Esyonyimbo 34:1-22
Olwa Daudi, omughulu ayiyira ng’ekitingo embere sya Abimeleki, neryo amamutibitako, naye amabala.
א [Aleph]
34 Ngendisyapipa Yehova emighulu yosi;Eminywa yaghe siyendisyaleka erimupipa.
ב [Beth]
2 Ngendisyayihalamba* omo Yehova;Abolo bakendisyowa neryo ibatsema.
ג [Gimel]
3 Muhamaye Yehova haghuma naghe;Tuhalambe erina liwe ryo haghuma.
ד [Daleth]
4 Munasaba Yehova naye mwanisubirya.
Mwanilamya oko buba bwaghe bwosi.
ה [He]
5 Abosi abamuhirako amaha mubatsema;Amusu wabo mwatahemuka.
ז [Zayin]
6 Omuhanya oyu, mwalakira Yehova naye mwowa.
Mwamulamya omo malighe wiwe wosi.
ח [Heth]
7 Omumalaika wa Yehova akatimbaya ekambi oko bosi abakubaha oMungu,Kandi akalamayabo.
ט [Teth]
8 Mulebaye,* mulangire ngoko Yehova ni mubuya;Obutseme buli oko bakamuyira mo busayiro.
י [Yod]
9 Mubahe Yehova inywe babuyirire biwe bosi,Kusangwa abakamubaha sibalibula kindu.
כ [Kaph]
10 Nibya n’emisuko y’esyondale* eyiwite amaka yabirikwa enzala,Nikwa abakasonda-sonda Yehova sibalibula ekindu kibuya.
ל [Lamed]
11 Baghala baghe, mwase munihulikirire;Ngendibakangirirya eryubaha Yehova.
מ [Mem]
12 Nindi omo kati-kati kenyu oyo wanzire eritsema omo ngebeN’oyo wanganza erilola oko biro bingyi ebirimo obutseme?
נ [Nun]
13 Neryo uteghaye olulimi lwaghu oko kibi,N’eminywa yaghu okw’ibugha amatebo.
ס [Samekh]
14 Ubindukiraye ekibi ky’omughongo neryo ukole ekibuya;Usonda-sondaye obuholo n’erikwamirirabo.
ע [Ayin]
15 Ameso wa Yehova ali oko batunganene,N’amatwi wiwe akahulikirira erilaka lyabo.
פ [Pe]
16 Aliwe Yehova akahinaya obusu busana n’abakakola ebituwene,Eribasangula omo kihugho isibangatasyibukwa n’ahake.
צ [Tsade]
17 Mubalaka, na Yehova mwowa;Mwalamyabo oko malighe wabo wosi.
ק [Qoph]
18 Yehova ali hakuhi n’ab’emitima eyibunikire;Akalamaya ab’ebirimu ebibunikire.
ר [Resh]
19 Omutunganene akahikirawa n’amaligho* mangyi,Aliwe Yehova akamulamaya oko wosi.
ש [Shin]
20 Akateghaya amakuha wiwe wosi;Sihali n’erighuma eryabiribunwa.
ת [Taw]
21 Obuhanya bukendisyita omubi;Abosi abaponire omutunganene bakendisyabyako olubanza.
22 Yehova anemulamya engebe* y’abaghombe biwe;Sihali n’omughuma oyukasaghira eyo ali, oyukendisyabyako olubanza.
Amaelezo awehikwa
^ Kutse “enafsi yaghe.”
^ Kutse “mughonze.”
^ Kutse “emyusuko y’esyondale eyiwite ebyeya omo bikya.”
^ Kutse “amaghali.”
^ Kutse “enafsi.”
