oyukayihaghata.
24 Mubye batubaha n’emitima yenyu isike,Inywe bosi abakalindirira Yehova.
Amaelezo awehikwa
^ Kutse “uname unihulikirire.”
^ Kutse “ribwe.”
^ Kutse “oMungu w’obutaleghula.”
^ Kutse “omunubo w’enafsi yaghe.”
^ Kutse “omwanya munene.”
^ Kutse “enafsi yaghe n’enda yaghe.”
^ Kutse “omo mutima.”
^ Kutse “enafsi.”
^ Kinywa kwa kinywa, “emighulu yaghe.”
^ Kutse “Esheoli,” ni bugha ambu, eyisinda y’abandu bosi. Ulebaye Amaana w’ebinywa.
^ Kiknywa kwa kinywa, “olulimi olukaneghena.”
