Engulu mbuya eyahandikawa na Luka 11:1-54
11 Kiro kighuma Yesu abya inianemusaba. Abere abugha erisaba, omughuma w’oko bigha biwe mwamubwira ati: “Mukama, utukangiriraye ngoko twangabya tukasaba, ngoko Yohana anakangiriraya abigha biwe.”
2 Neryo mwabwirabo ati: “Omughulu mukasaba, mubughe muti: ‘Tata, erina ryaghu riyirawe mo ribuyirire. Obwami bwaghu bwase.
3 Utuhe obuli kiro akalyo ketu erikwamana n’obwagha bwetu.
4 Kandi utughanyire amalolo wetu, kusangwa netu tukaghanyira abakatukosera.* Kandi isiwaleka erilengwako rikatukinda.’”*
5 Neryo mwabwirabo ati: “Tubughe tuti uwite omwira; neryo iwaghenda eyo ali omo kati k’ekiro n’erimubwira uti, ‘Tahyee! Nibweke emikati isatu,
6 kusangwa namahikya omugheni, akalua oko lughendo kandi siniwite eky’erimuha.’
7 Nikwa omundu oyo iniasubirya iniane omo nyumba ati: ‘Uleke erinikenderya. Nabirikinga omulango, naghe haghuma n’abana baghe tune omo ngyingo; sikyenditokekana inahangana n’erikuha ekindu.’
8 Ngababwira iniakendihangana n’eriha omwira wiwe y’ebyo alaghireko. Iniakendikola atya, butsira kundi ni mwira wiwe, aliwe kundi mwakahatikana.
9 Neryo ngababwira, mulole embere erisaba, mukendibana ekyo mukasaba; mulole embere erisondya mukendibana ekyo mukasondaya; mulole embere erikongota mukendikingulirwa.
10 Kusangwa obuli mundu oyukasaba akahabawa; obuli mundu oyukasondaya akabana ekyo akasondaya; n’obuli mundu oyukakongota, akakingulirawa.
11 Ni baba wahi omo kati-kati kenyu oyo omughala wiwe amabimusaba esamaki iniamuha enzoka omo mwanya w’esamaki kwehi?
12 Kandi amamusaba eriyayi, anganamuha e nge kwehi?
13 Nomo mune babi, munasi eriha abana benyu b’ebindu bibuya. Tata wenyu oyuli elubula akendiha kutsibu okw’aho ekirimu kibuyirire oko bakamusabakyo!”
14 Yesu mwahigha embinga eyabya ikaleka omulume mughuma iniabya mumu. Embinga yabere yabilua oko mulume oyo, mwatsuka eribugha; n’abandu mubasweka.
15 Nikwa abandi mubabugha bati: “Akahigha esyombinga omo maka wa Belzebuli,* omutabali w’esyombinga.”
16 N’abandi, bakasonda erimulengako, mubabugha bati abakolere ekitiko-tiko erilua elubula.
17 Yesu mwaminya ebyo bakalengekanaya. Neryo mwabwirabo ati: “Obuli bwami obughabene bukatera, n’enyumba eyighabene ikatera.
18 Kutya na Sitani amaghabana, obwami bwiwe ibukendihangana buti kwehi? Kusangwa mukabugha muti ngahigha esyombinga omo maka wa Belzebuli.
19 Namabya ingahigha esyombinga omo maka wa Belzebuli, abana benyu ibakahighasyo omo maka wandi kwehi? Ekyo kyo kikendisyaleka abana benyu ibabatswera.
20 Aliwe namabya ingahigha esyombinga omo butoki* bw’oMungu, kwesi Obwami bw’oMungu ibwabiribahikako isimwasi.
21 Omughulu omundu w’amaka kandi oyuwite oko byamano by’amalwa akateghaya aho wiwe, ebindu biwe bikabya omo buteya.
22 Nikwa omundu w’amaka kumulenga akabya ahika n’erimukinda, akamusaghula ebyamano by’amalwa biwe byosi ebyo alue ayiketere; neryo akimaya ebindu ebyo alyamusaghula.
