Ezra 10:1-44
10 Omughulu Ezra abya akasaba n’erighungama amalolo w’abandu biwe, inyanemulira n’eritulama embere sy’enyumba y’oMungu w’ekwenene, ekikumula kinene ky’Abaisraeli, abalume, abakali, n’abana, mubahindana aho ali; kusangwa abandu babya ibanemulira kutsibu.
2 Neryo Shekania mughala wa Yehieli, ow’oko baghala ba Elamu mwabwira Ezra ati: “Twabirihalya oko Mungu wetu tukatahya* oko bakali b’ehandi, oko bandu b’omo kihugho kino. Nomo bine bitya, hakine amaha busana na Israeli.
3 Neryo lino, tukole endaghane haghuma n’oMungu wetu ey’erihigha abakali abo n’abana babo erikwamana n’obusondoli bwa Yehova n’obw’abosi abakubaha* ebihano by’oMungu wetu. Tukole erikwamana n’Emighambo.
4 Uhangane kusangwa oyu ni mubiiri waghu, netu tune enyuma syaghu. Usike kandi ukole omubiiri.”
5 Neryo Ezra mwahangana, amalapisya abakulu b’abahereri, Abalawi, n’Abaisraeli bosi erikola ekyamabuwa. Neryo mubalapa.
6 Neryo Ezra mwahangana, amalua embere sy’enyumba y’oMungu w’ekwenene, amaya omo kyumba* kya Yehohanani mughala wa Eliashibu. Nomo anayayo, mwatalya akalyo kosi-kosi kutse erinywa amaghetse, kusangwa abya omo kiriro busana n’erilolo ly’abandu abalua omo bunyewa.
7 Neryo mubatulaghania omwatsi omo Yuda n’omo Yerusalema ambu abosi abalua omo bunyewa bahindane haghuma e Yerusalema.
8 Abanya mwami n’abasyakulu mubayisogha bati hamabilaba ebiro bisatu omundu isyalyasa, inyakendisaghulwa* ebindu biwe kandi isyangasyahika omo ndeko y’abalua omo bunyewa.
9 Neryo omo biro bisatu, abalume ba Yuda na Benyamini mubayihindania e Yerusalema, ni bugha ambu oko kiro kye 20 ky’omwisi we 9. Abandu bosi babya ibanikere omo butala bw’enyumba y’oMungu w’ekwenene ibanemutitimana busana n’omwatsi oyo na busana n’embula nene.
10 Neryo Ezra omuhereri mwahangana amabwirabo ati: “Mwabirileghula mukatahya oko bakali b’ehandi, neryo mwabiryongera oko lubanza lwa Israeli.
11 Neryo mughungame embere sya Yehova Mungu w’abotata-kulu wenyu n’erikola erisonda liwe. Muyihighule oko bihanda by’omo kihugho kino n’oko bakali b’ehandi aba.”
12 Neryo endeko yosi muyasubirya omo mulenge muli yiti: “Tukendikola ngoko wanamabugha.
13 Nikwa abandu ni bangyi kandi ni mughulu w’embula. Sikyenditokekana eriimana ehihya, n’omwatsi oyu syendisohwa omo kiro kighuma kutse bibiri, kusangwa twabirihalya kutsibu tukakola omwatsi oyu.
14 Neryo kisi, uleke abanya mwami betu bimanire endeko yosi; n’abosi abali omo miyi yetu ababiritahya abakali b’ehandi, base oko ndambi eyikendihirwaho, haghuma n’abasyakulu n’abatsweri b’obuli muyi, erihika aho tukendiyilusiryako erihitana ly’oMungu wetu erikaghulumira busana n’omwatsi oyu.”
15 Nikwa Yonatani mughala wa Asaheli na Yazeya mughala wa Tikwa mubatalighirana n’omwatsi oyo. Na Mesulamu na Shabetayi, abalawi, mubayighunga okw’ibo.
