Engulu mbuya eyahandikawa na Luka 15:1-32
15 Abakalihisaya ebitasi* bosi n’abakola-nabi ibakahindana ahali Yesu batoke eryowa ebinywa biwe.
2 Abafarisayo n’abakangirirya b’Emighambo, mubabya bakayilungumula bati: “Omulume oyu akakokaya abakola-nabi kandi akalya haghuma nabo.”
3 Neryo mwabwirabo omusyo ono ati:
4 “Nindi okw’inywe oyuwite esyombuli 100, amabiherya enguma ya kusyo, oyute wangasigha esyombuli 99 n’eriyasondya enguma eyiryahera erihika aho akendibanirayo?
5 Kandi akabya abibanayo, akatsema n’erihirayo oko bitigho biwe.
6 Kandi akabya ahika eka, akabirikira abira biwe, n’abahimbani biwe bo haghuma n’eribwirabo ati, ‘Mutseme haghuma naghe kusangwa nabiribana embuli yaghe eyilue iyabirihera’.
7 Ngababwira, n’omo lubula namo, mukabya obutseme bunene omukola-nabi mughuma amabibindula omutima, kulenga obwangabyayo busana n’abatunganene 99 abate n’obwagha bw’eribindula emitima.
8 Kutse ni mukali wahi oyuwite ebitsere* 10 by’edrakma* amabiherya ekighuma kya kubyo oyute wangakya etala n’eribirya enyumba yiwe, n’erisondekaniakyo erihika aho akendibanirakyo?
9 Akabya abanakyo, akabirikira abira* biwe, n’abahimbani biwe, n’eribabwira ati, ‘Mutseme haghuma naghe kusangwa nabiribana ekitsere* kyaghe ky’edrakama ekyo nilue inabiriherya.’
10 Kutya ngababwira, abamalaika b’oMungu bakatsema omukola-nabi mughuma amabibindula omutima.”
11 Neryo mwabugha ati: “Habya omulume mughuma oyuwite abaghala biwe babiri.
12 Neryo omulere mwabwira baba wiwe ati, ‘Baba umbe erighabo ryaghe oko bindu ebyo uwite.’ Neryo mwaghabirabo ebindu biwe.
13 Enyuma w’ebiro bike, omulwana mulere oyo mwakuma-kuma ebindu biwe byosi, amaghenda omo kihugho ky’ehali. N’eyo, mwatsanga omo bindu biwe omo butya-butya.
14 Abere abiyibughako ebindu byosi, enzala nene muyabya omo kihugho ekyo. Neryo mwabya omo bwagha.
15 Nibya mwahika n’oko kika amayasonda obwikalo ew’omwikalani w’omo kihugho ekyo. Omwikalani oyo, mwamutuma omo ririma riwe eribya akalisya esyongulube.
16 Habya isihali mundu oyukamuha ekindu kyosi-kyosi. Neryo mwayitsutsa eribya akalya oko poso* y’esyongulube.
17 “Obwenge bwiwe bwabere bwasuba, mwabugha ati, ‘Abosi abakakolera baba y’emibiiri ka banemusunga akalyo akatosire. Ibwa ingye yono enzala ikanitira eno!
18 Ngendihongoka inaya eyiri baba n’erimubwira niti: “Baba, nabirihalya oko Mungu* n’okw’iwe.
19 Sinikitolere eryahulwa mo mughala waghu. Uniyire mo mughuma w’oko bakakukolera emibiiri.’”
20 Neryo mwahongoka n’eriya eyiri baba wiwe. Iniakine hali, baba wiwe mwamulangira. Neryo mwamukwira obulighe. Mwatibita eyo ali, amamuwako n’erimuha ebeze.*
21 Neryo omulwana oyo mwabwira baba wiwe ati, ‘Baba, nabirihalya oko Mungu* n’okw’iwe. Sinikitolere eryahulwa mo mughala waghu.’
22 Nikwa baba wiwe mwabwira abaghombe biwe ati, ‘Mwanguhe, mulete ekanzu eyuwene kutsibu mumwambalayeyo. Mumwambalaye n’epeta,* mumuletere n’ebiryato.
23 Mulete n’ekyana ky’ende ekinenehire. Mukerekyo, tulye n’eritsanga,
24 kusangwa omughala waghe oyu alue aholire; nikwa abirisuba, alue aherire; nikwa abiribanika.’ Neryo mubatsuka eriyitsemesya.
25 “Nikwa omughala wiwe mukulu abya iniabiriya omoli. Abere asubula, n’erihika hakuhi n’oho wabo, mwowa abandu bakimba n’erisata.
26 Neryo mwabirikira omughuma w’oko baghombe n’erimubulya nga haliki.
27 Mwamubwira ati, ‘Omughala wenyu abirihika, na baba waghu mwakakera ekyana ky’ende ekinenehire; kundi mwakasubula inianakalire.’
28 Nikwa omulwana oyo mwahitana, n’erighana eringira omo nyumba. Neryo baba wiwe mwahuluka, n’eritsuka erimulemba-lemba.
29 Mwasubirya baba wiwe ati, ‘Nabirikukolera omo myaka yosi eyi, kandi sindinataghana erikowa; aliwe sighuliwatamba n’akahene n’akaghuma nitoke eritsanga haghuma n’abira baghe.
30 Aliwe omwana waghu oyu, oyo watsanga omo bindu byaghu haghuma n’abambalaka mwakabya abihika mughukamukerera ekyana ky’ende ekinenehire.’
31 Baba wiwe mwamusubirya ati, ‘Mughala waghe, iwe une haghuma naghe ebiro byosi, n’ebindu byaghe byosi ni byaghu.
32 Litolere itwatsanga n’eritsema. Kusangwa mughala wenyu alue aholire, nikwa abirisuba; alue aherire, nikwa abiribanika.’”
Amaelezo awehikwa
^ Kutse “abasolesya.”
^ Ulebaye endomeko B14.
^ Ulebaye endomeko B14.
^ Kutse “abira biwe b’obukali.”
^ Ulebaye endomeko B14.
^ Kutse “akalyo k’esyongulube.” Akalyo k’esyongulube aka, kabya mibimba y’omuti owakahulawa mo karobu.
^ Kinywa kwa kinywa, “nabirihalya oko lubula.”
^ Kutse “erimulyatsirira.”
^ Kinywa kwa kinywa, “nabirihalya oko lubula.”
^ Kutse “embuka.”
