Ezra 7:1-28
7 Enyuma sy’emyatsi eyi, omo butabali bw’Omwami Artashasta we Persia, Ezra* mwasubula. Abya mughala wa Seraya, mughala wa Azaria, mughala wa Hilkia,
2 mughala wa Shalumu, mughala wa Zadoki, mughala wa Ahitubu,
3 mughala wa Amaria, mughala wa Azaria, mughala wa Merayoti,
4 mughala wa Zerahia, mughala wa Uzi, mughala wa Buki,
5 mughala wa Abishua, mughala wa Finehasi, mughala wa Eleazari, mughala wa Haruni omuhereri mukulu.
6 Ye Ezra oyu mwalua e Babiloni. Abya muhandiki* oyo wasi* Emighambo ya Musa yo ndeke, eyo Yehova oMungu wa Israeli ahiraho. Omwami mwamuha ebyosi ebyo asaba, kusangwa ebyala bya Yehova Mungu wiwe byabya okw’iye.
7 Abaisraeli balebe, abahereri, Abalawi, abimbi, abateya b’esyongyo, n’abaghombe b’ehekalu,* mubaya e Yerusalema omo mwaka we 7 w’Omwami Artashasta.
8 Na Ezra mwahika e Yerusalema oko mwisi w’akatano oko mwaka we 7 w’omwami.
9 Mwatsuka olughendo lw’erilua e Babiloni oko kiro ky’erimbere ky’omwisi w’erimbere. Mwahika e Yerusalema oko kiro ky’erimbere ky’omwisi w’akatano, kusangwa ebyala bibuya by’oMungu wiwe byabya okw’iye.
10 Ezra abya iniabiriteghekania omutima* wiwe eriyiteghererya Emighambo ya Yehova n’erikolesyayo, n’erikangirirya ebihano n’eritswera eritunganene ry’Emighambo omo Israeli.
11 Eno y’ekopi y’ebaruha eyo Omwami Artashasta aha Ezra omuhereri, kandi omuhandiki,* oyo wabya akigha* ndeke Emighambo n’ebihano bya Yehova ebyo aha Abaisraeli:
12 * “Erilua oko mwami w’abami, ingye Artashasta oko Ezra omuhereri, omuhandiki* w’Emighambo y’oMungu w’elubula: Ubye n’obuholo bunene. Neryo, lino
13 nabirihamula niti omo butabali bwaghe, obuli mundu omo Baisraeli n’abahereri babo oyo wanzire erighenda haghuma naghu e Yerusalema, aghende.
14 Kusangwa omwami n’abahani biwe 7 bo bakakutuma eriyalebya Emighambo y’oMungu waghu eyo uwiteko* nga yinemukwamwa ndeke e Yuda ne Yerusalema.
15 Ukendiheka efeza* n’ehoro eyo omwami n’abahani biwe balyaha oMungu wa Israeli mo kihembo, oyo obwikalo bwiwe buli e Yerusalema,
16 n’efeza yosi n’ehoro eyo ukendihabwa* omo ngabiro* yosi ye Babiloni, haghuma n’ebihembo ebyo abandu n’abahereri balyateka busana n’enyumba y’oMungu wabo eyiri e Yerusalema.
17 N’oko syofranga esi, ukendilw’iwaghulako esyonume sy’esyonde, esyombangale, ebyana by’esyombuli, haghuma n’obuhere bwasyo bw’eyisyano n’obuhere bwasyo bw’obwabu. Neryo ukendiletabyo oko kiherero ky’enyumba y’oMungu waghu eyiri e Yerusalema.
18 “N’efeza* n’ehoro ebikendisaka, iwe n’abaghala benyu, mukendikolesyabyo ngoko mukendyanza erikwamana n’erisonda ly’oMungu wenyu.
19 N’ebindu byosi ebyo ukahabawa ebikendibya bikakolesibwa omw’iramya omo nyumba y’oMungu waghu, ukenditwalabyo embere sy’oMungu e Yerusalema.
20 N’ebindu byosi ebikisiya ebyangalawako omo nyumba y’oMungu waghu ebyo litolere iwateka, ukendisyalihabyo oko syofranga sy’omo kighona ky’obwami.
