Engulu mbuya eyahandikawa na Luka 18:1-43
18 Neryo Yesu mwabwirabo omufano* owakakanganaya ngoko litolere ibabya bakasaba mughulu wosi, kandi ngoko siritolere ibaluha.
2 Mwabugha ati: “Omo muyi mulebe, mwabya omutsweri oyutyubaha oMungu; kandi isyasikirye mundu.
3 Omo muyi oyo mwabya n’omukwakali oyo wabya akaya eyiri omutsweri oyo kangyi-kagyi n’erimubwira ati, ‘Kisi, usohe ndeke olubanza lwaghe olo niri nalo n’oyo ngatonda naye oko tribinali.’
4 Erimbere, omutsweri oyo mwataligha. Nikwa enyuma syaho, mwayibwira ati, ‘Nomo nitesagha oMungu n’erisikya omundu wosi-wosi;
5 kandi, kusangwa omukwakali oyu akabera erinyikenderya, ngendiyikasa olubanza lwiwe lutswerawe omo ritunganene. Neryo syendibya akasa n’erinikenderya busana n’olubanza lwiwe.’”
6 Neryo Omukama mwabugha ati: “Mwanamowa ebyo omutsweri oyo abugha, nomo anabya mundu oyutatunganene!
7 Neryo oMungu syendisyaleka eritunganene rikakolwa oko basombolwa* biwe abakamulakira omo musibo n’omo kiro, inyanemubahulikirira butsir’iluha?
8 Kwenene ngababwira, akendisyaleka bakolerawe eritunganene ryo luba. Omughulu Omughala w’omundu akendisyasa, anemwendisyeya erikirirya eriri ng’eri ry’oko kihugho?”
9 Kandi mwabwirabo omufano* busana n’abakayilangira nga batunganene, n’erilangira abandi mo bule, ati:
10 “Abalume babiri mubaya omo hekalu bakayasaba. Omughuma abya Mufarisayo, n’oghundi abya inyakalihisaya ebitasi.*
11 Omufarisayo mwahangana, n’eritsuka erisaba inyanemubugha omo mutima wiwe ati, ‘Ngakusima, Mungu kundi ingye sindi ng’abandu bosi. Sindi ng’abanyeyi, abakola-nabi, abasingiri, kutse nibya ng’oyukalihisaya ebitasi* oyu.
12 Oko yenga ngakola amafungo wo kabiri; kandi ngateka ekighuma ky’okw’ikumi oko byosi ebyo ngabana.’
13 Nikwa oyukalihisaya ebitasi* iye, mwahangana hali. Nibya mwatanza n’erisamalira elubula; nikwa mwabya akayihumanga oko kikuba inianemubugha ati, ‘Mungu nikanganaye olukogho,* ingye mukola-nabi.’
14 Ngababwira, omulume oyu mwasuba eka wiwe iniabiribya mutunganene, kwilaba Omufarisayo oyo. Kusangwa obuli mundu oyukayihamaya,* akendisyahemulwa; nikwa obuli mundu oyukayikehaya, akendisyahamibwa.”
15 Neryo abandu mubamuletera esyomekeke, bati atule kusyo. Aliwe abigha mubabya balangira ekyo, mubatsuka erikunga abandu abo.
16 Nikwa Yesu mwabugha ati bamuletere esyomekeke, inianemubugha ati: “Muleke abana base aho niri, kandi isimwabakakiraya; kusangwa Obwami bw’oMungu, ni bw’abandu abali ng’abana.
17 Oko kwenene ngababwira, obuli mundu oyutyangirira Obwami bw’oMungu ng’omwana mulere, syendisyingira mubo n’ahake.”
18 Neryo omughuma w’oko batabali mwamubulya ati: “Mukangirirya Mubuya, ni myatsi yahi yo litolere inakola imo nasyabana engebe y’erikota?”
19 Yesu mwamubwira ati: “Busanaki ukanyahula mo mubuya? Omubuya ni mughuma musa, yo Mungu.
20 Unasi Emighambo: ‘Isiwasingira, isiwita, isiwiba, isiwabugha amabehi, usikaye baba waghu na mama waghu.’”
21 Neryo mwabugha ati: “Ngakwama ebyalayiro byosi ebyo erilua omo bulwana bwaghe.”
22 Neryo Yesu mwabya abyowa ekyo, mwamubwira ati: “Hakine ekindu kighuma ekyo ukisiya: Ughulaye ebindu byosi ebyo uwite; n’esikendiluako, ughabiresyo abera; aho ukendibya iwamabya n’ebindu omo lubula. Enyuma syaho wase unikwame.”
