Esyonyimbo 9:1-20
Oko musondoli; oko Mut-labeni. Omuziki wa Daudi.
א [Aleph]
9 Yehova, ngendikupipa n’omutima waghe wosi;Ngendikania oko mibiiri yaghu yosi y’eriswekera.
2 Ngenditsema n’eritsanga busana naghu;Ngendiimba* ngapipa erina ryaghu, iwe w’Endata Kutsibu.
ב [Beth]
3 Esyonzighu syaghe sikendibyasyasuba enyuma,Sikenditwikala n’erihera erilua embere syaghu.
4 Kusangwa ukanilwirako nitoke erikolerwa omo ritunganene;Wikere omo kitumbi kyaghu ky’obwami ukatswera omo ritunganene.
ג [Gimel]
5 Wabirihayira ebihanda n’eritoghotya ababi,Wabirisangula erina lyabo erihika kera na kera.
6 Enzighu yabiriheribwa kera na kera;Wabirihimbula emiyi yabo,Sibangatasyibukwa.
ה [He]
7 Nikwa Yehova ni mwami kera na kera,Abirihanda ndeke-ndeke ekitumbi kiwe ky’obwami ekyo akatswererako omo ritunganene.
8 Akendisyatswera abandu abikere omo kihugho* kyosi omo ritunganene;Akendisyatswera ebihanda byosi omw’itswera eritunganene.
ו [Waw]
9 Yehova akendisyabya busayiro obusikire busana n’abakanubibawa,Obusayiro obusikire* omughulu w’obulighe.
10 Abasi erina lyaghu bakendisyayiketera iwe;Yehova, siwendisyalekerania n’ahake abakakusonda-sonda.
ז [Zayin]
11 Mwimbire Yehova oyo wikere e Sioni esyonyimbo sy’eripipa;Muminyikalaye emibiiri yiwe omo kati-kati k’ebihanda.
12 Kusangwa oyukakisaya busana n’omusasi wabo anibukirebo,Syendisyibirirwa erilaka ry’oyukaghalawa.
ח [Heth]
13 Yehova unikanganaye olukogho, ulangire ngoko abaniponire bakanighalaya,Iwe ukanisabula erilua omo syongyo sy’oluholo.
14 Inatoka eritulaghania emibiiri yaghu y’eripipa omo syongyo sy’abali ba Sioni,N’eriyisyandira omo mibiiri yaghu y’erilamya.
ט [Teth]
15 Ebihanda byabiritobera omo kyuna ekyo byatakula;Ebisando byabo byabirihambwa omo matimba agho byategha bubiso-biso.
16 Yehova asibwe busana n’eritswera riwe.
Omubi abirihambwa omo kitegho omo mubiiri w’ebyala biwe.
Higayoni.* (Sela)
י [Yod]
17 Ababi bakendisyasuba enyuma eriya eyiri Eyisinda,*Ebihanda byosi ebikibirirawa oMungu.
18 Nikwa abera sibendisyabiriranwa ebiro byosi;N’amaha w’abakayikehaya syendisyaheribwa n’ahake.
כ [Kaph]
19 Yehova, uhangane! Sighuleke omundu akasinga.
Ebihanda bitswerawe embere syaghu.
20 Yehova witebo obuba,Ebihanda biminye ngoko ni bandu buyira abakahola. (Sela)
Amaelezo awehikwa
^ Kutse “ngenditunga akasimo.”
^ Kutse “ekitaka.”
^ Kutse “ahayisumbire ahasikire; ah’endata ahasikire.”
^ Ulebaye Amaana w’ebinywa.
^ Kutse “Esheoli,” ni bugha ambu, eyisinda y’abandu bosi. Ulebaye Amaana w’ebinywa.
