Engulu mbuya eyahandikawa na Luka 10:1-42
10 Enyuma waho, Omukama mwasombola abandi bigha 70. Mwatumabo mo babiri-babiri embere siwe omo miyi yosi n’ebiharo ebyo angayiremo.
2 Neryo mwabwirabo ati: “Eby’erighesa ni bingyi, nikwa abahingyi ni bake. Busana n’ekyo, musabe Omukama w’erighesa atume abahingyi omw’ighesa liwe.
3 Neryo mughende; aliwe muyilandeko. Ngabatuma ng’ebyana by’esyombuli omo kati-kati k’esyombwa sy’omoli.
4 Isimwaheka esyofranga,* kutse akaghunza k’akalyo, kutse ebiryato. N’omo nzira isimwaramukaya mundu.
5 Omughulu mukingira omo nyumba, mubughe muti: ‘Obuholo bubye omo nyumba eno.’
6 Omo nyumba eyo mwamabya omundu oyo wanzire obuholo,* obuholo bwenyu bubye oko mundu oyo. Nikwa amabya isyalimo, obuholo bwenyu ibwabasubako.
7 Neryo mwikale omo nyumba eyo, mulye n’erinywa ebyo bakabaha; kusangwa oyukakola omubiiri atolere obuhingyi bwiwe. Isimwabya mukahuma-huma omo manyumba n’eriya omo wandi.
8 “Kandi bamabakokya omo muyi mulebe ogho mwamahikamo, mulye ebyo bamabaha.
9 Mulamaye abakoni abali mugho n’eribwirabo muti: ‘Obwami bw’oMungu bwabirihika hakuhi nenyu.’
10 Nikwa bamatendibakokya omo muyi mulebe ogho mulyingiramo, mughende omo nzira nene-nene syagho n’eribugha muti:
11 ‘Twamabakungutira n’olututu lw’omo muyi wenyu olulyasighala oko bisando byetu. Nikwa muminye ngoko Obwami bw’oMungu bwabirihika hakuhi.’
12 Ngababwira, ekiro ekyo olubanza lwe Sodomo lukendisyoloba kulenga olw’omuyi oyo.
13 “Obulighe okw’iwe, iwe Korazini! Obulighe okw’iwe, iwe Betesaida! kusangwa ebitiko-tiko ebyabirikolwa ewenyu, byalikoleka e Tiro ne Sidoni, abandu bayo kumbe babiribindula emitima yo kera-kera ibanikere omw’ibu kandi ibanambite esyongyimba sy’esaki.*
14 Busana n’ekyo, oko kiro ky’eritswera, olubanza lwe Tiro ne Sidoni lukendisyoloba kulenga olwenyu.
15 Naghu Kapernaumu, ukalengekanaya uti ukendisumbirwa endata omo kyanya? Iyehe, ukendighuswa omw’Isinda!*
16 “Oyukabahulikirira, naghe akanihulikirira. N’oyukabaghana, naghe akabya iniamanighana. Kandi oyukanighana, akabya iniamaghana n’oyo wanituma.”
17 Neryo abigha 70 mubasubula ibanatsemire. Mubabugha bati: “Mukama, omughulu tulyakolesaya erina ryaghu nibya n’esyombinga musikatwowa.”
18 Yesu mwabwirabo ati: “Namalangira Sitani iniabiritogha elubula ng’eripalya ly’obutuku.
19 Nabiribaha ehamuli y’erilyatangira esyonzoka n’esyo nge, n’obutoki bw’erikinda amaka w’esyonzighu. Kandi sihali ekikendibakola nabi.
20 Nikwa isimwatsema kundi esyombinga musikabowa, aliwe mutseme kusangwa amena wenyu abirihandikwa elubula.”
21 Oko ndambi eyo, Yesu mwatsema kutsibu erilabira ekirimu kibuyirire. Mwabugha ati: “Tata, ngakupipa embere sy’abandu, iwe Mukama w’olubula n’ekihugho; kusangwa wabiribisa ndeke emyatsi eyi oko bandu b’amenge n’abasomire, aliwe wabiribisulirayo abana balere. Inga, Tata, kusangwa ko ulyanza erikola utya.
22 Tata waghe abirinyiha emyatsi yosi. Sihali oyo wasi Omughala nga nindi kulenga Tata. Sihali n’oyo wasi Tata nga nindi kulenga Mughala. Abandu sibangaminya Tata yo ndeke Omughala atalyababisulira ye.”