23 Mwabya abyowa ebinywa ebi, mwakwa obulighe bunene kundi abya muteke kutsibu.
24 Yesu mwamutungerera n’eribugha ati: “Likendisyakala oko bandu abawite esyofranga eringira omo Bwami bw’oMungu!
25 Oko kwenene lyolobire oko ngamia erilaba omo kuna k’esindani y’erisonamo, kwilaba omuteke eringira omo Bwami bw’oMungu.”
26 Abowa ebinywa ebi, mubabugha bati: “Oyo wangalamibwa nindi kwe?”
27 Mwabugha ati: “Emyatsi eyitetokekana oko bandu, oko Mungu ikatokekana.”
28 Neryo Petro mwabugha ati: “Ibwa itwe ka twabirisigha ebyo twabya nabyo, n’erikukwama!”
29 Yesu mwabwirabo ati: “Oko kwenene ngababwira, sihali omundu oyo wabirisigha enyumba, kutse omukali, kutse abaghala babo, kutse ababuti, kutse abana, busana n’Obwami bw’oMungu,
30 oyutendisyabanabyo ngendo nyingyi kwilaba aho omo mughulu ono; n’oko mughulu* owakasa engebe y’erikota.”
31 Neryo mwahengeka abakwenda biwe 12, n’eribwirabo ati: “Tukahetukira e Yerusalema, n’emyatsi yosi eyo abaminyereri bahandika oko Mughala w’omundu, ikendibererera.
32 Ng’eky’erileberyako, akendihirwa omo byala by’abandu b’ebihanda kandi akendisekereribwa, inyahemulwa, n’eritwirwako amatandi.
33 Kandi akendibya abiswiribwa omo bikoba, bakendimwita. Aliwe hakendisyabya hakya biro bisatu, inialubuka.”
34 Nikwa mubatowa kindu omo myatsi yosi eyi; kusangwa enzumwa y’ebinywa ebyo muyabiswa kubo. Neryo mubatowa ebinywa ebyo nga bikasonda eribugha bitiki.
35 Neryo Yesu abere akasonda erihika e Yeriko, endimetime yabya iyinikere oko musike w’enzira ikasaba-saba.
36 Neryo omulume oyo mwabulya nga hamabyaki; kundi mowa abandu bangyi bakalaba.
37 Mubamubwira bati: “Yesu Munazareti yukalaba!”
38 Neryo mwabirikira ati: “Yesu, Mughala wa Daudi, uniwatikaye!”*
39 N’ababya embere, mubatsuka erimukaramira bati ahune. Nikwa mwabirikira kutsibu okw’aho ati: “Mughala wa Daudi, niwatikaye!”*
40 Neryo Yesu mwimana, n’eribugha ati bamuletere omulume oyo. Abere abihika hakuhi, mwamubulya ati:
41 “Wanzire inakukoleraki?” Mwasubirya ati: “Mukama, uniwatikaye nitoke eritasyalangira.”
42 Neryo Yesu mwamubwira ati: “Utasyatsuka erilangira; obwikirirya bwaghu bwamabikulamya.”
43 Neryo aho n’aho, omulume oyo mwalw’inialangira. Kandi mwatsuka erikwama Yesu inianemupipa oMungu. N’abandu bosi babere balangira ekyo, mubapipa oMungu.
Amaelezo awehikwa
^ Kinywa kwa kinywa, “omusyo.”
^ Kutse “abayisoghawa.”
^ Kinywa kwa kinywa, “omusyo.”
^ Kutse “musolesya.”
^ Kutse “omusolesya.”
^ Kutse “omusolesya.”
^ Kinywa kwa kinywa, “unighanyire.”
^ Kutse “oyukayihahamisaya.”
^ Ulebaye amaana w’ebinywa.
^ Kutse “unikwire obulighe.”
^ Kutse “nikwire obulighe.”
