Esyonyimbo 86:1-17
Omusabe wa Daudi.
86 Yehova, uteghe okutu,* unisubiraye,Kusangwa ngaghalawa kandi niri mwera.
2 Uteghaye engebe* yaghe, kusangwa niri mutaleghula.
Ulamaye omughombe waghu, kusangwa akayiketera we,Kusangwa uli Mungu waghe.
3 Yehova, unikanganaye olukogho,Kusangwa ngakulakira omo musibo wosi.
4 Utsemesaye omughombe waghu,*Kusangwa, Yehova, n’iwe ngahirako ameso.*
5 Kusangwa, Yehova, uli mubuya kandi uyiteghekire erighanyira;Ukakanganaya abosi abakakulakira b’olwanzo lunene oluteleghula.
6 Yehova, uhulikirire omusabe waghe;Kandi uteghe okutu ngakusaba obuwatikya.
7 Ekiro indi omo bulighe ngakulakira,Kusangwa ukanisubiraya.
8 Yehova, omo miungu simuli oyuli nga we,Sihali emibiiri eyiri ng’eyaghu.
9 Yehova, ebihanda byosi ebyo wabumbaBikendisyasa n’eryunama embere syaghu,Kandi bikendisyaha erina lyaghu ly’olukengerwa.
10 Kusangwa uli mukulu kandi ukakola emyatsi y’eriswekera;Uli Mungu, iwe musa.
11 Yehova, nikangiriraye enzira yaghu.
Ngendilendera omo kwenene yaghu.
Uluyiriranaye omutima* waghe nitoke eryubaha erina lyaghu.
12 Yehova Mungu waghe, ngakupipa n’omutima waghe wosi,Ngendiha erina lyaghu ly’olukengerwa erihika kera na kera,
13 Kusangwa olwanzo olo ukanikanganaya ni lunene,Kandi wabirisabula engebe* yaghe oko mitobero y’Eyisinda.*
14 Mungu, abandu abakayilabiriraya bakahangana erilwa naghe;Ekikumula ky’abakatsu kikasonda eribughaho obuyingo* bwaghe,Kandi sibakutsomene.*
15 Aliwe iwe, Yehova, uli Mungu w’obughanyiri n’oyukakwira abandu b’obulighe,*Oyutehitana luba-luba kandi oyo woswire n’olwanzo oluteleghula n’obutaleghula.*
16 Unibindukiraye obusu bwaghu kandi unikanganaye olukogho.
Uhe omughombe waghu y’akaghala,Kandi ulamaye omughala w’omughombe waghu w’obukali.
17 Unikanganaye ekiminyikalo* ky’obubuya bwaghu,Abaniponire batoke erikilangira n’erihemuka.
Kusangwa, Yehova, uli muwatikya waghe kandi mukirania waghe.
Amaelezo awehikwa
^ Kutse “uname n’eryowa.”
^ Kutse “enafsi.”
^ Kutse “enafsi y’omughombe waghu.”
^ Kutse “ngasumbira ebyala byaghe.”
^ Kutse “umbe omutima owataghabene.”
^ Kutse “enafsi.”
^ Kutse “Esheoli,” ni bugha ambu eyisinda y’abandu bosi. Ulebaye Amaana w’ebinywa.
^ Kutse “bakasondekanaya enafsi yaghe.”
^ Kutse “sibetakuhira embere syabo.”
^ Kutse “olukogho.”
^ Kutse “n’ekwenene.”
^ Kutse “ekikakanganaya.”
