Engulu mbuya eyahandikawa na Luka 14:1-35
14 Oko kiro kighuma ky’Esabato, Yesu mwingira omo nyumba y’omukulu w’Abafarisayo mughuma eriyalya akalyo. N’abandu babya ibabirilebya Yesu yo kutsibu.
2 Kandi embere sya Yesu, habya omulume oyukwire obukoni bw’eribimba-bimba.*
3 Neryo Yesu mwabulya abasi Emighambo yo kutsibu n’Abafarisayo ati: “Omo Mighambo, kinahamulirwe erilamya omo kiro ky’Esabato kutse iyehe?”
4 Nikwa mubabya bukutu. Neryo Yesu mwahira oko omulume oyo kw’ebyala, amamulamya, n’erimubwira ati aghende.
5 Neryo Yesu mwabulyabo ati: “Nindi okw’inywe oyute wangayira luba erilusya omo kyuna ky’amaghetse enume yiwe y’ende kutse omughala wiwe amabitogheramo ekiro ky’Esabato kwehi?”
6 Mubatatoka erisubirya okw’ekyo.
7 Neryo Yesu mwabya abilangira abagheni ibabirisombola ebitumbi by’olukengerwa, mwababwira omo musyo ati:
8 “Omughulu bamakubirikira oko ndwa, isiwasombola ekitumbi ky’olukengerwa. Kwa muhwa omundu oyusikibwe kukulenga naye anganabya inyabiribirikirwa.
9 Oyulyababirikira inyakendyasa n’erikubwira ati, ‘Usighire oyu y’ekitumbi ekyo wikereko ekyo,’ neryo ighukendikuta-kuta ukayikala omo kitumbi ky’enyuma-nyuma.
10 Nikwa omughulu wamakokibwa, wikale omo kitumbi ky’enyuma-nyuma. Neryo oyulyakubirikira inyakendibya abyasa, iniakendikubwira ati, ‘Tahiee! Ghenda uyikale omo mwanya owasikire olya.’ Neryo abandi bagheni bosi ibakendikusikya.
11 Kusangwa obuli mundu oyukayihamaya,* akendisyakehibwa; n’oyukayikehaya akendisyahamibwa.”
12 Enyuma syaho, mwabwira n’oyo wamukokaya ati: “Omughulu ukakokaya abandu okw’irya ry’eritungyi kutse ery’erigholo-gholo, isiwakokaya abira baghu, kutse abaghala benyu, kutse abatunga baghu, kutse abahimbani baghu abateke. Kusangwa nabo ibanganakukokya ekindi kiro neryo ibabya nga bamakuliha.
13 Nikwa omughulu ukateghekanaya ekisendebele, ukokaye abera, abakasindoghera, abalema, n’esyondimetime.
14 Aho ighukenditsema; kusangwa sibawite ekyo bangakuliha. Kusangwa ukendisyalihwa okw’ilubuka ry’abatunganene.”
15 Omughuma w’oko bagheni mwabya abyowa ebinywa ebyo, mwabugha ati: “Oyukalya* akalyo omo Bwami bw’oMungu atsemire.”
16 Yesu mwamubwira ati: “Omundu mwateghekania erirya rinene ry’erigholo-gholo, n’eribirikira abandu bangyi.
17 Endambi y’erirya yabere yahika, mwatuma omughombe wiwe ati ayabwire abalyakokibawa ati, ‘Mwase, kundi emyatsi yosi yamabiteghekanibwa.’
18 Nikwa abosi mubatsuka eriyihambulisania. Ow’erimbere mwamubwira ati, ‘Munaghulire eririma, neryo litolere inayalebyaryo. Kisi, ngakusaba unganyire, sinendyasa.’
19 Oghundi mwabugha ati, ‘Munaghulire esyonde 10, neryo ngayalebayasyo. Kisi, ngakusaba unganyire, sinendyasa.’
20 N’oghundi mwabugha ati, ‘Niri mulunga muhya-muhya, neryo busana n’ekyo, sinenditoka eryasa.’
21 Neryo omughombe oyo mwasubula n’erikanirya omukama y’emyatsi yosi eyi. Neryo omukama w’enyumba mwahitana n’eribwira omughombe wiwe ati: ‘Ughende luba omo syonzira nene-nene, n’omo hiyira hy’omuyi. Ubirikire abera, abakasindoghera, esyondimetime, n’abalema.’
22 Enyuma syaho omughombe mwabugha ati: ‘Mukama twabirikola ngoko ulyabugha. Aliwe hakine omwanya.’
23 Neryo omukama mwabwira omughombe ati, ‘Ughende omo syondaki, n’omo syonzira. Uyahatikane abandu uti base; enyumba yaghe yosule.
24 Kusangwa ngababwira sihali n’omughuma w’oko abalyakokibawa abo oyukendighonza oko kalyo kaghe.’”
25 Abandu bangyi babya ibanemughenda haghuma na Yesu. Mwabindukirabo n’eribwirabo ati:
26 “Omundu oyukasa eyo niri aliwe isyaponire* baba wiwe, mama wiwe, omukali wiwe, abana biwe, abaghala babo, n’abali babo, nibya n’engebe* yiwe, syangabya mwigha waghe.
27 Oyuteheka omuti* wiwe w’amaghali n’erinikwama syangabya mwigha waghe.
28 Ng’eky’erileberyako, nindi okw’inywe oyukanza erihimba enyumba, oyutetsuka eryikala n’erikola emighanzo erilebya ng’anawite oko bindu ebyangusulyayo?
29 Bite bitya, iniakenditakula ekibanza* kyayo nikwa iniatabughayo, n’abandu ibamusekerera,
30 bati: ‘Omulume oyu mwatsuka erihimba enyumba; nikwa abiritaluka eryusulyayo.’
31 Kutse ni mwami wahi oyuwite abasuda 10 000, oyukayalwa n’oghundi mwami oyuwite abasuda 20 000, oyute wangatsuka eryikala n’erilebya ng’anemwendimukinda?
32 Amabya isyangatoka, iniakendituma oko mwami oyo kw’abakwenda iniakine hali batoke erihiraho obuholo.
33 Kutya, muminye ngoko sihali n’omughuma w’okw’inywe oyo wangabya mwigha waghe amatendilolya oko bindu biwe byosi kw’omughongo.
34 “Oko kwenene, omunyu uwene. Nikwa omunyu amabiherya obusi bwagho, ekyangatasyasubya obusi bwagho niki?
35 Akabya isyangabya na mughaso oko kitaka, kutse eribya mbolewa. Abandu bakaghusagho. Oyuwite amatwi w’eryowa, owe.”
Amaelezo awehikwa
^ Kutse “obukoni obukabimba-bimbaya omubiri.”
^ Kutse “oyukayihahamisaya.”
^ Kutse “oyukalya omukati.”
^ Kinywa kwa kinywa, “eryanza hake.”
^ Kutse “obuyingo.”
^ Ulebaye amaana w’ebinywa.
^ Kutse “efondasyo.”
