Engulu mbuya eyahandikawa na Luka 16:1-31
16 Kandi Yesu mwabwira abigha biwe ati: “Habya omuteke mughuma oyo wabya awite omwimaniri w’enyumba. Mubamubwira ngoko omughombe oyo syatateya ebindu biwe byo ndeke.
2 Neryo mwabirikira omuteya oyo n’erimubwira ati, ‘Ebyo ngakowako ebi ni bihi? Umbe emighanzo y’ebindu ebyo ukateghaya, kusangwa siwenditasyabya muteya w’enyumba yaghe.’
3 Neryo omuteya oyo mwayibwira ati, ‘Ngendikolaki kundi omukama waghe akendinilusya oko mubiiri w’obuteya? Sinangatoka erilima, kandi ngakwa esisoni sy’erisabirirya!
4 Ahaa! Namabiminya ekyo ngendikola, neryo omughulu bakendisyanilusya oko mubiiri w’obuteya abandu ibabya bakanikokya omo manyumba wabo.’
5 Neryo mwabirikira abosi abalimo amadeni* w’omukama wiwe. Mwabwira ow’erimbere ati, ‘Ulimo edeni nyingahi y’omukama waghe?’
6 Mwamusubirya ati, ‘Ehilengyi* 100 hy’amaghuta w’emizeituni.’ Naye mwamubwira ati, ‘Imaya akaratasi akahandikireko edeni yaghu, ulw’iwahandikako ehilengyi* 50.’
7 Mwabwira n’oghundi ati, ‘Naghu ulimo edeni nyingahi?’ Mwabugha ati, ‘Ebitiri* 100 by’engano.’ Mwamubwira ati, ‘Imaya akaratasi akahandikireko edeni yaghu, uhandikeko ebitiri* 80.’
8 Omughombe oyo nomo anabya mubi, omukama wiwe mwamusima; kundi mwakolesya amenge. Kusangwa abana b’omo kihugho kino basi erikolesya amenge oko bandu b’omo kizazi* kyabo; basi erikola batya kutsibu kwilaba abana b’ekyakakala.
9 “Kandi ngababwira: Mukolesaye ebindu ebitatunganene eriyikolera abira. Omughulu ebindu ebyo bikendisyahwa, batoke erisyabapokera omo bwikalo bwa kera na kera.
10 Oyuteleghula omo myatsi mike-mike syalileghula n’omo myatsi minene-minene; n’oyutatunganene omo myatsi mike-mike, syalitunganana n’omo myatsi minene-minene.
11 Neryo mwamabitaluka eribya bataleghula oko buteke obutatunganene, nindi yukendisyabaha obuteke bw’ekwenene?
12 Kandi mwamabya imukaleghula mukakolesya ebindu by’abandi nindi yukendisyabaha ebindu byenyu-byenyu?
13 Sihali omughombe oyo wangatoka erikolera abakama babiri, kundi iniakendyanza omughuma n’eripona oghundi; kutse iniabya mutaleghula oko mughuma, n’erighonera oghundi. Simwangatoka eribya baghombe b’oMungu n’abaghombe b’Ebindu.”
14 Abafarisayo babya ibanahulikirire ebinywa byosi ebi. Neryo mubatsuka erimusekererya, kundi babya banzire esyofranga.
15 Neryo mwababwira ati: “Mukayikangaya mo batunganene embere sy’abandu, aliwe oMungu anasi emitima yenyu. Kusangwa ebyo abandu bakalangira mo by’olukekengerwa, ni nye omo meso w’oMungu.
16 “Emighambo ya Musa n’amakangirirya w’abaminyereri, byabya erihika oko Yohana. Eritsuka oko mughulu oyo, engulu mbuya y’Obwami bw’oMungu inemutulaghanibwa; n’abandu b’emihanda yosi banemuyikasa kutsibu eringira mubo.
17 Kwenene kyolobire, ekyanya n’ekihugho ibyalaba omo mwanya w’akatondi kaghuma k’omo Mighambo eribula eribererera.
18 “Obuli mundu oyukatwa endwa na mukali wiwe n’eritahya oghundi, akabya iniamasingira; n’oyukatahaya omukali oyo watwa endwa n’iba wiwe, akabya iniamasingira.
19 “Habya omuteke oyo wabya akambala esyongyimba sy’erangyi y’olubono-bono,* n’esyekitani. Abya omo tseme, kandi iniali omo amaisa aghuwene kutsibu.
20 Nikwa omulume mwera oyukahulawa mo Lazaro, kandi oyo wabya oswireko ebironda, ibakamuleta oko mulango w’omuteke oyo.
21 Iniakayitsutsa erirya oko bikatoghonga oko mesa y’omuteke oyo. Nibya n’esyombwa isikasa n’erilyatsa-lyatsa oko bironda biwe.
22 Neryo omundu oyukasabiriraya oyo, mwahola. N’abamalaika mubamutwala ahali Abrahamu.*
“N’omuteke naye mwahola, amatabwa.
23 Omuteke iniane omw’Isinda,* mwabya akaghalwa. Neryo mwasumba ameso, amalangira Abrahamu yo hali na Lazaro iniane aho lutambi kw’iye.*
24 Neryo omuteke mwabirikira ati, ‘Tata Abrahamu, unikwire obulighe, kandi utume Lazaro ahire omutwe-mutwe w’omunwe wiwe omo maghetse, aholokaye olulimi lwaghe; kusangwa ngaghalawa omo kirimi ky’omuliro kino.’
25 Nikwa Abrahamu mwabugha ati, ‘Mwana, wibuke omughulu wabyaho. Wabya omo tseme, nikwa Lazaro iye abya akaghalwa kutsibu. Neryo lino anemukiranibwa eno, nikwa iwe unemwaghalwa.
26 Kandi omo katikati ketu nenyu hali omusya muli. Abandu bamasonda erilua eyo tuli eno, eryasa eyo muli, sibangatoka; kandi abandu sibangalua eyo muli, eryasa eyo tuli eno.’
27 Neryo omuteke mwabugha ati, ‘Byamabya iko biri bitya, ngakusaba tata, utume Lazaro eka wetu,
28 ayakunge abaghala betu batano, nabo isibasyasa eno eyiri eryaghalwa.’
29 Nikwa Abrahamu mwabugha ati, ‘Banawite Musa n’abaminyereri, bahulikirire abo.’
30 Neryo omuteke mwabugha ati, ‘Iyehe baba, Abrahamu, aliwe omundu amabilua eyiri abaholi n’eriya eyo bali, ibakendibindula emitima.’
31 Nikwa Abrahamu mwamusubirya ati, ‘Bamatendihulikirira Musa n’abaminyereri, nibya isibendikirirya nomo omundu angalua eyiri abaholi.’”
Amaelezo awehikwa
^ Kutse “eminda.”
^ Omo Kigiriki ni ba′tos. Akalengyi kaghuma ini litre 22. Ulebaye endomeko B14.
^ Omo Kigiriki ni ba′tos. Akalengyi kaghuma ini litre 22.
^ Omo Kigiriki ni ko′ros. Ekitiri kighuma ini bilo nga 170 eby’engano. Ulebaye endomeko B14.
^ Omo Kigiriki ni ko′ros. Ekitiri kighuma ini bilo nga 170 eby’engano.
^ Kutse “olulengo.”
^ Kutse “erangyi y’omunyama, pourpre.”
^ Kutse “oko kikuba kya Abrahamu.”
^ Ulebaye amaana w’ebinywa.
^ Kutse “oko kikuba kya Abrahamu.”
