Ezra 1:1-11
1 Omo mwaka w’erimbere w’Omwami Koreshi we Persia, Yehova mwakuna* Koreshi omwami we Persia eritulaghania omwatsi omo butabali bwiwe bwosi, ekinywa ekyo Yehova abugha erilabira Yeremia kitoke eribererera. Eritulagho eryo mwahandikaryo. Lyabya ribughire liti:
2 “Omwami we Persia ye Koreshi, akabugha ati, ‘Yehova oMungu w’elubula abirimba amatabali wosi w’oko kihugho; kandi abirimba omubiiri w’erimuhimbira enyumba e Yerusalema eyiri e Yuda.
3 Omundu wosi-wosi omo kati-kati kenyu, inywe bandu biwe bosi, oMungu wiwe abye haghuma naye, kandi ahetukire e Yerusalema eyiri e Yuda, eritasyayahimba enyumba ya Yehova oMungu wa Israeli—iye ni Mungu w’ekwenene—oyo enyumba yiwe yabya e Yerusalema.’”*
4 Omundu wosi-wosi, omubunga, ahosi-hosi aho angabya inyikere, abahimbani* biwe bamuwatikaye; bamuhe efeza,* ehoro, ebindu, n’ebihangulo haghuma n’ebihembo busana n’enyumba y’oMungu w’ekwenene eyabya e Yerusalema.
5 Neryo abakulu b’ebitunga b’ekihanda kya Yuda n’ekya Benyamini, n’abahereri n’Abalawi—obuli mundu oyo ekirimu ky’oMungu kyakuna, mubayiteghekania eritasyayahimba enyumba ya Yehova eyabya e Yerusalema.
6 Abosi ababya bikere hakuhi nabo mubabawatikya. Mubahabo* ebindu by’efeza,* eby’ehoro, ebindu, ebihangulo, n’ebindu by’obughuli, butsira erighanza ebihembo.
7 Omwami Koreshi mwahulukya n’ebindu by’omo nyumba ya Yehova, ebyo Nebukadeneza alusaya e Yerusalema n’erihirabyo omo nyumba y’omungu wiwe.
8 Omwami Koreshi we Persia mwabwira Mitredati omubiki w’ebindu ati ahulukaye ebindu by’oMungu ebyo. Naye mwaghanzirabyo Sheshbazari,* omukulu we Yuda.
9 Neryo emighanzo y’eno: ebibindi by’ehoro ebiri nga bitiri 30, ebibindi eby’efeza* ebiri nga bitiri 1 000, n’ebindi bibindi 29,
10 ehibindi hike-hike 30 ehy’ehoro, ehibindi hike-hike 410 ehy’efeza,* n’ehindi hibindi 1 000.
11 Ebibindi byosi eby’efeza* n’eby’ehoro byabya 5400. Sheshbazari mwaleta ebyosi ebi omughulu abanyewa balua e Babiloni bakasuba e Yerusalema.
Amaelezo awehikwa
^ Kinywa kwa kinywa, “mwakuna omutima wiwe.”
^ Kutse alinga, “oyuli e Yerusalema.”
^ Kinywa kwa kinywa, “abandu abikere aho ali.”
^ Ni kindu ky’obughuli ekikalua omo kitaka.
^ Kinywa kwa kinywa, “mubasikya ebyala byabo omo.”
^ Ni kindu ky’obughuli ekikalua omo kitaka.
^ Ni kindu ky’obughuli ekikalua omo kitaka.
^ Ni kindu ky’obughuli ekikalua omo kitaka.
^ Ni kindu ky’obughuli ekikalua omo kitaka.