23 Oyute oko luhande lwaghe ini nzighu yaghe, n’oyutekuma-kuma haghuma naghe, iniakapanza-panza.
24 “Omughulu ekirimu kibi kikalua omo mundu, kikalaba ahate amaghetse kikasonda ah’eriluhukira. Neryo kikabya kyabibulaho, kikabugha kiti, ‘Ngendisuba omo nyumba yaghe eyo naluamo.’
25 Kikabya kyabihikayo, ikyeya enyumba eyo iyinabirirye kandi iyine ndeke.
26 Neryo kikahuluka n’eriyaleta ebindi birimu irinda (7); ebibi kukilenga. Neryo bikabya byabingira, ibyikalamo. Neryo oko nduli omundu oyo akabya mutsibu kwilaba erimbere.”
27 Abere anemubugha ebinywa ebi, omukali mughuma oyo wabya omo kati-kati k’endeko mwamughusako omulenge ati: “Omukali oyo wakubuta n’oyo wakunyonyesaya* atsemire.”
28 Nikwa Omukama mwabugha ati: “Ko bite bitya. Aliwe abatsemire, ba bakowa ekinywa ky’oMungu n’erikolakyo.”
29 Abandu babere banemukanya, Yesu mwabugha ati: “Ekizazi* kino ni kibi; kikasaba kiti kikolerawe ekitiko-tiko. Nikwa sikyendihabwa ekindi kitiko-tiko kite ikye n’eky’omuminyereri Yona.
30 Kusangwa ngoko Yona anabya kiminyikalo oko Banya Ninawi, n’Omughala w’omundu naye kw’anemwendibya atya oko kizazi* kino.
31 Oko kiro ky’eritswera, omwami w’obukali* w’eluhande lw’eyikwa akendisyahangana, n’erihira oko bandu b’ekizazi* kino k’olubanza; kusangwa mwalua oko nduli-nduli sy’ekihugho akasyahulikirira amenge wa Solomona. Nikwa hano hane oyulengire Solomona.
32 Oko kiro ky’eritswera, abandu be Ninawi bakendisyahangana n’erihira oko kizazi* eki k’olubanza. Kusangwa mubabya babyowa omwatsi ogho Yona abatulira, mubabindula emitima. Aliwe hano, hane oyulengire Yona.
33 Omundu akabya abyakya etala, syalihirayo ahabisamire, kutse omo kitiri. Nikwa akahirayo ahayisumbire, abakingira omo nyumba batoke erilangira ekyakakala.
34 Eriso ryaghu ye tala y’omubiri waghu. Eriso ryaghu ryamatungerera kighuma;* omubiri waghu wosi iniakendikolerya. Nikwa eriso lyaghu lyamabya ribi;* omubiri waghu wosi iniakendyusulamo omwirimya.
35 Neryo muyiteghaye, ekyakakala ekiri omw’inywe sikibye mwirimya.
36 Neryo omubiri waghu wosi amabyamo ekyakakala, isyalimo omwanya owalimo omwirimya; iniakendikolerya ng’etala eyikakoleraya ndeke.”
37 Yesu abere abikania emyatsi eyi, Omufarisayo mughuma mwamubwira ati bayalye haghuma. Neryo Yesu mwingira omo nyumba, bamalya.*
38 Nikwa Omufarisayo mwasweka akalangira ngoko Yesu amalya isyatanaba oko byala.
39 Nikwa Omukama mwamubwira ati: “Inywe Bafarisayo mukeraya ehihya w’ekopo n’ehihya w’ekibakuli,* nikwa emwisi imuswiremo omururu n’esyongumbu nyibi.
