Engulu mbuya eyahandikawa na Luka 1:1-80
1 Abandu bangyi babiriyikasa erisondekania n’erihandika emyatsi yosi eyabiribya eyo twikwirirye kundu.
2 Abayilangirira emyatsi eyi erilua oko nzuko n’eribya baghombe abakatula omwatsi w’oMungu, babiritubwira emyatsi eyo.
3 Naghe nabiritsopolya ndeke emyatsi yosi erilua oko nzuko. Neryo nabiriyisogha erikuhandikirayo ngoko yitondekire, iwe w’olukengerwa, Teofilo.
4 Mungakola eki, utoke erikirirya kundu ngoko emyatsi yosi eyo wabirikangiriribwa ni y’ekwenene.
5 Omo biro bya Herode* omwami we Yudea, habya omuhereri mughuma erina liwe iyo Zekaria. Abya w’omo kikuto ky’abahereri ekyabya kikahulwa mo Abiya. Omukali wiwe abya w’omo kitunga kya Haruni n’erina liwe iyo Elizabeti.
6 Ababiri bosi babya batunganene embere sy’oMungu. Kandi babya bakakwama ndeke ebihano byosi n’ebyalayiro bya Yehova.*
7 Aliwe sibabya bawite omwana, kusangwa Elizabeti abya mughumba. Kandi abosi babya ibabirikekeluha.
8 Neryo kiro kighuma, Zekaria abya inyanemukola omubiiri w’obuhereri embere sy’oMungu omo kikuto ky’abahereri ekyo abyamo.
9 Erikwamana n’emiteghekere y’abahereri eyabya iyabirihirwaho, mwasombolwa eriyahisya obukwa embere sya Yehova* omo hekalu.
10 N’abandu bosi babya ibanemusabira ehihya oko ndambi y’erihisya obukwa.
11 Omumalaika wa Yehova* mwamuhulukira. Mwimana oko luhande lw’amali olw’ekiherero ky’obukwa.
12 Nikwa omughulu Zekaria alangira omumalaika, mwahangya-hangya kandi mubaha kutsibu.
13 Aliwe omumalaika mwamubwira ati: “Zekaria, isighubaha; kusangwa oMungu abiryowa omusabe waghu; na mukali waghu Elizabeti akendikubutira omwana w’obulume. Wasyamwahula mo Yohana.
14 Ukendisyatsema n’eritsanga kutsibu. N’abandu bangyi bakendisyatsema busana n’eributwa liwe.
15 Kusangwa akendisyabya mukulu omo meso wa Yehova.* Nikwa syatolere erisyanywa edivai n’ahake kutse obwabu. Akendisyusulibwa n’ekirimu kibuyirire nibya n’embere abutawe.
16 Kandi akendisyasubya abangyi b’oko bandu be Israeli oko Yehova* Mungu wabo.
17 Kandi akendisyaghenda embere sy’oMungu n’ekirimu ky’amaka kya Eliya. Akendisyasubya emitima y’abotata oko bana, n’erisubya abatyowa oko menge w’abatunganene atoke eriteghekanirya Yehova* y’abandu.”
18 Zekaria mwabwira omumalaika ati: “Ekyo kyangatokekana kiti? Kusangwa nyiri musyakulu na mukali waghe ni mukekulu.”
19 Omumalaika mwamusubirya ati: “Ingye indi Gabrieli, oyukimana embere sy’oMungu, hakuhi naye. Kandi mungatumawa erisyakania naghu n’erikuletera engulu mbuya eno.
20 Nikwa kusangwa sighutikirirya ebinywa byaghe ebikendisyabererera oko ndambi eyitolere, ukendibya mumu kandi siwenditoka eribugha erihika omughulu bikendisyabererera.”
21 Nikwa abandu babya ibanemulindirira Zekaria. Kandi mubasweka kusangwa mwatahuluka luba.
22 Omughulu ahuluka, mwatatoka eribugha nabo. N’abandu abo mubaminya ngoko abirilangira ekitiko-tiko omo hekalu. Neryo mwabya akakania nabo akakolesya ebiminyikalo by’ebyala kundi abya inyabiribya mumu.
23 Ebiro biwe by’erikola omubiiri w’oko hekalu byabere byahwa, mwasuba eka wiwe.
24 Habere halaba ebiro bilebe, mukali wiwe yo Elizabeti mwabya mukule. Mwabugha emisi itanu isyalihuluka. Abya akabugha ati:
25 “Yehova* kw’abirinyikolera atya omo biro bino. Abirinyibuka n’erinyilusyako esisoni omo kati-kati k’abandu.”
