Esyonyimbo 77:1-20
Oko musondoli. Lulegherwe oko Yedutuni.* Olwa Asafu. Omuziki.
77 Ngendisumba omulenge ngalakira oMungu;Ngendilakira oMungu, naye akandinyowa.
2 Ekiro ky’obuhanya ngasonda-sonda Yehova.
Omo kiro ngamusumbira ebyala byaghe butsira eryumbya.*
Sinangakiranibwa.*
3 Ngabya nibuka oMungu, ngasimba;Ngahanga-hangaya n’akaghala kaghe kakahwa.* (Sela)
4 Ukahambirira ebikoheryo byaghe, isinaliba ameso;Nabirihandabuka neryo sinangatoka eribugha.
5 Amalengekania waghe akasuba oko biro bya kera kera,Oko myaka ya kera kera.
6 Omo kiro ngibuka olwimbo lwaghe;*Ngaghaniraya omo mutima waghe;Ngakwesa-kwesa* kutsibu emyatsi eyo.
7 Yehova anemwendilw’iniatughusa kera na kera kwehi?
Syendisyatukangania olukogho lwiwe kwehi?
8 Olwanzo lwiwe oluteleghula lwanabiribulirana kera na kera?
Endaghane yiwe inemwendisyabula eribererera omo bizazi* byosi?
9 OMungu anabiribirirwa erikangania olukogho?
Kutse erihitana liwe ryanabirileka obughanyiri bwiwe ibwahwa? (Sela)
10 Ngabera eribugha niti: “Ekikanyaghalaya* kya kino:
Ow’endata Kutsibu abiribindula emibere* eyo akatukoleramo?”
11 Ngendyibuka emibiiri ya Yah;Ngendyibuka emikolere yaghu y’eriswekera eya kera kera.
12 Kandi ngendilengekania kutsibu oko byosi ebyo ukakolaN’erighanirya oko mikolere yaghu.
13 Mungu, esyonzira syaghu sibuyirire.
Mungu, hane omungu mukulu nga we?
14 Iwe Mungu w’ekwenene, oyukakola emyatsi y’eriswekera.
Wabiribisulira ebitunga by’abandu by’akaghala kaghu.
15 Omo butoki* bwaghu wabirilamya* abandu baghuAbaghala ba Yakobo n’aba Yozefu. (Sela)
16 Mungu, amaghetse mwakulangira;Amaghetse mwakulangira, amadungika.
N’emitobero y’amaghetse muyaghunga.
17 Ebitu mubyutula amaghetse.
Ekyanya ekirimo ekilumbi mukyabuya emilumo,N’emisoha yaghu muyayighusanga eyi n’eyi.
18 Omulenge w’emilumo yaghu abya ng’ebiringo by’esyongurubani;*Eripalya ry’ehirabyo mulyakolerya ekihugho;*Ekitaka mukyasukana n’erilabamo omusiki.
19 Muwalaba omo ngetse,Enzira yaghu muyabya omo maghetse mangyi;Nikwa aho ulyalyata isihangalangirika.
20 Muwasondola abandu baghu ng’ekihangulo,Omo buteya* bwa Musa na Haruni.
Amaelezo awehikwa
^ Ulebaye Amaana w’ebinywa.
^ Kinywa kwa kinywa, “butsira erilembera.”
^ Kutse “enafsi yaghe.”
^ Kinywa kwa kinywa, “ekirimu kyaghe kikalekula.”
^ Kutse “omuziki owakimbirawa oko byombo by’omuziki ebiriko esyosinga.”
^ Kinywa kwa kinywa, “ekirimu kyaghe kikakwesa-kwesa.”
^ Kutse “esyondengo.”
^ Kutse “ekikanitsimita.”
^ Kinywa kwa kinywa, “ebyala by’amali.”
^ Kinywa kwa kinywa, “okuboko.”
^ Kinywa kwa kinywa, “wabiritongolya.”
^ Kutse “emitoka y’amalwa eyikakurawa; esyosharyo.”
^ Kutse “ekitaka.”
^ Kinywa kwa kinywa, “omo byala.”