21 “Ingye, Mwami Artashasta, nabirihamula abosi abakateghaya ebighona by’omo kiharo ky’Eyisirya w’Olusi* niti ekindu kyosi-kyosi ekyo omuhereri Ezra, omuhandiki* w’Emighambo y’oMungu w’elubula angabasaba, litolere imwamuhakyo luba,
22 erihika oko syotalanta* 100 sy’efeza, ehilengyi 100 hy’ekori* ehy’engano, ehilengyi 100 hy’ebati* ehy’edivai, ehilengyi 100 hy’ebati ehy’amaghuta, n’omunyu butsir’ighanza.
23 Ekyosi-kyosi ekyo oMungu w’elubula akasaba, kikolawe n’omuhwa busana n’enyumba y’oMungu w’elubula, oMungu w’elubula akasyahitana oko mwami n’abaghala biwe.
24 Kandi mukahanawa ngoko simuhamulirwe erisaba omusolo wosi-wosi, engemu, kutse ekitasi kyosi-kyosi ky’enzira oko bahereri n’Abalawi, abimbi, abateya b’esyongyo, abaghombe b’ehekalu,* n’abakoli b’omo nyumba y’oMungu.
25 “Naghu, Ezra, erikwamana n’amenge agho uwite agho oMungu waghu* abirikuha, uhireho abasohi b’esyombanza n’abatsweri, babye bakatswera abandu bosi b’omo kiharo ky’Eyisirya w’Olusi, abosi abasi Emighambo y’oMungu waghu; n’omundu oyutasiyo, litolere imwamukangiriryayo.
26 N’omundu wosi-wosi oyutesikaya Emighambo y’oMungu waghu kutse emighambo y’omwami, litolere iniatswerwa luba, lyangabya eritswerwa oluholo, erihiwa, erihanula, kutse eribohwa.”
27 Yehova oMungu w’abotata-kulu wetu apipawe, oyulyakuna omutima w’omwami erighambya enyumba ya Yehova eyiri e Yerusalema.
28 Kandi abirinikangania olwanzo lwiwe oluteleghula, omw’ikuna omwami n’abahani biwe n’abatabali bosi b’amaka ab’omwami erinikangania olukogho. Neryo munabana obutubaha,* kusangwa ebyala bya Yehova, oMungu waghe byabya okw’ingye. Neryo munahindania abasondoli* b’Abaisraeli erighenda haghuma naghe.
Amaelezo awehikwa
^ Rikamaanisaya “Obuwatikya.”
^ Kutse “omusakangyi; omuntombe.”
^ Kutse “abya muhandiki oyukalire we.”
^ Kutse “Abanetimu.” Kinywa kwa kinywa, “abahabawa.”
^ Kutse “abya iniabiriyisogha omo mutima wiwe.”
^ Kutse “omusakangyi; omuntombe.”
^ Kutse “omuhandiki w’ebinywa.”
^ Ezr 7:12 erihika oko Ezr 7:26, yahandikawa omo Kiaramu.
^ Kutse “omusakangyi; omuntombe.”
^ Kinywa kwa kinywa, “eyiri omo byala byaghu.”
^ Ni kindu ky’obughuli ekikalua omo kitaka.
^ Kinywa kwa kinywa, “eyo ukendibana.”
^ Kutse “engabiro y’obutabali.”
^ Ni kindu ky’obughuli ekikalua omo kitaka.
^ Kutse “ekiharo ky’oko lundi luhande lwe Efrati.”
^ Kutse “omusakangyi; omuntombe.”
^ Etalanta nguma ini grama 34.2. Ulebaye Endomeko B14.
^ Ekori nguma ini litre 120. Ulebaye Endomeko B14.
^ Ebati nguma ini litre 22. Ulebaye Endomeko B14.
^ Kutse “Abanetinimu.” Kinywa kwa kinywa, “ababirihabwa.”
^ Kinywa kwa kinywa, “erikwamana n’amenge w’oMungu waghu awali omo byala byaghu.”
^ Kutse “munayikalya-kalya.”
^ Kinywa kwa kinywa, “emitwe.”