26 Omo mwisi wiwe w’endatu (6), oMungu mwatuma omumalaika Gabrieli oko muyi we Galilaya owakahulawa mo Nazareti.
27 Mwamutuma eyiri omubikira oyo wabya inyabirilaghana na Yozefu ngoko bakendilunga. Yozefu abya mwitsikulu wa Daudi. N’erina ly’omubikira oyo lyabya Maria.
28 Omumalaika mwingira n’eribugha na Maria ati: “Wahi kwe! Iwe mukali oyuliko emiyisa minene. Yehova* ali haghuma naghu.”
29 Aliwe Maria mwahangya-hangya abyowa ebinywa ebyo. Kandi mwasondekania eriminya eriramukya eryo nga rikasonda eribugha ritiki.
30 Neryo omumalaika mwamubwira ati: “Maria, isighubaha, kusangwa oMungu abirikutsemera.
31 Ukendiheka obukule n’eributa omwana w’obulume. Ukendisyamwahula mo Yesu.
32 Akendisyabya mukulu. Kandi akendisyahulwa mo Mughala w’Ow’endata Kutsibu. Na Yehova* Mungu akendisyamuha ekitumbi ky’obwami kya tata wiwe Daudi.
33 Kandi akendisyabya Mwami oko nyumba ya Yakobo kera na kera. N’Obwami bwiwe sibwendisyabya n’enduli.”
34 Nikwa Maria mwabwira omumalaika ati: “Ingye nitenataghotsera n’omulume, omwatsi oyu angatokekana ati kwehi?”
35 Omumalaika mwamusubirya ati: “Ekirimu kibuyirire kikendikuhikako. N’obutoki b’Ow’endata Kutsibu bukendisyakuswika. Na busana n’ekyo, oyukendisyabutwa akendisyahulwa mo mubuyirire, Mughala w’oMungu.
36 Kandi lebaya! Omutunga waghu ye Elizabeti, abiriheka obukule omo bukekulu bwiwe. Akendibuta omwana w’obulume. Oyukahulawa mo mughumba, abiriheka obukule. Hamabilaba emisi ndatu (6).
37 Kusangwa oko Mungu sihali ekitetokekana.”
38 Neryo Maria mwabugha ati: “Ingye indi mughombe wa Yehova;* kibye ngoko wamabugha.” Neryo omumalaika mwalua aho ali.
39 Neryo oko biro ebyo Maria mwahongoka; mwanguha akaya omo kiharo ky’ebitwa omo muyi w’omo kiharo ky’ekihanda kya Yuda.
40 Abere abingira omo nyumba ya Zekaria, mwaramukya Elizabeti.
41 Elizabeti abere owa eriramukya lya Maria, omwana oyo wabya omo nda yiwe mwasata. Na Elizabeti mwusulibwa n’ekirimu kibuyirire.
42 Kandi mwabugha n’omulenge muli ati: “Uli w’omuyisa omo kati-kati k’abakali bosi. N’omwana oyo ukendisyabuta, aliko emiyisa!
43 Namatoka niti eribana olusunzo lungana n’olu olw’erilendererwa na mama w’Omukama waghe?
44 Kusangwa omughulu nyiryowa eriramukya ryaghu, omwana oyuli omo nda yaghe mwakasata busana n’obutseme.
45 Obutseme buli n’oko mukali oyulikiriraya. Kusangwa ebinywa bya Yehova* byosi ebyo alyabwirawa, bikendisyabererera ndeke.”
46 Maria mwabugha ati: “Omutima waghe akahalamba Yehova,*
47 n’ekirimu kyaghe kikatsema kutsibu busana n’oMungu, Omulamya waghe.
48 Kusangwa abiryibuka omughombe wiwe w’obukali, omuke. Kusangwa eritsuka lino, ebizazi* byosi bikendisyanyahula mo w’omuyisa.
