Esyonyimbo 94:1-23
94 Yehova Mungu oyukakisaya,Mungu oyukakisaya, ukanganaye olukengerwa lwaghu!
2 Iwe Mutsweri w’ekihugho, uhangane!
Ulihe ab’emiyiheko ekyo batolere.
3 Erihika mughulu wahi, Yehova,Ababi bakendisyalola embere eriyihalamba erihika mughulu wahi?
4 Bakabugha abinywa bingyi by’obukiru kandi bakabugha omo miyiheko;Abakola-nabi bosi bakayihalamba.
5 Yehova, bakahinolera abandu baghu,Kandi bakanubaya omwandu waghu.
6 Bakita omukwa-kali n’omwikalani mugheni,Bakita abana abatawite abotata* wabo.
7 Bakabugha bati: “Yah syalangire;OMungu wa Yakobo syalebirye omwatsi oyo.”
8 Inywe mutawite obwenge, muminye omwatsi oyu;Inywe bakiru mukendisyasala mwayira obwenge mughulu wahi?
9 Oyo wahangyika* okutu, anganabula eryowa kwehi?
Oyo wahangyika eriso, anganabula erilangira?
10 Oyukahabula ebihanda, syangakunga kwehi?
Yukaha abandu b’amenge!
11 Yehova anasi amalengekania w’abandu,Anasi ngoko abandu ni muka buyira.
12 Yah, omundu oyo ukakunga atsemire,Oyo ukakangiriraya erilabira emighambo yaghu,
13 Erimuwatikya eritekana omo biro by’obuhanya,Erihika omughulu ekyuna kikendisyatakulwa busana n’ababi.
14 Kusangwa Yehova syendisyalekerania abandu biwe,Kandi syendisyasighania omwandu wiwe.
15 Inga, eritswera rikendisyasyabyamo obulingirirania,N’abawite emitima eyilungukere bakendisyakwamalyo.
16 Nindi yukendisyahangana erilwa n’ababi busana naghe?
Nindi yukendisyaniwatikya erilwa n’abakola-nabi?
17 Yehova kw’ataniwatikaya,*Ngambe munalw’inaheribwa.*
18 Omughulu nabugha niti: “Ekisando kyaghe kikatendera,”Yehova, olwanzo lwaghu olutaleghula mulwabya lukaniwatikya.
19 Omughulu emyatsi eyikahanga-hangaya* yanibundamiraya,Muwanikirania n’erinitulerya.*
20 Abatabali* babi banganayighunga okw’iweIbanemuhiraho obutsumbu-tsumbu omo rina ly’emighambo?*
21 Bakayikaya oko mutunganene*Eritswera omundu oyuteko olubanza* y’oluholo.*
22 Aliwe Yehova akendisyabya busayiro obusikire* busana naghe,OMungu waghe ni lukuka* olo ngasaghirako.
23 Akendisyaleka emibiiri yabo mibi iyabasubako.
Akendisyababughaho* omo bubi bwabo.
Yehova oMungu wetu akendisyababughaho.*
Amaelezo awehikwa
^ Kutse “esyongubi.”
^ Kinywa kwa kinywa, “oyo wahera.”
^ Kutse “kw’atawatikaya enafsi yaghe.”
^ Kinywa kwa kinywa, “nga munalw’inikala bukutu.”
^ Kutse “amalengekania awakaleka omundu iniabula obuholo.”
^ Kutse “erikirania lyaghu muryatulerya enafsi yaghe.”
^ Kutse “abatsweri.” Kinywa kwa kinywa, “ekitumbi kibi ky’obwami.”
^ Kutse “erilabira erihamula.”
^ Kutse “bakayikaya oko nafsi y’omutunganene.”
^ Kutse “oyuteko musango.”
^ Kinywa kwa kinywa, “n’omusasi w’oyuteko lubanza bakabugha bati aliko lubanza (mubi).”
^ Kutse “ah’endata ahasikire.”
^ Kutse “lubwe.”
^ Kinywa kwa kinywa, “akendisyahuniabo.”
^ Kinywa kwa kinywa, “akendisyahuniabo.”