40 Inywe bakiru! Oyo wakokotaya ehihya yo wanakokotaya n’emwisi.
41 Omughulu mukawatikaya abera,* muhitaye erilua oko mitima yenyu. Mwamabikola mutya, ebyosi ebibalebirye ibikendyera.
42 Nikwa obulighe okw’inywe Bafarisayo, kusangwa mukaha oMungu y’ekighuma ky’omw’ikumi ky’esyonyinyi sy’omunana n’omuchicha n’esindi nyinyi syosi; nikwa mukalekeranaya eritunganene n’olwanzo lw’oMungu. Kwenene litolere imwaliha ekighuma ky’omw’ikumi, aliwe siritolere mukalekerania eyindi myatsi eyo.
43 Obulighe okw’inywe Bafarisayo, kusangwa mwanzire eryikala oko bitumbi by’embere-mbere omo syosinagogi,* n’eriramukibwa omo syosoko.*
44 Obulighe okw’inywe, kusangwa muli ng’esisinda esitalangirikire ndeke esyo abandu bakalabako isibasi.”
45 Omughuma w’oko basi Emighambo yo ndeke, mwasubirya ati: “Mukangirirya, omughulu ukabugha utya, netu ukabya ighukatutsuma.”
46 Neryo Yesu mwabugha ati: “Obulighe n’okw’inywe, inywe mwasi Emighambo yo ndeke. Kusangwa mukahekaya abandu b’emiheke eyiritohire; nikwa inywe isimwangatulya kuyo n’omunwe wenyu n’omughuma!
47 “Obulighe okw’inywe, kusangwa mukahimba esisinda sy’abaminyereri, aliwe abotatakulu wenyu ibo bitabo!
48 Oko kwenene munasi ebyo abotata-kulu wenyu bakola, kandi mukimirabo; kusangwa mubita abaminyereri, neryo nenyu mukahimba amasinda ayo.
49 Ekyo kyo kyaleka oMungu, omo menge wiwe iniabugha ati: ‘Ngendisyatumirabo abaminyereri n’abakwenda; bakendisyita n’eryaghalya* abandi ba kubo.
50 Neryo omusasi w’abaminyereri bosi owabiryutika eritsuka okw’ihangyikwa ly’ekihugho iniabya oko kizazi* eki.
51 Eritsuka oko musasi wa Abeli, erihika oko musasi wa Zekaria oyo bitira omo kati-kati k’ekiherero n’ehekalu.’ Kwenene ngababwira, ekizazi* eki kikendisyabyako olubanza lw’omusasi wabo.
52 “Obulighe okw’inywe, inywe mwasi Emighambo yo ndeke. Kusangwa mwabirilusya oko bandu k’olufungura olukingiraya ahali amenge, kandi nenyu simwatingira; kandi mukakakiraya abakasonda eringira ahali amenge ayo!”
53 Neryo abere abiluayo, abakangirirya b’Emighambo n’Abafarisayo mubatsuka erimukalako kutsibu n’erimubulya amabulyo mangyi kutsibu.
54 Babya bakasonda abughe ekinywa ekyo bangamuteghamo.
Amaelezo awehikwa
^ Kutse “abalimo eminda yetu kutse amadeni wetu.”
^ Kinywa kwa kinywa, “Isiwatwingiraya omw’ilengwako.”
^ Erina erikakolesibawa oko Sitani.
^ Kinywa kwa kinywa, “omunwe w’oMungu.”
^ Kutse “oyo akuha amabere.”
^ Kutse “olulengo.”
^ Kutse “olulengo.”
^ Kutse “omwami-kali.”
^ Kutse “olulengo.”
^ Kutse “olulengo.”
^ Kutse “ryamalangira ndeke.” Kinywa kwa kinywa, “lyamabya ryolo.”
^ Kutse “lyamatenditungerera ekindu kighuma.”
^ Kinywa kwa kinywa, “bamikala oko mesa.”
^ Kutse “ekibindi.”
^ Kinywa kwa kinywa, “ebihembo by’olukogho.” Ulebaye amaana w’ebinywa.
^ Ulebaye amaana w’ebinywa.
^ Kutse “ehitale.”
^ Kutse “eryendererya.”
^ Kutse “olulengo.”
^ Kutse “olulengo.”
