Esyonyimbo 45:1-17
Oko musondoli; mulwimbirwa oko mawa we “Lise.”* Ni lw’abaghala ba Kora. Maskili.* Olwimbo lw’olwanzo.
45 Omutima waghe akapika-pika busana n’omwatsi mubuya.
Ngabugha niti: “Olwimbo lwaghe* lulebirye omwami.”
Olulimi lwaghe lubye ng’akalamu k’omuhandiki* oyukalire.
2 Uli mubuya kutsibu kwilaba abaghala bosi b’abandu.
Ebinywa by’olukogho bikasenda bikalua omo minywa yaghu.
Kyabirileka oMungu inyakutsumula kera na kera.
3 Uyibohe omuyali waghu oko ndungu iwe mbangyi,Omo lukengerwa lwaghu n’omo bukulu bwaghu.
4 N’omo lukengerwa lwaghu, ughende erihika okw’ikinda;*Ughendaye epunda yaghu omo kwenene n’eriyikehya n’eritunganene,Ebyala byaghu byamali bikendikola* emyatsi eyikubahisaya kutsibu.
5 Emisoha* yaghu yitwire; yikaleka ebihanda ibyawa embere syaghu;Ikatsimita esyonzighu sy’omwami.
6 OMungu ni kitumbi kyaghu ky’obwami kera na kera;Omutso waghu w’obwami,* ni mutso w’eritunganene.*
7 Muwanza eritunganene, n’eripona obubi.
Kyo kyalekire oMungu, oMungu waghu inyakuhirako amaghuta w’obutseme n’erikuhamya kulenga abalikyenyu.
8 Esyongyimba syaghu syosi sirimo akakumbo k’amane-mane, ne udi, n’ekida;Ebyombo by’omuziki eby’esinga bikakutsemesaya ighune omo bwikalo bunene bw’obwami* obukokotibwe omo rino ry’enzoghu.*
9 Abambesa baghu bali omo kati-kati k’abakali abasikibwe ab’omo kibugha kyaghu.
Omughole* animene oko byala byaghu by’amali, anapambirwe omo horo eye Ofiri.
10 Mumbesa, hulikirira, uyiteghereraye kandi uteghe okutu;Ubirirawe abandu baghu n’ekitunga kya baba waghu.
11 N’omwami akendikandira obubuya bwaghu,Kusangwa ni mukama waghu,Neryo umunamire.
12 Omwali we Tiro akendisyasa n’ekihembo;Abateke kutsibu omo kati-kati k’abalume bakendisyamusondyako obwira.*
13 Mwali w’omwami anemukangabasania kutsibu omo bwikalo* bw’obwami;Esyongyimba siwe sidesire* omo horo.
14 Akendiletwa embere sy’omwami inyanambite esyongyimba esilukire lufundi-fundi.*
Ababikira abamukwamire bakendiletwa embere syaghu.
15 Bakendiletwa omo butseme n’eriyitsangura;Bakendingira omo bwikalo bw’obwami.*
16 Abana baghu bakendisyimya omwanya w’abotata-kulu waghu.
Ukendisyabayira mo banya-mwami omo kihugho kyosi.
17 Ngendisyaleka erina ryaghu iryaminywa omo bizazi* byosi ebiri embere.
Busana n’ekyo ebihanda bikendisyakupipa kera na kera.
Amaelezo awehikwa
^ Kutse “ebiranga-ranga.”
^ Ulebaye Amaana w’ebinywa.
^ Kinywa kwa kinywa, “emibiiri yaghe ilebirye.”
^ Kutse “omusakangyi; omuntombe.”
^ Kutse “eritoka.”
^ Kinywa kwa kinywa “bikendikukangirirya.”
^ Kutse “emishale.”
^ Kutse “w’obulingirirania.”
^ Kutse “ebakora.”
^ Kutse “ekikali.”
^ Kutse “etembo.”
^ Kutse “omulelembera.”
^ Kutse “bakendisyolobya obusu bwaghu.”
^ Kutse “ekikali.” Kinywa kwa kinywa, “emwisi.”
^ Kinywa kwa kinywa, “sitondireko ehoro.”
^ Kutse “alinga esyoropo esidesire.”
^ Kutse “omo kikali.”
^ Kutse “esyondengo.”
