Ezra 8:1-36
8 Aba ba bakulu b’ebitunga by’abotata wabo n’erihandikwa erikwamana n’ebizazi* ly’abahetuka haghuma naghe erilua e Babiloni omo mughulu w’obutabali bw’Omwami Artashasta:
2 oko baghala ba Finehasi, Gershomu; oko baghala ba Itamari Danieli; oko baghala ba Daudi, Hatushi;
3 oko baghala ba Shekania, oko baghala ba Paroshi, Zekaria, na haghuma naye muhahandikwa abalume 150;
4 oko baghala ba Pahati-moabu, Eliehoenai mughala wa Zerahia, na haghuma naye abalume 200;
5 oko baghala ba Zatu, Shekania, mughala wa Yahazieli, na haghuma naye abalume 300;
6 oko baghala ba Adini, Ebedi, mughala wa Yonatani, na haghuma naye abalume 50;
7 oko baghala ba Elamu, Yeshaya, mughala wa Atalia, na haghuma naye abalume 70;
8 oko baghala ba Shefatia, Zebadia, mughala wa Mikaeli, na haghuma naye abalume 80;
9 oko baghala ba Yoabu, Obadia, mughala wa Yehieli, na haghuma naye abalume 218;
10 oko baghala ba Bani, Shelomiti, mughala wa Yosifia, na haghuma naye abalume 160;
11 oko baghala ba Bebai, Zekaria, mughala wa Bebai, na haghuma naye abalume 28;
12 oko baghala ba Azgadi, Yohanani, mughala wa Hakatani, na haghuma naye abalume 110;
13 oko baghala ba Adonikamu, ababya b’omwiso, amena wabo w’aya: Elifeleti, Yeieli, na Shemaya, na haghuma nabo, abalume 60;
14 n’oko baghala ba Bigvai, Utai na Zabudi, na haghuma nabo abalume 70.
15 Munahindaniabo ahali olusi olukaya e Ahava. Mutwikalaho omo kambi omo biro bisatu. Nikwa nabere nayiteghererya abandu n’abahereri, mundalangiraho Omulawi n’omughuma.
16 Neryo munabirikira Eliezeri, Arieli, Shemaya, Elnatani, Yaribu, Elnatani, Natani, Zekaria, na Meshulamu, ababya bakulu. N’abakangirirya, ye Yoyaribu na Elnatani.
17 Neryo munatumabo oko Ido, omusondoli w’ahakahulawa mo Kasifia. Munabwirabo niti babwire Ido n’abaghala babo, abaghombe b’oko hekalu* ababya e Kasifia, bati batutumire abandu b’erikola emibiiri omo nyumba y’oMungu wetu.
18 Kusangwa ebyala bibuya by’oMungu wetu byabya okw’itwe, mubatuletera omulume w’amenge ow’oko baghala ba Mali, omwitsikulu wa Lawi mughala wa Israeli, ni bugha ambu ye Sherebia n’abaghala biwe n’abaghala babo, abalume 18;
19 na Hashabia, na haghuma naye Yeshaya erilua oko Bamerari, n’abaghala babo n’abana babo b’obulume, abalume 20.
20 Habya n’abaghombe b’ehekalu* 220 abo Daudi n’abanya-mwami bahiraho busana n’eriwatikya oko mubiiri w’Abalawi. Abosi amena wabo abya inyanahandikire omo kitabu.
21 Neryo munabugha niti habye amafungo oko lusi lwe Ahava, itwatoka eriyikehya embere sy’oMungu wetu, tumusabe obusondoli olughendo lutoke erighenda ndeke busana netu, n’abana betu, n’ebindu byetu byosi.
22 Munakwa esisoni sy’erisaba omwami y’abasuda n’abandu abakaghenda oko syosabayiri ab’erituteya oko syonzighu esiri omo nzira, kusangwa twabya itwabiribwira omwami tuti: “Ebyala bibuya by’oMungu wetu biri oko bosi abakamusonda-sonda, nikwa obutoki bwiwe n’erihitana liwe bikalwa n’abosi abakamusigha.”
23 Neryo mutwakola amafungo n’erisaba oMungu wetu busana n’omwatsi oyu, naye mwowa erilaka lyetu.
24 Neryo oko bakulu b’abahereri, munahighulako abahereri 12, ni bughambu, ye Sherebia na Hashabia n’abandi baghala babo 10.
