Ebaruha oko Filemo 1:1-25
1 Ebaruha eno ikalua oko Paulo, oyubohirwe busana na Kristo Yesu, na Timoteo mughala wetu. Ngatumirayo Filemo, mwanzwa wetu, oyo tukakolera naye Omukama.
2 Kandi ngatumirayo mwali wetu Afia, Arkipo, omusuda mulikyetu, n’endeko eyikahindana omo nyumba ya Filemo.
3 Olukogho n’obuholo bw’oMungu Tata wetu n’Omukama Yesu Kristo bibye haghuma nenyu.
4 Ngabya ininemusima oMungu omughulu ngakuhira omo misabe yaghe,
5 kundi ngabya ininemwowa ngoko wikirirye, ngoko wanzire Omukama Yesu, kandi ngoko wanzire ababuyirire bosi.
6 Ngasaba niti obwikirirya obo uli nabo obuli ng’obw’abandi bukuwatikaye eriminya ebibuya byosi ebyo twabiribana erilabira Kristo.
7 Kundi munatsema kutsibu kandi munakiranibwa omughulu nowa ngoko wanzire Abakristo balikyenyu. Mughala wetu, wabirikirania emitima y’ababuyirire.
8 Busana n’ekyo, nomo oko myatsi eyilebirye Kristo, ninahamulirwe erikubwira ekyo utolere iwakola,
9 ngalebaya ikyuwene erikulemba-lemba niti ukolekyo busana n’olwanzo lwaghu, kundi ingye Paulo nabiribya musyakulu, kandi lino niri omo ngomo busana na Kristo Yesu.
10 Ngakulemba-lemba busana na Onesimo, mughala waghe, oyo nabiribya Tata wiwe inine n’omo ngomo.
11 Kera syabya w’omughaso okw’iwe. Aliwe lino, ni w’omughaso okw’ingye n’okw’iwe.
12 Ngamusubaya ewaghu, oyo yo nihirire omo mutima waghe.*
13 Nabya nanzire iniasighala hano, atoke eriniwatikya omo mwanya waghu omughulu ngendibya inine omo ngomo busana n’engulu mbuya.
14 Aliwe, sinanzire erikola omwatsi wosi-wosi utitanilighiragho, kusudi isiwakola omwatsi owuwene oyo omw’ikaswa, aliwe ngambe iwakolagho omwanzwa ryaghu.
15 Alinga kyo kyaleka iniakutswako omo katambi kake: utoke eritasyabya naye kera na kera,
16 butsira ng’omughombe, aliwe umukolere kulenga n’omughombe, kandi umukolere ng’omughala wenyu mwanzwa. Nimwanzire kutsibu naghu ukendimwanza kutsibu ng’omukobe, kandi ng’Omukristo mulikyenyu omo Mukama.
17 Neryo namabya iniri mwira waghu, umukokaye ndeke ngoko wanganikokirye.
18 Amabya imwakukolera ekindu ekituwene kutse iniali mw’edeni yaghu, iwanihira byoko.
19 Ingye Paulo ngakuhandikira omo byala byaghe. Ngendisyalihabyo. Nibya unasi ndeke-ndeke ngoko n’ingye nakuwatikaya eribya Mukristo.
20 Mughala wetu, ninasi ngoko ukendiniwatikya omw’ikola utya kundi uli omo bughuma n’Omukama. Uhumulikanaye omutima waghe kundi uli omo bughuma na Kristo.
21 Ninasi ngoko ukendikola ebyo ngakusaba. Kyo kyamaleka inakuhandikira ininasi ngoko ukendikola n’ebingyi kwilaba ebyo ngabugha.
22 Aliwe naghe, uniteghekaniraye aho ngendibya ngaghotsera, kundi ninasi ngoko erilabira emisabe yenyu ngendiboholwa nitoke eritasyabya haghuma nenyu.
23 Abamakutumira obuholo ni Epafrase, oyo tubohirwe naye busana n’eribya omo bughuma na Kristo Yesu,
24 na Mariko, Aristako, Dema, na Luka, abo tukakola nabo.
25 Olukogho lw’Omukama Yesu Kristo lubye haghuma n’omutima ogho mukakanganaya.
Amaelezo awehikwa
^ Kutse “yo nanzire kutsibu.”
