Esyonyimbo 74:1-23
Maskili.* Olwa Asafu.
74 Mungu, busanaki wabiritughusa kera na kera?
Busanaki erihitana laghu rikaghulumira* oko kihangulo ky’olulisiryo lwaghu?
2 Wibuke abandu baghu* abo wayisogha erilua kera,Ekihanda ekyo wakombola eribya mwandu waghu.
Wibuke Ekitwa kye Sinai ekyo wabiriikalako.
3 Uloleraye ebisando byaghu oko bisambukalirya bya kera-kera.
Enzighu yabiriherya ebyosi by’ahabuyirire.
4 Abakuponire babirirurumira ahakakolerawa omuhindano* waghu.
Babirihanikaho esyobendera syabo eribya kiminyikalo.
5 Babya ng’abandu abakakolesaya esyombasa bakakonda omusitu owalimo emiti eyihatatene.
6 Mubatulanga amapambo wosi w’ahabuyirire omo mbasa n’emighamba y’ekyuma.
7 Mubahisya ahabuyirire haghu omo muliro.
Mubatsandya etabernakulo yaghu eyiriko erina ryaghu, bamikyayo oko kitaka.
8 Ibo n’olubuto lwabo mubabugha omo mitima yabo bati:
“Ahosi ah’erikolera emihindano y’oMungu omo kihugho ekyo litolere ihatimibwa.”
9 Situlangire ekiminyikalo kyosi-kyosi;Sihakiri omuminyereri wosi-wosi,Kandi sihali n’omughuma w’okw’itwe oyo wasi eki nga kikendisyabugha mughulu mungahi.
10 Mungu, enzighu ikendisyalola embere eritsuma erihika mughulu wahi?
Enzighu ikendilola embere eritendisikya erina lyaghu erihika kera na kera kwehi?
11 Busanaki ukakakiraya ebyala byaghu, ebyala byaghu by’amali?
Lusayabyo oko kikuba* kyaghu, uhwerekererayebo.
12 Nikwa oMungu ni Mwami waghe erilua kera-kera,Oyukakola oko kihugho kw’emibiiri y’erilamya.
13 Muwadunga engetse omo kaghala kaghu;Muwahinolera emitwe y’esyonyama nene-nene sy’omo ngetse.
14 Muwahinolera emitwe ye Leviatani;*Muwahayo abandu mo kalyo, abikalani b’omo mbwarara.
15 Muwakingulira esyongununuko n’esyonyusi, syamasenda;Muwumya esyonyusi esyabya isisiryuma.
16 Omusibo ni waghu, n’ekiro kutyaMuwahangyika ekyakakala* n’eryuba.
17 Muwahiraho emipaka yosi y’ekihugho,Muwahangyika omughulu w’ekihuhania kinene* n’ow’embeho nene.
18 Yehova wibuke ebitsumi by’enzighu,Wibuke ngoko abandu bakiru bakatsangira oko rina ryaghu omo butakenga.
19 Isiwalwikira esyonyama sy’omoli obuyingo* bw’akatungula kaghu.
Isiwibirirawa kera na kera obuyingo bw’abandu baghu abakanubibawa.
20 Wibuke endaghane,Kusangwa emyanya y’ekihugho eyirimo omwirimya yabiribya bwikalo bw’obukatsu.
21 Oyo wabirihinolerwa isyasubula iniabiribunika mutima;Omuhanya n’omwera bapipe erina lyaghu.
22 Mungu, uhangane, uyilwireko omo lubanza lwaghu.
Wibuke ngoko abakiru bakakutsuma omo musibo wosi.
23 Isiwibirirawa ebyo esyonzighu syahgu sikabugha.
Olukanda olukalire lw’abakayisamambula okw’iwe lukiruka butumbya.
Amaelezo awehikwa
^ Ulebaye Amaana w’ebinywa.
^ Kinywa kwa kinywa, “rikalusaya omuki.”
^ Kinywa kwa kinywa, “omuhindano waghu munene.”
^ Kutse “ah’erikolera emihandano yaghu minene-minene.”
^ Kutse “omo mukunyo w’olukimba lwaghu.”
^ Ulebaye Amaana w’ebinywa.
^ Kutse “ekikoleryo.”
^ Kutse “omughulu w’engarayi.”
^ Kutse “enafsi.”