25 Neryo munalengerabo efeza,* ehoro, n’ebindu, n’ebihembo ebyo omwami n’abahani biwe n’abatabali biwe n’Abaisraeli bosi ababyayo, bateka busana n’enyumba y’oMungu wetu.
26 Munalenga n’eriwatyabo esyotalanta* 650 sy’efeza,* n’ebindu 100 eby’efeza eby’obughuli bw’esyotalanta 2; esyotalanta 100 sy’ehoro,
27 ebibindi bike-bike 20 eby’ehoro eby’obughuli bw’esyodariki* 1 000, ebindu 2 eby’ekwivre* eyuwene eyikakangabasanaya ng’erangyi y’omusasi, ebighambire ng’ehoro.
28 Neryo munabwirabo niti: “Oko Yehova, mubuyirire n’ebindu ebi bibuyirire, n’efeza* n’ehoro ni bihembo ebiryahabawa Yehova oMungu w’abotata-kulu wenyu.
29 Muteghayebyo ndeke erihika omughulu mukendisyalengabyo embere sy’abakulu b’abahereri, n’Abalawi, n’abakulu b’ebitunga by’abotata-kulu b’Abaisraeli omo byumba by’omo nyumba* ya Yehova.”
30 Neryo abahereri n’Abalawi mubimya efeza,* ehoro, n’ebindu ebyo balengerawa bangaletabyo e Yerusalema omo nyumba y’oMungu wetu.
31 Neryo oko nduli, oko kiro kye 12 ky’omwisi w’erimbere, mutwalua oko lusi lwe Ahava tukaya e Yerusalema, n’ebyala by’oMungu wetu byabya okw’itwe. Kandi oMungu mwatulamya oko byala by’enzighu n’oko babandi b’omo nzira.
32 Neryo mutwahika e Yerusalema, twamabugha ebiro bisatu.
33 Oko kiro ky’akani, mutwalengera efeza,* ehoro, n’ebindu omo nyumba y’oMungu wetu, twamahirabyo omo byala bya Meremoti mughala wa Uriya omuhereri. Haghuma naye habya Eleazari mughala wa Finehasi. Babya haghuma n’Abalawi ye Yezabadi mughala wa Yesua, na Noadia mughala wa Binui.
34 Obuli kindu mukyaghanzwa n’erilengwa. N’ebilo byosi mubyahandikwa.
35 Abalua omo bunyewa, ni bugha ambu abatwalawa omo bunyewa kera, mubaherera oMungu wa Israeli y’amahere w’eryokererya. Esyonume sy’esyonde 12 busana n’Abaisraeli bosi, esyombangale 96, esyombangale esikine silere 77, n’esyombaya 12 mo buhere bw’erilolo. Ebyosi ebi, byabya buhere bw’eryokererya busana na Yehova.
36 Neryo mutwaha abahanganiri* b’omwami n’abaguvernere b’ekiharo ky’Eyisirya w’Olusi* erihamula ly’omwami. Neryo mubawatikya abandu n’eriwatikya enyumba y’oMungu w’ekwenene.
Amaelezo awehikwa
^ Kutse “esyondengo.”
^ Kutse “Abanetinimu.” Kinywa kwa kinywa, “abahabawa.”
^ Kutse “Abanetinimu.” Kinywa kwa kinywa, “abahabawa.”
^ Ni kindu ky’obughuli ekikalua omo kitaka.
^ Etalanta nguma ini kilograme 34.2. Ulebaye Endomeko B14.
^ Ni kindu ky’obughuli ekikalua omo kitaka.
^ Edariki kyabya kitsere kye Persia. Ulebaye Endomeko B14.
^ Kutse “omulinga.”
^ Ni kindu ky’obughuli ekikalua omo kitaka.
^ Kutse “ebyumba by’eriliramo.”
^ Ni kindu ky’obughuli ekikalua omo kitaka.
^ Ni kindu ky’obughuli ekikalua omo kitaka.
^ Erina ly’olukengerwa erikamaanisaya abateya b’obutabali. Hano likakolesibwa oko baguvernere b’esyongabiro omo butabali bwe Persia.
^ Kutse “ekiharo ky’oko lundi luhande lwe Efrati.”
