Ezra 3:1-13
3 Omwisi we 7 abere ahika, n’Abaisraeli* ibanikere omo miyi yabo, mubahindana haghuma e Yerusalema.
2 Yesua mughala wa Yehozadaki n’abahereri balikyabo, na Zerubabeli mughala wa Salatieli n’abaghala babo, mubahangana bamahimba ekiherero ky’oMungu wa Israeli batoke eriherera kukyo kw’amahere w’eryokererya ngoko kihandikire omo Mighambo ya Musa, omundu w’oMungu w’ekwenene.
3 Neryo mubahira ekiherero aho kyanabya kera, nomo banabya ibanemo obuba busana n’abandu b’omo bihugho ebyabya bibatimbireko. Neryo mubatsuka eriherera kukyo kw’amahere w’eryokererya busana na Yehova; amahere w’eryokererya w’omo tututu n’aw’omw’igholo.
4 Neryo mubakola Ekiro Kikulu ky’Ebibanda erikwamana n’ebyabya bihandikire omo Mighambo. Mubabya bakaleta oko kiherero amahere erikwamana n’emighanzo y’obuhere bw’eryokererya eyabya isabirwe obuli kiro.
5 Enyuma sy’aho, mubaherera obuhere bw’eryokerera ob’obuli kiro, n’amahere aw’emisi mihya-mihya,* n’amahere w’ebiro bikulu bya Yehova ebibuyirire, n’ebihembo ebyo obuli mundu aletera Yehova.
6 Eritsuka oko kiro ky’erimbere ky’omwisi we 7, mubatsuka eriherera Yehova y’amahere w’eryokererya, nomo efondasyo y’enyumba ya Yehova yanabya isiyiriyahimbwa.
7 Mubaha abakabatsa amabwe n’abandi bafundi esyofranga. Mubaha n’Abasidoni, Abatiro b’akalyo, eky’erinywa, n’amaghuta, bangaleta esyombagho sy’emierezi erilabyasyo omo ngetse, erilua e Lebanoni erihika e Yopa; ngoko Omwami Koreshi we Persia anahamulirabo.
8 Omo mwaka w’akabiri, ibabirihika oko nyumba y’oMungu w’ekwenene e Yerusalema, oko mwisi w’akabiri, Zerubabeli mughala wa Salatieli, Yesua mughala wa Yehozadaki, n’abandi baghala babo, abahereri, n’Abalawi, n’abosi abahika e Yerusalema bakalua omo bunyewa mubatsuka omubiiri. Mubasombola Abalawi eritsuka oko myaka 20 n’eryeruka erimanira omubiiri w’enyumba ya Yehova.
9 Neryo Yesua, abaghala biwe, abaghala babo, na Kadmieli n’abaghala biwe, abaghala ba Yuda, mubakola haghuma erihanganira abakakola omubiiri omo nyumba y’oMungu w’ekwenene, haghuma n’abaghala ba Henadadi n’abana babo ab’obulume, erihirako n’abaghala babo, Abalawi.
10 Abahimbi babere babihimba efondasyo y’ehekalu ya Yehova, abahereri ibanambite esyongyimba syabo sy’obuhereri, ibanawite n’oko syongubi, n’Abalawi abaghala ba Asafu ibane n’amasengo,* mubahangana bamapipa Yehova erikwamana n’emiteghekerere eyo Omwami Daudi we Israeli anabya inyabirihiraho.
11 Neryo mubatsuka eryimba, abaghuma ibanemusubirya oko lwimbo lw’abandi, ibanemupipa Yehova n’erimuha ewasingya kusangwa ni mubuya, olwanzo lwiwe oluteleghula oko Israeli ni lwa kera na kera. Neryo abandu bosi mubasumba emilenge bamapipa Yehova omo mulenge muli, kusangwa efondasyo y’enyumba ya Yehova yabya iyamabihimbwa.
12 Abahereri bangyi, Abalawi, n’abakulu b’ebitunga—abasyakulu abalola oko nyumba ya kera—mubalira omo mulenge muli omughulu efondasyo y’enyumba eyi yahimbawa. Aliwe abandi bangyi, ibo babya ibanemusumba emilenge y’obutseme.
13 Neryo abandu mobatatoka eriminyerera emilenge y’obwogho bw’obutseme, n’emilenge y’ekiriro, kusangwa abandu mubuta obwogho bunene erihika oko kika emilenge yamabya ikowikira hali.
Amaelezo awehikwa
^ Kinywa kwa kinywa, “abaghala ba Israeli.”
^ Kinywa kwa kinywa, “amahere busana n’emighenda mihya-mihya.”
^ Kutse “esyosembale; amatoazi.”
