Ezra 5:1-17
5 Neryo omuminyereri Hagai n’omuminyereri Zekaria omwitsikulu wa Ido, mubabwira Abayahudi ababya e Yuda ne Yerusalema obuminyereri omo rina ry’oMungu wa Israeli oyo wabya akasondolabo.*
2 Neryo Zerubabeli mughala wa Salatieli na Yesua mughala wa Yehozadaki mubatsuka eritasyahimba enyumba y’oMungu eyabya e Yerusalema. N’abaminyereri b’oMungu babya haghuma nabo kandi mubawatikyabo.
3 Oko mughulu oyo Tatenai omuguvernere we kiharo ky’Eyisirya w’Olusi,* na Sheteri-bozenai n’abalikyabo mubasa eyo bali. Mubabulyabo bati: “Nindi yulyabaha ehamuli y’erihimba enyumba eyi n’eribughirira obuhimbe?”*
4 Kandi mubabulyabo bati: “Mwanganatubwira amena w’abalume abakahimba enyumba eyi?”
5 Nikwa oMungu abya inyanemulanda* oko basyakulu b’Abayahudi. Neryo abalume abo mubatimania omubiiri wabo kundi babya banzire eritsuka batumira Dario y’omulaghe owalebirye omwatsi oyo, n’erilinda ekisubiryo kiwe oko mwatsi oyo.
6 Eno ye baruha eyo Tatenai omuguvernere w’ekiharo ky’Eyisirya w’Olusi na Shetari-bozenai n’abalikyabo, abatabali bake-bake b’ekiharo ky’Eyisirya w’Olusi, batumira Omwami Dario;
7 mubamutumira omulaghe. N’ebyo bahandika bya bino:
“Oko Mwami Dario:
“Twamakusunzira obuholo bunene!
8 Omwami aminye ngoko mutwayire omo ngabiro* ye Yuda eyiri enyumba y’oMungu mukulu. Enyumba eyo inemuhimbwa omo mabwe manene-mane awakakumbaghaliribawaho, n’esyombagho sinemuhirwa omo syombimbo. Abandu banemukola omubiiri n’omuhwa kandi anemulola embere omo kaghala kabo.
9 Mutwabulya abasyakulu babo. Mutwabulyabo tuti: ‘Nindi yulyabaha ehamuli y’erihimba enyumba eno n’eribughirira obuhimbe?’*
10 Mutwabulyabo amena w’abahanganire omubiiri oyo, twangahandikagho, neryo iwatoka eriminyagho.
11 “Kino kye kisubiryo kyabo: ‘Tuli baghombe b’oMungu w’olubula n’ekihugho, kandi tukatasyahimba enyumba eyahimbawa kera-kera eyo omwami mukulu wa Israeli ahimba n’eryusulya.
12 Nikwa kundi abotata wetu mubahitania oMungu w’elubula, mwahirabo omo byala by’Omwami Nebukadeneza owe Babiloni, Omukaldayo. Mwahimbula enyumba eyi, n’eritwala abandu b’omo bunyewa e Babiloni.
13 Nikwa oko mwaka w’erimbere w’Omwami Koreshi we Babiloni, Omwami Koreshi mwahamula ati enyumba y’oMungu eyi, yitasyahimbawa.
14 Neryo ebindu by’efeza* n’eby’ehoro eby’enyumba y’oMungu ebyo Omwami Nebukadeneza alusaya omo hekalu e Yerusalema n’erihirabyo omo hekalu ye Babiloni, Omwami Koreshi mwahulukyabyo omo hekalu ye Babiloni amahabyo Sheshbazari,* oyo Koreshi ayira mo muguvernere.
15 Koreshi mwamubwira ati: “Wimaye ebindu ebi, ughende uyahirebyo omo hekalu e Yerusalema, n’enyumba y’oMungu itasyahimbawa aho yanabya kera.
16 Neryo omulume oyo ye Sheshbazari mwasa amahimba efondasyo y’enyumba y’oMungu eyiri e Yerusalema; eritsuka oko mughulu oyo erihika na lino inemuhimbwa, siyiriyusula.
17 “Neryo kyamabitsemesya omwami, erikwesa-kwesa rikolawe omo nyumba eyikabikawamo ebindu by’obughuli e Babiloni, erilebya Koreshi nga mwanahamula ati enyumba y’oMungu eyiri e Yerusalema yitasyahimbawa. Kandi omwami atutumire eriyisogha liwe oko mwatsi oyu.”
Amaelezo awehikwa
^ Kinywa kwa kinywa, “oyo wabya endata kubo.”
^ Kutse “ekiharo ky’oko lundi luhande lwe Efrati.”
^ Kutse “ebisingiti.”
^ Kinywa kwa kinywa, “eriso ry’oMungu lyabya oko.”
^ Kutse “ekiharo ky’obutabali.”
^ Kutse “ebisingiti.”
^ Ni kindu ky’obughuli ekikalua omo kitaka.
