Esyonyimbo 51:1-19
Oko musondoli. Omuziki wa Daudi, omughulu omuminyereri Natani asa eyiri Daudi, Daudi abisingira na Batiseba.
51 Mungu, unikanganaye olukogho erikwamana n’olwanzo lwaghu oluteleghula.
Usangule ebibi byaghe erikwamana n’obughanyiri bwaghu bunene.
2 Unyerayeko ndeke-ndeke ekibi kyaghe,N’erinyeryako erilolo ryaghe.
3 Kusangwa nyinasi ndeke-ndeke ebibi byaghe,N’erilolo lyaghe riri embere syaghe* omughulu wosi.
4 Kutsibu-tsibu, n’iwe, iwe* nabirihalyako;Nabirikola ekyo uponire.
Neryo, usingene omughulu ukabughaEritswera lyaghu ritunganene.
5 Lebaya! Nabutawa iniri mundu w’ekibi,Kandi nabya w’erilolo erilua ekiro mama waghe aheka obukule bwaghe.
6 Lebaya! Ukatsemera ekwenene eyiri omo mutima w’omundu;Unikangiriraye nitoke eribya n’amenge w’ekwenene emwisi syaghe.*
7 Unyeraye oko rilolo lyaghe omo hisopo, inatoka eribya oyo werire.
Unyeraye, nitoke erihenia kwilaba enzururu.
8 Uleke nyowe emilenge y’obutseme n’ey’eriyisyandiraAmakuha agho wabiribunanga atoke eritsema.
9 Ubindukaye obusu bwaghu,* isiwasamalira amalolo waghe,Kandi ughuse hali* ebibi byaghe byosi.
10 Mungu, unihangyikemo omutima owerire,Kandi unihiremo ekirimu kihya-kihya, ekirimu ekisikire.
11 Isiwanihigha embere syaghu;Kandi isiwanilusayako ekirimu kyaghu ekibuyirire.
12 Unisubuliraye obutseme bw’omulamo waghu;Ubukaye omw’ingye omutima owanzire erikwowa.*
13 Abakakola ebibi, ngendisyakangiriryabo esyonzira syaghu,Abakakola ebibi batoke erikusubako.
14 Mungu, unilamaye oko lubanza* lw’eryuta omusasi, iwe Mungu w’erilama ryaghe,Olulimi lwaghe lutoke eritula eritunganene ryaghu ininatsemire.
15 Yehova ukingule eminywa yaghe,Obuno bwaghe butoke eritulaghania eripipa lyaghu.
16 Kusangwa siwanzire obuhere—ko bilue bitya, nangahererebo;Sulitsemera obuhere bw’eryokererya obwosi.
17 Amahere awakatsemesaya oMungu, kye kirimu ekibunikire;Omutima owabunikire n’owapondekene, Mungu, siwendisyaghanagho.*
18 Omwanza lyaghu, ukolere e Sioni y’ebibuya;Uhimbe esyombimbo sye Yerusalema.
19 Neryo, ukendisyatsemera amahere w’abatunganene,Amahere w’eryokererya n’amahere awakahererawa awosi;Neryo esyonume sy’esyonde sikendisyahererwa oko kiherero kyaghu.
Amaelezo awehikwa
^ Kutse “omo bulengekania bwaghe.”
^ Kinywa kwa kinywa, “Iwe musa.”
^ Kutse “omo syombiso syaghe sy’emwisi.”
^ Kutse “ubise obusu bwaghu.”
^ Kutse “uzime.”
^ Kinywa kwa kinywa, “uniwatikaye n’ekirimu ekiyiteghekire eryowa.”
^ Kutse “omusango.”
^ Kutse “siwendisyapokyagho.”