49 Kusangwa oMungu w’obutoki abirinyikolera emyatsi y’eriswekera, n’erina riwe ribuyirire.
50 Kandi eritsuka oko kizazi* erihika oko kindi, erighanyira riwe liri oko bosi abakamubaha.
51 Abirikola emibiiri y’amaka omo kuboko kwiwe. Abiripanza-panza abakayiheka omo mitima yabo.
52 Abirikimya ab’amaka erilua oko bitumbi by’obwami, n’erihamya abakayikehaya.
53 Abirighutya ndeke abakwire enzala omo myatsi mibuya, n’erisubulya abateke bo byala bisa.
54 Busana n’eryibuka obughanyiri bwiwe, abiriwatikya omughombe wiwe Israeli,
55 Ngoko anabwira abotata-kulu wetu Abrahamu n’olubuto lwiwe kera na kera.”
56 Maria mwikala na Elizabeti emisi ng’isatu. Neryo mwasuba eka wabo.
57 Neryo endambi muyahika Elizabeti amabuta. Mwabuta omwana w’obulume.
58 Abahimbani biwe n’abatunga biwe mubowa ngoko Yehova* abirimukangya olukogho lunene. Neryo mubatsema haghuma naye.
59 Oko kiro ky’omunani, mubasa erisyabania omwana oyo. Kandi mubasonda erimuha erina rya baba wiwe erya Zekaria.
60 Nikwa mama wiwe mwasubiryabo ati: “Iyehe, akendyahulwa mo Yohana.”
61 Neryo mubamubwira bati: “Sihali omutunga wenyu n’omughuma oyukahulawa omo rina eri.”
62 Neryo mubabulya baba wiwe y’omo biminyikalo ng’anzire omwana oyo inyahulwa mo ndi.
63 Zekaria mwasaba eky’erihandikako. Mwahandikako ati: “Erina riwe, yo Yohana.” Neryo abosi mubasweka.
64 Aho n’aho, Zekaria mwatoka eribugha, n’olulimi lwiwe mulwaghobokala. Neryo mwatsuka eripipa oMungu.
65 N’obuba mubwabya oko bahimbani babo bosi. N’emyatsi yosi eyi muyakanibwako omo kiharo kyosi ky’ebitwa kye Yudea.
66 N’abosi abowa emyatsi eyi, mubabya bakaghanirya kuyo n’eriyibulya bati: “Omwana oyu akendisyabya mundu wa muhanda wahi?” Kusangwa obutoki* bwa Yehova* bwabya haghuma naye.
67 Neryo Zekaria tata wiwe mwusulibwa n’ekirimu kibuyirire. Mwabugha obuminyereri ati:
68 “Yehova,* oMungu we Israeli apipawe; kusangwa abiritsomana abandu biwe n’erisabulabo.
69 Kandi abirituhanganirya omulamya* w’amaka omo nyumba y’omughombe wiwe Daudi.
70 Ngoko anabugha omo buno bw’abaminyereri biwe babuyirire ba kera,
71 eritulamya oko syonzighu syetu n’eritulusya omo byala by’abatuponire,
72 eritukangya obughanyiri ngoko alagha abotata-kulu wetu n’eryibuka endaghane yiwe eyibuyirire,
73 erilahirya eryalahiraya oko tata wetu Abrahamu,
74 ngoko akendisyabya abitulusya omo byala by’esyonzighu syetu, akendisyatuha olusunzo lw’erimukolera emibiiri eyibuyirire butsiry’ubaha
75 omo butaleghula n’omo butunganene embere siwe ebiro byetu byosi.
76 Nikwa iwe, mwana, ukendisyahulwa mo muminyereri w’Ow’endata Kutsibu. Kusangwa ukendisyaghenda embere sya Yehova* eriteghekania esyonzira siwe,
77 eriminyisya abandu biwe ngoko akendisabulabo omw’ighanyira amalolo wabo,
78 busana n’obughanyiri bunene b’oMungu wetu. Busana n’erighanyira eri, ekyakakala ky’emitsange kikendituhikira kikalua endata,
79 erikolerya abandu abikere omo mwirimya n’omo kitsutsu ekyangaleta oluholo, n’erisondola ebisando byetu omo nzira y’obuholo.”
80 N’omwana oyo mwakula n’eribya n’amaka omo kirimu. Kandi mwabya omo mbwarara erihika ekiro ayikanganaya oko Baisraeli.
Amaelezo awehikwa
^ Ulebaye amaana w’ebinywa.
^ Ulebaye endomeko A5.
^ Ulebaye endomeko A5.
^ Ulebaye endomeko A5.
^ Ulebaye endomeko A5.
^ Ulebaye endomeko A5.
^ Ulebaye endomeko A5.
^ Ulebaye endomeko A5.
^ Ulebaye endomeko A5.
^ Ulebaye endomeko A5.
^ Ulebaye endomeko A5.
^ Ulebaye endomeko A5.
^ Ulebaye endomeko A5.
^ Kutse “esyondengo.”
^ Kutse “olulengo.”
^ Ulebaye endomeko A5.
^ Kinywa kwa kinywa, “ebyala bya Yehova.”
^ Ulebaye endomeko A5.
^ Ulebaye endomeko A5.
^ Kinywa kwa kinywa, “erihembe ly’omulamo.” Ulebaye amaana w’ebinywa.
^ Ulebaye endomeko A5.