16 Nikwa abalua omo bunyewa mubakola erikwamana n’omwatsi owasohawa. Na Ezra omuhereri n’abakulu b’ebitunga by’abotata wabo, abosi omo mena wabo, mubikala ibibene oko kiro ky’erimbere ky’omwisi we 10 erisoha omwatsi oyo.
17 N’oko kiro ky’erimbere ky’omwisi w’erimbere, babya ibabiribugha erisoha olubanza lw’abalume bosi ababya ibabiritahya abakali b’ehandi.
18 Kandi mubafumbula ngoko abaghuma b’oko baghala b’abahereri babiritahya oko bakali b’ehandi. Oko baghala ba Yesua, mughala wa Yehozadaki n’abaghala babo, Maaseya, Eliezeri, Yaribu, na Gedalia.
19 Nikwa mubayilagha* ngoko bakendihigha abakali b’ehandi abo, kandi ngoko bakendiherera embangale erilua omo kihyo kundi babyako olubanza.
20 Oko baghala ba Imeri, habya Hanani, na Zebadia;
21 n’oko baghala ba Harimu, Maaseya, Eliya, Shemaya, Yehieli, na Uzia;
22 N’oko baghala ba Pashuri, habya Eliyoenai, Maaseya, Ismaeli, Netaneli, Yozabadi, na Eleasa;
23 N’oko Balawi, habya Yozabadi, Shimei, Kelaya, ni bugha ambu, Kelita, Petahia, Yuda, na Eliezeri;
24 N’oko bimbi, habya Eliashibu; n’oko bateya b’esyongyo, habya Shalumu, Telemu, na Uri.
25 N’oko Baisraeli, oko baghala ba Paroshi, habya Ramiya, Izia, Malkiya, Miyamini, Eleazari, Malkiya, na Benaya;
26 n’oko baghala ba Elamu, Mataniya, Zekaria, Yehieli, Abdi, Yeremoti, na Eliya;
27 n’oko baghala ba Zatu, Eliyoenai, Eliashibu, Mataniya, Yeremoti, Zabadi, na Aziza;
28 n’oko baghala ba Bebai, Yehohanani, Hananiya, Zabai, na Atlayi;
29 n’oko baghala ba Bani, Mesulamu, Maluku, Adaya, Yashubi, Sheali, na Yeremoti;
30 n’oko baghala ba Pahati-moabu, Adna, Kelali, Benaya, Maaseya, Mataniya, Bezaleli, Binui, na Manase;
31 n’oko baghala ba Harimu, Eliezeri, Isiya, Malkiya, Shemaya, Shimeoni,
32 Benyamini, Maluku, na Shemaria;
33 n’oko baghala ba Hashumu, habya Matenai, Matata, Zabadi, Elifeleti, Yeremayi, Manase, na Shimeyi;
34 n’oko baghala ba Bani, habya Maadai, Amramu, Ueli;
35 Benaya, Bediya, Keluhi;
36 Wania, Meremoti, Eliashibu;
37 Mataniya, Matenai, na Yaasu;
38 n’oko baghala ba Binui, Shimei,
39 Shelemia, Natani, Adaya,
40 Makina-debayi, Shashai, Sharai,
41 Azareli, Shelemia, Shemaria,
42 Shalumu, Amaria, na Yozefu;
43 n’oko baghala ba Nebo, habya Yeieli, Matitia, Zabadi, Zebina, Yadai, Yoeli, na Benaya.
44 Abosi aba babya ibabiritahya abakali b’ehandi. Neryo mubahighabo haghuma n’abana babo.
Amaelezo awehikwa
^ Kutse “tukaleta omo manyumba wetu.”
^ Kinywa kwa kinywa, “abakatitimana busana.”
^ Kutse “ekyumba ky’eriliramo.”
^ Kutse “inyakendiherya ebindu biwe.”
^ Kinywa kwa kinywa, “mubasumba ebyala byabo.”
