Ezra 9:1-15
9 Emyatsi eyi yabere yabinakolwa, abanya mwami mubasa eyo niri. Mubabugha bati: “Abaisraeli, abahereri, n’Abalawi, sibetayihighula oko bandu b’omo bihugho ebi n’oko mikolere yabo eyikita nye, ey’Abakanana, Abahiti, Abaperezi, Abayebusi, Abaamoni, Abamoabu, Abamisri, n’Abaamori.
2 Babiritahya oko bambesa babo, n’eritahirya kubo abana babo b’obulume. Neryo ibo, olubuto olubuyirire, babiritswangana n’abandu b’omo bihugho ebyo. Abanya mwami n’abatabali, bo bali embere-mbere omw’ikola erilolo eryo.”
3 Nabere nabinowa omwatsi oyu, munatulanga esyongyimba syaghe n’erikoti lyaghe eriteko maboko. Munapuranga n’oko syonzwiri syaghe n’oko syonderu syaghe. Kandi munikala ahisi inabirikukubala.
4 Neryo abandu bosi ababya bakubaha* ebinywa by’oMungu wa Israeli, mubayihindania hakuhi naghe busana n’erilolo ly’abandu abalua omo bunyewa. Nabya ininikere ahisi ininakukubere erihika oko ndambi y’eriherera obuhere bw’eyisyano obw’erigholo-gholo.
5 Neryo oko ndambi y’eriherera obuhere bw’eyisyano obw’erigholo-gholo, munakuka-kuka aho nabya nikere omw’ihemuka lyaghe. Esyongyimba syaghe n’erikoti lyaghe eriteko amaboko, byabya ibinatulangikire. Munakukama n’erisumbira Yehova oMungu waghe y’ebyala byaghe.
6 Munabugha niti: “Mungu waghe, nabirikuta-kuta, kandi nabirikwa esisoni sy’erikusumbira obusu bwaghe, kusangwa amalolo wetu abirikanyirira oko mitwe yetu, n’olubanza* lwetu lwabikanyirira erihika elubula.
7 Eritsuka oko biro by’abotata-kulu wetu erihika munabwire, olubanza* lwetu lwabiribya lunene. Kandi busana n’amalolo wetu, itwe, abami betu, n’abahereri betu, twabirihirwa omo byala by’abami b’ebihugho, n’erihabwa oko muyali, oko bunyewa, okw’ihungwa, n’okw’ikuta-kuta erihika munabwire.
8 Aliwe lino omo katambi kake, Yehova Mungu wetu abiritukangya olukogho, omw’ileka emisighalira ibale, n’erituha obuteya* omo habuyirire hiwe, ameso wetu akoleraye, iwe Mungu wetu, n’erituluhukya hake oko bukobe bwetu.
9 Kusangwa nomo tune bakobe, oMungu wetu syetatulekerania omo bukobe bwetu; nikwa abiritukangania olwanzo lwiwe oluteleghula* embere sy’abami be Persia, eritusubya twangahangania enyumba y’oMungu wetu n’eritasyahimba ebisambukalirya byayo, n’erituha oluhimbo* lw’amabwe e Yuda ne Yerusalema.
10 “Neryo lino enyuma w’emyatsi eyi, tutasyabugha tutiki Mungu wetu? Kusangwa twabirisighania ebihano byaghu
11 ebyo watuha erilabira abaghombe baghu abaminyereri uti: ‘Ekihugho ekyo mukayamo erimyakyo mo mwandu wenyu, ni kihugho ekiterire busana n’obutsandirya bw’abandu b’ebihugho; babiryusulya ekyosi mo butsandirya busana n’emikolere yabo eyikita nye.
12 Neryo busana n’ekyo, isimwaha abana babo b’obulume b’abana benyu b’obukali, kutse erimirya abana benyu b’obulume b’abana babo b’obukali, kandi isimwakola ekyosi-ekyosi ekyangaleka ibabya omo buholo kutse eribya n’engebe eyuwene. Neryo imukendibya n’amaka n’erirya ebibuya by’ekihugho ekyo, n’erimyakyo mo mwandu busana n’abana benyu b’obulume kera na kera.’
13 Enyuma sy’erihikirwa n’emyatsi yosi mibi eyi busana n’emikolere yetu mibi n’olubanza lwetu lunene—aliwe nomo bine bitya, iwe Mungu wetu, siwetatukolera erikwamana n’erilolo lyetu kandi wabirileka abaghuma b’oko abo tuli nabo hano, ibabala oko bunyewa—
14 neryo kandi tutasyaketa ebihano byaghu n’eritahania* n’abandu abakakola emyatsi eyikita nye eyi kwehi? Isiwendituhitanako kutsibu kwehi n’erilw’iwatutoghotya ihatabya n’omughuma oyukasighala kutse oyukabala?
15 Iwe Yehova Mungu wa Israeli, utunganene, kusangwa twabiribala erihika munabwire eribya misighalira. Yono tune embere syaghu omo lubanza lwetu, kusangwa sikitokekene eriimana embere syaghu busana n’eki.”
Amaelezo awehikwa
^ Kinywa kinywa, “abatitimana busana ne.”
^ Kutse “omusango.”
^ Kutse “omusango.”
^ Kinywa kwa kinywa, “engondo; piquet.”
^ Kutse “olwanzo olutyusa.”
^ Kutse “oluhimbo lw’obuteya.”
^ Kutse “erisakana nabo omo ndwa.”