23 Neryo mwabindukira abigha biwe n’eribabwira ahate abandu ati: “Abakalangira emyatsi eyo mukalangira batsemire.
24 Kusangwa ngababwira, abaminyereri bangyi n’abami bangyi mubanza erilangira emyatsi eyo mukalangira; nikwa mubatalangirayo. Kandi mubanza eryowa ebyo mukowa, nikwa mubatowabyo.”
25 Neryo omulume oyo wasi Emighambo yo ndeke mwahangana. Akasonda erilenga oko Yesu, mwabugha ati: “Mukangirirya, litolere inakolaki imo nabana engebe y’erikota?”
26 Mwamubwira ati: “Emighambo ikabugha yitiki? Ukowayo uti?”
27 Mwasubirya ati: “Litolere iwanza Yehova* Mungu waghu n’omutima waghu wosi, n’obuyingo bwaghu bosi, n’akagala kaghu kosi, n’obulengekania bwaghu bosi. Kandi iwanza mulikyenyu ngoko uyanzire.”
28 Yesu mwamubwira ati: “Wamasubirya ndeke. Ulole embere erikola utya, ukendisyabana engebe.”
29 Nikwa omulume oyo mwanza eriyikangania ngoko ni mutunganene. Neryo mwabulya Yesu ati: “Omulikyetu nindi kwehi?”
30 Yesu mwasubirya ati: “Omulume mughuma abya akandaghalira e Yeriko akalua e Yerusalema. Mwahindana n’ababandi; bamamunyeghako ebyo awite, bamamuhunza, neryo bamayighendera. Mubamusigha iniali okw’ihola.
31 Neryo kwesi, omuhereri abya inianemundaghala omo nzira eyo. Nikwa omughulu alangira omulume oyo, mwalaba oko lundi luhande lw’enzira.
32 Omulawi naye mwalabaho, amalangira omulume oyo. Naye mwalaba oko lundi luhande lw’enzira.
33 Aliwe Omusamaria mughuma oyo wabya akalaba omo nzira eyo, mwahika ahali omulume oyo. Abere abimulangira, mwamukwira obulighe.
34 Neryo mwaseghera hakuhi naye. Mwaboha ebironda biwe, amuta kubyo kw’amaghuta n’edivai. Mwamusumbira oko punda yiwe, amamutwala omo nyumba eyo abalabi bakapangamo, n’erimutwanira.
35 Engyakya, mwimya esyodinari* ibiri, amahasyo omuteya w’enyumba eyo abalabi bakapangamo, n’erimubwira ati: ‘Usulubirire omulume oyu. N’esyo ukendikolesya esilabire okw’esi, ngendisyakusubuliryasyo ngasubula.’
36 Okw’iwe, nindi oko basatu aba yo wakanganaya ngoko ni mulikyabo omulume oyo ababandi bahunza kwehi?”
37 Mwabugha ati: “Oyo wamukwira obulighe.” Neryo Yesu mwamubwira ati: “Ughende, naghu ubye ukakola utya.”
38 Neryo omughulu babya omo nzira, mubahika omo mulongo mulebe. Eyo, omukali oyukahulawa mo Marta mwamukokya eka wabo.
39 Abya na mwali wabo oyukahulawa mo Maria. Maria mwikala hakuhi n’ebisando by’Omukama inianemuhulikirira ebyo Omukama akabugha.
40 Nikwa Marta iye abya iniabirilengemeribwa n’emibiiri mingyi. Neryo mwasa ahali Yesu n’erimubwira ati: “Mukama, sulinikwira obulighe ukalangira ngoko mwali wetu abirinisighira emibiiri kwehi? Umubwire uti ase aniwatikaye.”
41 Omukama mwamusubirya ati: “Marta, Marta, ukahanga-hangaya n’eriya eyi n’eyi busana n’emyatsi mingyi.
42 Situlaghire oko myatsi mingyi; n’omughuma musa atosire. Maria iye abiriyisogha erighabo eryowene, kandi syendisyasaghulwaryo.”
Amaelezo awehikwa
^ Kinywa kwa kinywa, “akangunza k’esyofranga.”
^ Kutse “Omwira w’obuholo.”
^ Kutse “epiri, olukimba lw’ekiriro.”
^ Kutse “Hadesi,” ulebaye amaana w’ebinywa.
^ Ulebaye endomeko A5.
^ Ulebaye endomeko B14.
