Ezra 4:1-24
4 Esyonzighu sya Yuda na Benyamini syabere syabyowa ngoko abanyewa abasubula banemuhimbira Yehova oMungu wa Israeli y’ehekalu,
2 mubalw’ibaya eyiri Zerubabeli n’abakulu b’ebitunga by’abotata-kulu. Mubabwirabo bati: “Muleke tuhimbe haghuma nenyu, kusangwa netu tukaramaya* oMungu wenyu nga nywe. Kandi eritsuka oko biro by’Omwami Esari-hadoni we Asiria oyo watuleta hano, tunemuherera oMungu wenyu y’amahere.”
3 Nikwa Zerubabeli, Yesua, n’abakulu b’ebitunga by’Abaisraeli mubasubiryabo bati: “Simuwite ehamuli yosi-yosi y’erihimba haghuma netu enyumba y’oMungu wetu, kusangwa itwibene-bene tukendihimba enyumba ya Yehova Mungu wa Israeli, ngoko omwami Koreshi we Persia anatulayira.”
4 Neryo abandu b’omo bihugho ebyabya bibatimbireko, mubabya bakabuna abandu be Yuda b’omutima, n’eryubahyabo batoke eryumbya erihimba.
5 Mubaliha abahani balwe nabo n’eribulungania omupango wabo w’erihimba, omo biro byosi by’Omwami Koreshi we Persia, erihika oko butabali bw’Omwami Dario we Persia.
6 Oko nzuko y’obutabali bw’Omwami Ahasuero, mubahandika ebaruha y’eritsongera abikalani be Yuda ne Yerusalema.
7 N’omo biro by’Omwami Artashasta we Persia, Bisilamu, Metredati, Tabeeli, n’abandi balikyabo, mubahandikira Omwami Artashasta y’ebaruha. Mubabindula ebaruha eyo omo Kiaramu, bamahandikayo omo herufi sy’Ekiaramu.*
8 * Rehumu, eseghu-seghu y’omo butabali, na Shimshai omuhandiki, mubahandikira Omwami Artashasta y’ebaruha ey’eritsongera e Yerusalema. Yabya yibughire yiti:
9 (Abahandikayo ni Rehumu, eseghu-seghu y’omo butabali, na Shimshai omuhandiki, n’abandi balikyabo, abatsweri, abatabali bake-bake, abahandiki, abandu be Ereki, Abababiloni, n’abikalani be Susa ni bugha ambu Abaelamu,
10 n’ebindi bihanda ebyo omukulu n’ow’olukengerwa Asenapari aleta omo bunyewa n’eriikalyabo e Samaria, n’abandi b’omo biharo by’Eyisirya w’Olusi,* neryo
11 ebaruha eyo bamutumira yabya yibughire yiti:)
“Oko Mwami Artashasta. Erilua oko baghombe baghu, abalume b’omo kiharo ky’Eyisirya w’Olusi:* Neryo
12 omwami aminye ngoko Abayahudi abasa eno bakalua eyo uli, babirihika e Yerusalema. Banemutasyahimba omuyi mubi kandi owakayisamambula, banemubughirira esyombimbo, n’eritasyakokotya efondasyo.
13 Neryo lino, omwami aminye ngoko omuyi oyu amabitasyahimbwa, n’esyombimbo syagho syamabihwererera erihimbwa, isibendibya bakatasyaliha omusolo, engemu, kutse ebitase by’enzira. Neryo ebikingira omo bighona by’abami ibikendikeha.
14 Neryo kundi oko bwikalo* bw’omwami ho tukalusaya omunyu,* kandi kundi sitwanzire tukalangira emyatsi y’omwami ikaghenda kitya-kitya, twamatumira omwami y’ebaruha eno erimuminyisya omwatsi oyo,
15 erikwesa-kwesa ritoke erikolwa omo bitabu by’abotata-kulu waghu. Ukendibya wabilebya omo kitabu ekirimo emyatsi ekyo, ukendiminya ngoko omuyi oyu ni muyi owakayisamambula, owakaghalaya abami n’esyongabiro,* kandi ngoko atula akabyamo abandu abakatsukisaya omulele; kyo kyaleka omuyi oyu inyatsandibwa.
16 Neryo tukaminyisaya omwami ngoko omuyi oyu amabitasyahimbwa, n’esyombimbo syagho syamabihwererera erihimbwa, isiwenditasyabya n’eky’eribugha* oko kiharo ky’Eyisirya w’Olusi.”
17 Omwami mwasubirya Rehumu eseghu-seghu y’omo butabali, na Shimshai omuhandiki, n’abandi balikyabo ababya bikere e Samaria, n’abandi b’omo kiharo ky’Eyisirya w’Olusi ati:
“Namabaramukya! Neryo,
18 ebaruha eyo mwatutumira, yabirisomwa* ndeke-ndeke embere syaghe.
19 Mungahamula niti, erikwesa-kwesa rikolawe. Neryo mokikalangirikira ngoko erilua kera, omuyi oyu akalwa n’abami kandi akabyamo omulele n’eriyisamambula.
20 Abami b’amaka babiritabala oko Yerusalema, kandi ibakatabala oko kiharo kyosi ky’Eyisirya w’Olusi. Abami abo ibakalihawa omusolo, engemu, n’ebitase by’enzira.
21 Neryo lino mulayire muti, abalume abo balekere omubiiri w’aho. Omuyi oyo isyasyahimbawa erihika omughulu ngendisyahamula.
22 Isimwalenza-lenzaya omwatsi oyu. Emyatsi y’omwami siyisyalola embere erighenda kitya kitya.
23 Neryo ebaruha y’Omwami Artashasta muyabya yabisomerwa embere sya Rehumu na Shimshai omuhandiki, n’abandi balikyabo, mubalw’ibaya e Yerusalema eyiri Abayahudi. Mubimania omubiiri wabo wo kinyanganga.
24 Neryo omubiiri w’enyumba y’oMungu eyabya e Yerusalema mwimana. Mwimana erihika oko mwaka w’akabiri w’obutabali bw’Omwami Dario we Persia.
Amaelezo awehikwa
^ Kinywa kwa kinywa, “tunemusondya-sondya.”
^ Kutse alinga, “muyahandikwa omo Kiaramu neryo enyuma sy’aho yamabindulwa omo ghundi mubughe.”
^ Ezr 4:8 erihika oko Ezr 6:18 yabya yihandikire omo Kiaramu.
^ Kutse “ekiharo ky’oko lundi luhande lwe Efrati.”
^ Kutse “ekiharo ky’oko lundi luhande lwe Efrati.”
^ Kutse “ekikali.”
^ Kutse “oko bwikalo b’omwami ho tukalusaya omusahara wetu.”
^ Kutse “ebiharo by’obutabali.”
^ Kinywa kwa kinya, “erighabo.”
^ Kutse alinga, “yabiribindulwa omo ghundi mubughe, n’erisomwa.”
